ព័ត៍មានទាន់​ហេតុការណ៏
Search

អ៊ុក សុធី ចង់​បង្ហាត់​យុវជន​នៅ​ភ្នំពេញ​ក្រោ​ន ក្រោយ​ប្រកាស​ព្យួរ​ស្បែកជើង​

ខ្សែបម្រើ​ជើងចាស់​របស់​ក្លិប​បាល់ទាត់​ភ្នំពេញ​ក្រោ​ន អ៊ុក សុធី ដែល​ទើបតែ​ប្រកាស​ព្យួរ​ស្បែកជើង​កាលពីពេល​ថ្មីៗ​នេះ បាន​បង្ហើប​ប្រាប់​ពី​មានបំណង​វិ​វ​ឌ្ឍ​ខ្លួន​ជា​គ្រូបង្វឹក​ដើម្បី​ជួយ​បណ្ដុះបណ្ដាល​ធនធាន​យុវជន​នៅ​កីឡដ្ឋាន​ស្មា​ត​អរ​អេស​អិន (Smart RSN) វិញ​ម្ដង​។ នេះ​បើ​យោងតាម​ការសន្ទនា​រវាង កីឡាករ​ជើងចាស់​រូបនេះ ជាមួយ​គេហទំព័រ​គណៈកម្មការ​ប្រកួត​បាល់ទាត់​ជាតិ​កម្ពុជា​។​

កីឡាករ​មាន​វិញ្ញាបនបត្រ​គ្រូបង្វឹក​កម្រិត B ពន្យល់ថា កត្តា​វ័យ និង​ការ​ថមថយ​កម្លាំង គឺជា​ហេតុផល​សំខាន់​ដែល​រូបគេ​សម្រេចចិត្ត​ព្យួរ​ស្បែក និង​ងាក​ទៅ​ផ្ដោតលើ​ការអភិវឌ្ឍ​យុវជន​នៅ​ឆ្នាំ​ថ្មី​ខាងមុខ​។​

អតីត​ខ្សែបម្រើ​ជាតិ​កម្ពុជា ទាំង​លើ​វាលស្មៅ​ធម្មជាតិ និង​ក្នុង​សាល​រូបនេះ​ពន្យល់​លម្អិត ជាមួយ​គេហទំព័រ cncc-football.com ថា​៖ «​អាយុ​កាន់តែច្រើន ហើយ​កម្លាំង​ក៏​ថយ​ជាង​មុន បើ​ខ្ញុំ​នៅ​លេង​ទៀត ក៏​មិនសូវ​ទៀងទាត់​ដែរ អ៊ីចឹង​មានតែ​ងាក​ទៅ​ជួយ​បង្ហាត់​យុវជន​វិញ​ល្អ​ជាង​។ ខ្ញុំ​បាន​ពិភាក្សា​ជាមួយ​ថ្នាក់ដឹកនាំ​ក្លិប​រួចរាល់​ហើយពី​គម្រោង​នាពេល​ខាងមុខនេះ ហើយ​ខ្ញុំ​ក៏​ចង់​បង្ហាត់​ក្មេងៗ​នៅ​ភ្នំពេញ​ក្រោ​ន​ដែរ​ក្រោយ​ចូលនិវត្តន៍​។​»

គួររំឭកថា អ៊ុក សុធី ដែល​ជាប់​ជម្រើសជាតិ​កម្ពុជា​ពី​ចន្លោះ ឆ្នាំ​២០១៤ ដល់​២០១៧ បាន​ចូលរួម​ជាមួយ​ភ្នំពេញ​ក្រោ​ន នៅ​ឆ្នាំ​២០១១ ហើយ​បាន​ដើរតួ​សំខាន់​មួយពេល​ឈ្នះ​ជើងឯក Metfone Cambodian រដូវ​កាល​២០១៤ និង​២០១៥ និង​ធ្លាប់ជួយ​ឲ្យ​ក្លិប​ឡើងទៅ​វគ្គ​ជម្រុះ​ជុំ​ចុងក្រោយ​ក្នុង​ពានរង្វាន់ AFC President Cup 2012​។ អ្វីដែល​គួរ​ឲ្យ​សោកស្ដាយ ឆ្នាំ​២០១៥ សុធី បាន​អវត្តមាន​ពី​ទីលាន​រយៈពេល​យូរ ដោយសារ​រងរបួស​ពេល​ហ្វឹកហាត់​ជាមួយ​ក្រុម​ជម្រើសជាតិ​កម្ពុជា​។

​សុធី បង្ហាញខ្លួន​បាន​ចំនួន​១២​លើក គ្រប់​ពានរង្វាន់​សម្រាប់​រដូវ​កាល​នេះ និង​រកបាន​២​គ្រាប់ ក្រៅពី​មាន​តួនាទី​ជា​កីឡាករ គេ​ក៏​ឆ្លៀត​បង្ហាត់​ក្រុមបាល់ទាត់​មិនមែន​អាជីព​មួយចំនួន​ដែរ​ដើម្បី​សម្រួច​បទពិសោធ​គ្រូបង្វឹក​។

ប្រធាន​ក្រុម​ថ្មី​រូបនេះ មានឈ្មោះ​ក្រៅ​ថា Messi ដែល​អ្នកគាំទ្រ​ហៅ​តាំងពី​លេង​នៅ​ក្រុមបាល់ទាត់​ម៉ូតូ​ហោះ និង​ក្រុម​ហ្វូ​ត​សាល​ជម្រើសជាតិ​នា អំឡុងពេល​យុវវ័យ​មកម្ល៉េះ៕
ម៉េង ហួរ



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114