BREAKING NEWS
Search

ជនល្មើសបាញ់សម្លាប់សត្វស្វាកន្ទុយសម្នាក់ ត្រូវបានចាប់ខ្លួនបញ្ជូនទៅកាន់តុលាការ ដើម្បីចាត់ការតាមច្បាប់

ភ្នំពេញ៖ លោក នេត្រ ភក្ដ្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានសម្ដែងការសោកស្ដាយ និងថ្កោលទោសយ៉ាងដាច់អហង្ការ ចំពោះការបាញ់សម្លាប់សត្វស្វាកន្ទុយស នៅខេត្តស្ទឹងត្រែង ដែលជាប្រភេទសត្វកម្រ នៅក្នុងប្រទេសកម្ពុជា និងពិភពលោក និងបានបញ្ជាក់ថា ជនល្មើសបាញ់សម្លាប់សត្វស្វាកន្ទុយសនេះ ត្រូវបានចាប់ខ្លួនហើយ នឹង​បញ្ជូនទៅកាន់តុលាការ ដើម្បីចាត់ការតាមច្បាប់។

លោក នេត្រ ភក្ដ្រា បានអះអាងថា ជនសង្ស័យដែលបានប្រព្រឹត្តបទល្មើសនេះ ត្រូវបានអាវុធហត្ថខេត្តស្ទឹងត្រែងចាប់ខ្លួនបានហើយ និងបានប្រគល់ឲ្យមន្ដ្រីបរិស្ថាន ដើម្បីត្រៀមបញ្ជូនទៅសាលាដំបូងខេត្តស្ទឹងត្រែង នៅព្រឹកថ្ងៃទី១៣ ខែមិថុនា ឆ្នាំ២០២០ ដើម្បីបញ្ជូនសំណុំរឿងទៅតុលាការតាមផ្លូវច្បាប់ជាធរមាន។ លោកថ្លែងយ៉ាងដូច្នេះថា “ចំពោះជនសង្ស័យដែលបានបាញ់សម្លាប់សត្វស្វាកន្ទុយស ដែលជាសត្វកម្រនៅក្នុងពិភពលោក នឹងត្រូវបញ្ជូនទៅតុលាការខេត្តស្ទឹងត្រែង ដើម្បីអនុវត្តតាមផ្លូវច្បាប់នៅស្អែក។ ពេលនេះមន្ដ្រីក្រសួងបរិស្ថាន បានទទួលជនសង្ស័យពីអាវុធហត្ថខេត្តស្ទឹងត្រែងហើយ”។ ដោយឡែក សពសត្វស្វាកន្ទុយស ដែលត្រូវជនសង្ស័យបាញ់សម្លាប់នេះ សមត្ថកិច្ចបានយកទៅដុតរំលាយសពរួចរាល់ហើយ នៅល្ងាចថ្ងៃទី១២ ខែមិថុនា ឆ្នាំ២០២០នេះ។

ជាមួយគ្នានេះ លោក នេត្រ ភក្ដ្រា បានឲ្យដឹងថា រហូតមកដល់ពេលនេះ សត្វស្វាកន្ទុយស នៅក្នុងប្រទេសកម្ពុជាមានប្រមាណជាង២ម៉ឺនក្បាល ដែលកំពុងមានវត្តនៅភាគខាងកើត និងខាងជើងទន្លេមេគង្គ ពោលមាននៅខេត្តមណ្ឌលគិរី ស្ទឹងត្រែង រតនគិរី និងខេត្តព្រះវិហារ។ ខេត្តមណ្ឌលគិរី ជាខេត្តដែលមានសត្វស្វាកន្ទុយសច្រើនជាងគេ ពិសេសក្នុងដែនជម្រកសត្វព្រៃកែវសីម៉ា។

បន្ថែមពីនេះ ក្នុងនាមក្រសួងបរិស្ថាន លោក នេត្រ ភក្ដ្រា បានអំពាវនាវដល់ប្រជាពលរដ្ឋ ពិសេសអ្នកនៅតំបន់ព្រៃភ្នំ សូមបញ្ឈប់ការបាញ់សម្លាប់សត្វ ដើម្បីយកមកធ្វើជាចំណីអាហារ ឬដើម្បីផលប្រយោជន៍ផ្សេងៗ ព្រោះថាមកទល់ពេលនេះ សត្វព្រៃមួយចំនួនបានជិតផុតពូជទៅហើយ។

សូមជម្រាបថា ស្វាកន្ទុយស ដែលជាសត្វកម្រនៅខេត្តស្ទឹងត្រែង ត្រូវគេបាញ់ចំកណ្ដាលក្បាលបណ្ដាលឲ្យស្លាប់យ៉ាងអណោចអធ័ម នាថ្ងៃទី១២ ខែមិថុនា ឆ្នាំ២០២០នេះ នៅចំណុចក្រឡាពុះ ភូមិស្វាយរៀង ឃុំតាឡាត ស្រុកសេសាន ខេត្តស្ទឹងត្រែង។ បើតាមសេចក្ដីរាយការណ៍ ក្រោយមានហេតុការណ៍នេះ កម្លាំងអាវុធហត្ថខេត្តស្ទឹងត្រែង ក្រោមការបញ្ជាផ្ទាល់ពី លោកឧត្តមសេនីយ៍ត្រី អៀង វ៉ាន់ឌី បានស្រាវជ្រាវភ្លាមៗ ដោយសហការជាមួយអាវុធហត្ថលើផ្ទៃប្រទេស រហូតឈានដល់ការចាប់ខ្លួនបានជនសង្ស័យផងដែរ។

សមត្ថកិច្ចបានបញ្ជាក់ថា ជនសង្ស័យដែលធ្វើសកម្មភាពបាញ់សម្លាប់សត្វស្វាកន្ទុយសនេះ ឈ្មោះ ណាំ យ៉ុន អាយុ៣៥ឆ្នាំ មុខរបរកសិករ រស់នៅភូមិស្វាយរៀង ឃុំតាឡាត ស្រុកសេសាន។ ក្នុងនោះសមត្ថកិច្ចដកហូតបាន សត្វស្វា (ប្រភេទស្វាកន្ទុយស) ចំនួន០១ក្បាល និងអាវុធកែឆ្នៃ (កាំភ្លើងខ្យល់) ចំនួន០១ដើមផងដែរ៕ សុជាតា