ព័ត៍មានទាន់​ហេតុការណ៏
Search

​សម្តេច​តេ​ជោ ហ៊ុន សែន ប្រកាសជូន​ប្រជាពលរដ្ឋ​កុំ​ឲ្យ​មានការ​ព្រួយបារម្ភ​អំពី​បញ្ហា​អសន្តិសុខ​នៅ​ក្រុងភ្នំពេញ

​ភ្នំពេញ ៖ ប្រមុខ​រាជរដ្ឋាភិបាល​កម្ពុជា​សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​កម្ពុជា​ថ្លែងប្រាប់​ប្រជាពលរដ្ឋ​កុំ​ឲ្យ​មានការ​បារម្ភ​អំពី​សន្តិសុខ​នៅក្នុង​រាជធានី​ភ្នំពេញ ការ​ជ្រួលច្របល់​ណាមួយ វា​មិន​អាច​កើតមាន​ទេ ហើយ ហ៊ុន សែន ក៏​មិនមែន​ជា​អ្នក​ដែល​ត្រូវ​ឲ្យ​គេ​ចាប់​នោះដែរ​។ រាជរដ្ឋាភិបាល មាន​ច្បាប់​របស់​ខ្លួន​ដើម្បី​ចាប់​អ្នក​ដែល​ប្រព្រឹត្ត​ខុស​នេះ​មិនមែន​ជាការ​គំរាម​ទេ​តែ​ជា​ច្បាប់ទម្លាប់​។ កាល​ថ្លែង​របស់​សម្តេច​តេ​ជោ ហ៊ុន សែន ធ្វើ​ឡើងខណៈ ដែល​ប្រជាពលរដ្ឋ​មួយចំនួន​មានការ​ព្រួយបារម្ភ​អំពី​បញ្ហា​អសន្តិសុខ​នៅ​រាជធានី​ភ្នំពេញ​ហើយ​បាន​ហៅ​កូនចៅ​ដែល​កំពុងធ្វើការ​នៅ​ភ្នំពេញ​ឲ្យ​ត្រឡប់ទៅផ្ទះ​វិញ។

សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា​បាន​ថ្លែង​ធ្វើការ​អំពាវនាវ​នេះ​នា​ព្រឹក​ថ្ងៃទី ៧ ខែ វិច្ឆិកា នៅក្នុង​ពិធី​ប្រកាស​ដាក់​ឲ្យ​ប្រើ​«​ផែនការ​យុទ្ធសាស្ដ្រ អភិវឌ្ឍន៍​ជាតិ (​ផ​.​យ​.​អ​.​ជ​.) ២០១៩-២០២៣»​នៅ​ព្រឹក​ថ្ងៃទី ៧ ខែវិច្ឆិកា​នេះ​នៅ​រាជធានី​ភ្នំពេញ​។

​សម្តេច​តេ​ជោ​មានប្រសាសន៍ថា ប៉ុន្មាន​ថ្ងៃនេះ​មាន​កង្វល់​ពី​សំណាក់​មាតាបិតា​ចំពោះ​កូន​ជា​កម្មករ​នៅ​ភ្នំពេញ​ក៏​មាន​មួយ​ចំនួន​បាន​ហៅ​ឲ្យ​កូន​ត្រឡប់​ទៅ ផ្ទះ​ព្រោះ​ខ្លាច​មាន​បញ្ហា​អសន្តិសុខ​នៅ​ភ្នំពេញ​។ សម្តេច​បាន​ធ្វើ​ការ​បញ្ជា​ក់ថា​វា​គ្មាន​អ្នកណា​មក​វ៉ៃ​គ្នា​នៅ​កណ្ដាល​ទីក្រុង​ភ្នំពេញ​ទេ​។ ​អ្នក​ត្រូវធ្វើ​សកម្មភាព​គឺ​គេ​ធ្វើ​សកម្មភាព​ចំពោះតែ​មុខសញ្ញា ៩ នាក់​តែប៉ុណ្ណោះ​យ៉ាង​ច្រើន។ ប៉ុន្តែ​អា​៩​នាក់​នឹង​វា​មិន​មក​ទេ​សូម​កុំ​ឆ្ងល់​ពេក​…​។

