ព័ត៍មានទាន់​ហេតុការណ៏
Search

ទីបំផុត ! គម្រោង​វិលត្រឡប់​មកកាន់​កម្ពុជា​របស់​ទណ្ឌិត សម រ​ង្ស៉ី គ្រាន់តែ​ជាការ​សម្តែង​ប៉ុណ្ណោះ​

ភ្នំពេញ ​៖ ប្រភពពី​អាកាសយានដ្ឋាន​អន្តរជាតិ​ភ្នំពេញ​បាន​ថ្លែងប្រាប់​អ្នកសារព័ត៌មាន​កាលពី​ល្ងាច​ថ្ងៃទី​០៧ ខែវិច្ឆិកា ថា គម្រោង​ហោះហើរ​ចាក​ចេញពី​ទីក្រុង​ប៉ារីស ប្រទេស​បារាំង ទៅកាន់​ទីក្រុង​បាងកក ប្រទេស​ថៃ របស់​ទណ្ឌិត សម រង្ស៊ី ត្រូវ​បាន​បរាជ័យ​ហើយ ដោយសារ​អាជ្ញាធរ​ថៃ និង​ក្រុមហ៊ុន​អាកាសចរណ៍​មិន​អនុញ្ញាត នេះ​បើតាម​ការ​បញ្ជាក់​របស់​មន្ត្រីជាន់ខ្ពស់​នៃ​ក្រុមហ៊ុន​អាកាសចរណ៍ Thai Airways ដែល​បាន​ថ្លែងប្រាប់​មន្ត្រី​អាកាសយានដ្ឋាន​អន្តរជាតិ​ភ្នំពេញ ហើយ​បើតាម​ប្រភព​នោះ ភាគី​ថៃ​បាន​បញ្ជាក់ថា សម រ​ង្ស៉ី មិនមាន​ឈ្មោះ​ឡើង​យន្តហោះ ដើម្បី​ធ្វើដំណើរ​មក​ទីក្រុង​បាងកក​ទេ​។

ទណ្ឌិត សម រង្ស៊ី គ្រោង​ចាក​ចេញពី​ទីក្រុង​ប៉ារីស មកកាន់​ទីក្រុង​បាងកក ប្រទេស​ថៃ នៅ​ថ្ងៃទី​០៧ វិច្ឆិកា តាម​ជើងហោះហើរ​របស់​ក្រុមហ៊ុន Thai Airways នេះ​ជា​អ្វីដែល​លោក សម រង្ស៊ី ប្រកាស​តាម​បណ្ដាញ​សង្គម​ហ្វេ​ស​ប៊ុ​ក​របស់ខ្លួន កាលពី​យប់​ថ្ងៃ​អង្គារ ទី​០៥ វិច្ឆិកា ដោយមាន​ភ្ជាប់​ជាមួយ​នូវ​រូបថត​សំបុត្រ​យន្តហោះ​របស់​ខ្លួន​ផង ប៉ុន្តែ​គម្រោង​នេះ បាន​ប្រែប្រួល ដោយ​ដូរ​ពីថ្ងៃ​ទី​៧ ខែវិច្ឆិកា ទៅ​ថ្ងៃទី​៩ ខែវិច្ឆិកា ឆ្នាំ​២០១៩​វិញ ហើយ​កំណត់​មកដល់​ប្រទេស​ថៃ​នៅ​ថ្ងៃទី​១០ ខែវិច្ឆិកា​។

សូម​បញ្ជាក់ថា កាលពី​ថ្ងៃទី​០៦ ខែវិច្ឆិកា ឆ្នាំ​២០១៩ លោក​ឧ​ត្ត​ម​សេនីយ៍ ប្រា​យុទ្ធ ច័ន្ទ​អូ​ឆា នាយករដ្ឋមន្ដ្រី​របស់​ប្រទេស​ថៃ បានបញ្ជាក់​ពី​ជំហរ​រដ្ឋាភិបាល​របស់​ខ្លួន​ថា នឹងមិន​អនុញ្ញាត​ឲ្យ​សម រង្ស៉ី ជាន់​ទឹកដី​ថៃ ដើម្បី​ធ្វើ​សកម្មភាព​ប្រឆាំង​រាជរដ្ឋាភិបាល​កម្ពុជា​នោះឡើយ ហើយ​ការសម្រេច​បែបនេះ ដោយសា​តែ​ក្នុងនាម​ជា​ប្រទេស​សមាជិក​អាស៊ាន​ដូចគ្នា​។​

​កាសែត​បាងកក​ប៉ុស្តិ៍​បាន​ដកស្រង់​សម្តី​លោក​ឧ​ត្ត​ម​សេនី​យ៏ ប្រា​យុទ្ធ ចាន់​អូ​ចា បាន​ថ្លែង​នៅក្នុង​សន្និសីទ​សារព័ត៌មាន​ថា តាម​ការប្តេជ្ញាចិត្ត​រប​ស់​ថៃ​ចំពោះ​អាស៊ាន ថៃ​នឹងមិន​ជ្រៀត​ជ្រែកចូល​កិច្ចការ​ផ្ទៃក្នុង​របស់​គ្នា​ទៅវិញទៅមក​នោះទេ ហើយ​យើង​ក៏​នឹងមិន​អនុញ្ញាតិ​ឲ្យ​ក្រុមប្រឆាំង នឹង​រដ្ឋាភិបាល​ណាមួយ​ប្រើប្រាស់​ប្រទេស​ថៃ​សម្រាប់​បម្រើ​សកម្មភាព​ផ្ទាល់ខ្លួន​នោះឡើយ ហើយ​លោកនាយក​រដ្ឋមន្ត្រី​ក៏បាន​បញ្ជា​ទៅកាន់​មន្ត្រី​របស់ខ្លួន​ផងដែរ​។​

ទោះជា​យ៉ាងណា រូបថត​ទណ្ឌិត សម រ​ង្ស៉ី និង​បក្ខពួក ដែលជា​អតីត​មេដឹកនាំ​អតីត​គណបក្ស​សង្គ្រោះ​ជាតិ​សរុប​ចំនួន​៩​នាក់ ដែល​រង​ការចោទប្រកាន់​ពី​តុលាការ​កម្ពុជា​ពីបទ “​ឧបឃាត​” នោះ ត្រូវបាន​ទាហាន​ឈុតខ្មៅ​របស់​ថៃ បាន​យកទៅ​បិទ​នៅ​ច្រកព្រំដែន ដើម្បី​ទប់ស្កាត់ និង​ចាប់ខ្លួន ប្រសិនបើ​ឃើញ​ពួកគេ​ទាំងនោះ​ឆ្លងកាត់​៕
កោះ​កែវ



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114