ព័ត៍មានទាន់​ហេតុការណ៏
Search

ឃាត់​មនុស្ស​៣​នាក់​ដកហូត​គ្រឿងញៀន​ជិត​៦​គីឡូក្រាម​ លាក់​ទុក​ក្នុង​ធុងបាស​

ភ្នំពេញ ៖ មនុស្ស​ប្រុស ស្រី ៣​នាក់ រួម​ទាំង​វត្ថុតាង​គ្រឿងញៀន ជិត ៦​គីឡូក្រាម លាក់​ទុក​នៅក្នុង​ធុងបាស បម្រុង​នាំ​យក​ទៅ​ប្រទេស​វៀតណាម ត្រូវ​សមត្ថកិច្ច​នគរបាល​ម​ន្ទីរ​ប្រឆាំង​គ្រឿងញៀន​បង្ក្រាប។

សមត្ថកិច្ច​មន្ទីរ​ប្រឆាំង​គ្រឿងញៀន​ប្រាប់​ឲ្យ​ដឹង​ថា កាលពី​ថ្ងៃ​ចន្ទ ១៥​កើត ខែកត្តិក ឆ្នាំកុរ ឯកស័ក ព.ស ២៥៦៣ ត្រូវ​នឹង​ថ្ងៃទី​១១ ខែវិច្ឆិកា ឆ្នាំ​២០១៩ កម្លាំង​ជំនាញ (​ក​៥) នៃ​មន្ទីរ​ប្រឆាំង​បទល្មើស​គ្រឿងញៀន ដឹកនាំ​ដោយ​លោក ឧ​ត្ត​ម​សេនីយ៍​ទោ សាន សុ​ទ្ធី នាយករង​មន្ទីរ សហការ​ជាមួយ​ក្រុមហ៊ុន​ដឹកជញ្ជូន​អ្នកដំណើរ ដាន​ដាន​អ៊ិ​ច​ប្រេ​ស​បើ​ស ដឹកនាំ​សម្របសម្រួល​ពី លោក ស៊ិត វណ្ណៈ ព្រះរាជ​អាជ្ញា​រង​នៃ​អយ្យការ​អម​សាលាដំបូង​រាជធានី​ភ្នំពេញ បាន​ត្រួតពិនិត្យ​កញ្ចប់ បញ្ញើ​មួយ​មាន​ភាពមិន​ប្រក​តី ដែល​ផ្ញើ​ពី​រាជធានី​ភ្នំពេញ​ទៅ​ទីក្រុង​ហូជីមិញ ប្រទេស​វៀតណាម តាមរយៈ ក្រុមហ៊ុន​ដាន​ដាន ស្ថិតនៅ​ផ្ទះ​លេខ​២៨៥ ផ្លូវ​ព្រះសីហនុ សង្កាត់​វាលវង់ ខណ្ឌ​៧​មករា។

ប្រតិបត្តិការ​នេះ សមត្ថកិច្ច​រក ឃើញ​សារធាតុ​ញៀន ប្រភេទ មេ​តំ​ហ្វេ​តា​មីន (ICE) ចំនួន ៦​កញ្ចប់​ធំ ស្មើនឹង​ទម្ងន់ ៥៨៩៥.៨២​ក្រាម ដែល​បាន​ដាក់​បង្កប់​ក្នុង​ធុងបាស​ធំ​ចំនួន​មួយគ្រឿង​។ បន្ទាប់មក​សមត្ថ​កិច្ច​ជំនាញ បាន​បន្ត​ការស៊ើបអង្កេត​ស្រាវជ្រាវ​ជាបន្ទាន់ ដោយ​កំណត់​បាន មុខសញ្ញា​ពាក់ព័ន្ធ​មួយចំនួន រួច​ឈានទៅ​ចាប់ខ្លួន​ជនសង្ស័យ​ចំនួន ៣​នាក់ ដែលមាន​ឈ្មោះ​ ១. ឈ្មោះ ប៉ុក ស្រី​ល័​ក្ខ ភេទ​ស្រី ជនជាតិខ្មែរ កើត 20.02.1991 មុខរបរ​លក់ដូរ កាន់ លិខិតឆ្លងដែន​លេខ N01710555(​អ្នក​ដឹកជញ្ជូន​គ្រឿងញៀន​ឆ្លងដែន​) ។ ២. ឈ្មោះ យុន ស្រីនូ ភេទ​ស្រី ជនជាតិខ្មែរ កើត 14.09.1999 មុខរបរ​លក់ដូរ កាន់​លិខិត ឆ្លងដែន​លេខ N01710517 (​អ្នក​ដឹកជញ្ជូន​គ្រឿងញៀន​ឆ្លងដែន​) ។ ៣. ឈ្មោះ NDUKWU JONATHAN CHUKWUJEKWU ភេទ​ប្រុស ជនជាតិ នី​ហ្សេ​រី​យ៉ា កើត 10.10.1993 មុខរបរ​កីឡាករ​ទាត់​បាល់ កាន់​លិខិតឆ្លងដែន​លេខ A09524100 (​មេក្លោង​ដឹកជញ្ជូន​គ្រឿងញៀន​ឆ្លងដែន​)។

នៅវេលា​ម៉ោង ១៥ និង​៣០​នាទី សមត្ថកិច្ច​បន្ត​ឆែ​កក​ឆេរ​ផ្ទះ​ជួល​របស់ ឈ្មោះ NDUKWU JONATHAN CHUKWUJEKWU ផ្ទះ​លេខ A13 ផ្លូវ​45BT ក្រុម​២ ភូមិ​សន្សំ កុសល សង្កាត់​បឹងទំពុន ខណ្ឌមានជ័យ ជា​លទ្ធផល​វត្ថុ​ចាប់​យក រួមមាន កញ្ឆា​ក្រៀម ៩​ក្រាម​, ជញ្ជីង​ថ្លឹង ០១​គ្រឿង​, ម៉ាស៊ីន​បាញ់​ទឹក ៨​គ្រឿង​, ម៉ាស៊ីន​បូម​ធូលី ១​គ្រឿង​, ធុងបាស់ ១​គ្រឿង​, ទូរស័ព្ទ ៣​គ្រឿង និង​លិខិតឆ្លងដែន ៣​ក្បាល។ សរុប​វត្ថុ​តាង​គ្រឿងញៀន​ចាប់យក មេ​តំ​ហ្វេ​តា​មីន (ICE) ទម្ងន់ ៥៨៩៥.៨២​ក្រាម និង កញ្ឆា ៩​ក្រាម៕
រ៉ា​វុ​ទ្ធ



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114