​សម្តេច​តេ​ជោ​នាយករដ្ឋមន្ត្រី​មានប្រសាសន៍ថា «​សុំ​កុំ​ឲ្យ​មានការ​បារម្ភ​អំពី​សន្តិសុខ​នៅក្នុង​ទីក្រុង​ភ្នំពេញ​ការ​ជ្រួលច្របល់​ណាមួយ​វា​មិន​អាច​កើតមាន​ទេ ហើយ​ហ៊ុនសែន​ក៏​មិនមែន​ជា​អ្នក​ដែល​ត្រូវ​ឲ្យ​គេ​ចាប់​នោះ​ដែរ។ អ្នកណា​ចាប់​អ្នកណា រាជរដ្ឋាភិបាល​មាន​ច្បាប់​របស់​ខ្លួន​ដើម្បី​ចាប់​អ្នក​ដែល​ប្រព្រឹត្ត​ខុស អញ្ចឹង​យើង​អត់​មានការ​គំរាម​ទៅជា​មួយ​អ្នកណា​ទេ​តែ​ជា​រឿង​ច្បាប់ទម្លាប់​»​។

សម្តេច​តេ​ជោ​មាន​ប្រសា​ស​ន៍​ថា ប៉ុន្មាន​ថ្ងៃនេះ​មាន​កង្វល់​ពី​សំណាក់​មាតាបិតា​ចំពោះ​កូន​ជា​កម្មករ​នៅ​ភ្នំពេញ​ក៏​មាន​មួយចំនួន​បាន​ហៅ​ឲ្យ​កូន​ត្រឡប់​ទៅ ផ្ទះ​ព្រោះ​ខ្លាច​មាន​បញ្ហា​អសន្តិសុខ​នៅ​ភ្នំពេញ​។ សម្តេច​បានធ្វើ​ការបញ្ជា​ក់ថា​វា​គ្មាន​អ្នកណា​មក​វ៉ៃ​គ្នា​នៅ​កណ្ដាល​ទីក្រុង​ភ្នំពេញ​ទេ​។​ អ្នក​ត្រូវធ្វើ​សកម្មភាព​គឺ​គេ​ធ្វើ​សកម្មភាព​ចំពោះតែ​មុខសញ្ញា ៩ នាក់​តែប៉ុណ្ណោះ​យ៉ាងច្រើន ។ ប៉ុន្តែ​អា​៩​នាក់​នឹង​វា​មិន​មក​ទេ​សូមកុំ​ឆ្ងល់​ពេក​…​។

​សម្តេច​តេ​ជោ​នាយករដ្ឋមន្ត្រី​មានប្រសាសន៍ថា «​ឥឡូវ​គាត់​ពន្យារ​សំបុត្រ​យន្តហោះ​ចេញពី​ប៉ារីស​មក​ថ្ងៃទី ៩ ឯណោះ​មិនមែន​មក​ថ្ងៃ​ទី​៧​ឆ្លងកាត់​ថៃ​ថ្ងៃ​ទី៨ ហើយ​មក​ស្រុក​ខ្មែរ​ថ្ងៃ​ទី​៩​ទេ​ហើយ​មិន​ប្រាកដ​ថា ​ចេញពី​ប៉ារីស​ទេ​»​។

សម្តេច​តេ​ជោ​នាយករដ្ឋមន្ត្រី​ក៏បាន​អរគុណ​ចំពោះ​កិច្ចសហការ​របស់​ប្រទេស​ឥណ្ឌូនេស៊ី​,​ម៉ាឡេស៊ី​និង​ជាពិសេស​​ប្រទេស​ថៃ​ដែល​លោក ប្រា​យុទ្ធ ចាន់​អូ​ឆា នាយករដ្ឋមន្ត្រី​បាន​ចេញ​មក​ថ្លែង​កាលពី​ម្សិលមិញ​។ សម្តេច​បាន​បន្ត​ឲ្យ​ដឹង​ទៀតថា ក្នុងអំឡុងពេល​ប្រជុំ​អាស៊ាន​នៅ​ទីក្រុង​បាងកក សម្តេច​បាន ធ្វើការ​ជាមួយ​ដៃគូ​ទាំងអស់​នៅ​ក្នុង​អាស៊ាន​ដែលជា​ផ្នែក​មួយ​ដ៏​សំខាន់​ក្នុង​ការ​ចូលរួមចំណែក​ដល់​ស្ថិរភាព​របស់​ប្រទេស​កម្ពុជា។ សម្តេច​បន្ត​ថា ​ជាក់ស្តែង នៅ​ម៉ាឡេស៊ី និង ឥណ្ឌូនេស៊ី យប់មិញ​នេះ​កាន់​ប៉ាស្ព័រ​អាមេរិក​ទេ​តែ​គេ​បណ្តេញ​ចេញពី​ស្រុក​គេ។ ប្រទេស​នៅ​ក្របខ័ណ្ឌ​អាស៊ាន​ជាមួយគ្នា​មាន​កិច្ច​សហការ​គ្នា ដោយ​មិន​ជ្រៀត​ជ្រែក​ចូល​កិច្ចការ​ផ្ទៃក្នុង​ប្រទេស​ផង​គ្នា​នោះទេ។ សម្តេច​បន្តថា មាន​ប្រទេស​មួយ​ចំនួន​ទៀត​នៅ​ក្រៅ​តំបន់​អាស៊ាន​ក៏​គេ​មិន​ឲ្យ​ចូល ប្រទេស​គេ​នោះដែរ​ព្រោះ​គេ​យល់។

សម្តេច​បាន​បន្ត​ថា សម្តេច​តែង​ប្រាប់​មិត្ត​បរទេស​ឲ្យ​បកប្រែ​អា​សំដី​ដែល​គេ​និយាយ​ឲ្យ​ចេញ​ទៅជា​ភាសា ដែល​អ្នកឯង​ស្តាប់​បាន​មើល​បាន ព្រោះ​ពេល​ដែល​គេ​និយាយ​ជា​អង់គ្លេស​វា​ផ្សេង និង និយាយ​ជា​ខ្មែរ​គឺមាន​ន័យ​ផ្សេង ដល់ពេល​គេ​ធ្វើតាម​គេ​មើល​ទៅ​គឺ វា​ពិតជា​ហួស​ពី​កម្រិត​នៃ​ការ​ទាមទារ​សិទ្ធិ និង ប្រជាធិបតេយ្យ គេ​ក៏​មិន​គាំទ្រ​។

គួរ​បញ្ជាក់​ថា នគរបាល​អន្តោប្រវេសន៍​ម៉ាឡេស៊ី​បាន​ឃាត់ខ្លួន​អ្នកស្រី មូរ សុខ​ហួរ នៅក្នុង​ទឹកដី​ម៉ាឡេស៊ី​។ នេះ​បើ​តាម​ការចុះផ្សាយ​របស់​សារ​ព័ត​មាន Reuters នៅ​ថ្ងៃទី​៧ ខែវិច្ឆិកា​ឆ្នាំ​២០១៩​នេះ​។ នៅ​យប់​ថ្ងៃទី ៦ ខែវិច្ឆិកា អ្នកស្រី មូរ សុខ​ហួរ បាន​ហោះ​ចេញពី​ឥណ្ឌូណេស៊ី​ទៅកាន់​ម៉ាឡេស៊ី​។

ក្នុង​អំឡុង អ្នកស្រី​ស្ថិតនៅ​ឥណ្ឌូណេស៊ី​ស្ថាន​ទូត​កម្ពុជា​នៅ​ទីនោះ​បាន​ស្នើ​ឲ្យ​អាជ្ញាធរ​ឥណ្ឌូណេស៊ី​ចាប់ខ្លួន​អ្នកស្រី​អាជ្ញាធរ​ឥណ្ឌូណេស៊ី​បាន​បណ្តេញ​អ្នកស្រី មូរ សុខ​ហួរ ចេញពី​ប្រទេស​។ រហូត​ទៅដល់​ម៉ាឡេស៊ី​ក៏មាន​ព័ត៌មាន​ថា ម៉ាឡេស៊ី មិន​អនុញ្ញាត​ឲ្យ​អ្នកស្រី​ចូល​និង​រហូត​មាន​ព័ត៌មាន​ថា​អ្នកស្រី​ត្រូវ​ឃាត់ខ្លួន​នៅ​ថ្ងៃ ទី​៧​ខែវិច្ឆិកា​នេះ​។​ដោយឡែក​សារព័ត៌មាន​បាងកក​ប៉ុ​ស្តិ៍​បាន​ផ្សាយ​អត្ថបទ​មួយ​នា​រសៀល​ថ្ងៃទី ៦ ខែវិច្ឆិកា​នេះ​ដោយ​បាន​ដកស្រង់​ការអះអាង​របស់​លោក នាយករដ្ឋមន្ត្រី​ថៃ ប្រា​យុទ្ធ ច័ន្ទ​អូ​ចា ដែលថា​លោក​សម រង្ស៊ី មិនអាច​ជាន់ទឹក​ដី​ថៃ​ដើម្បី​ឆ្លង​ចូល​ប្រទេស​កម្ពុជា​នោះឡើយ​។ លោកនាយក​រដ្ឋមន្ត្រី ប្រា​យុទ្ធ ច័ន្ទ​អូ​ចា នៅក្នុង​សន្និសីទកាសែត​មួយនា​ព្រឹក​ថ្ងៃទី​៦ ខែវិច្ឆិកា​នេះ​ថា «​យើង​នឹងមិន​អនុញ្ញាត​ឲ្យ​ជន​ប្រឆាំង​រដ្ឋាភិបាល​ណាមួយ​ប្រើប្រាស់​ទឹកដី​ថៃ​ដើម្បី​ធ្វើ​ចលនា​នយោបាយ​ឡើយ​។ ខ្ញុំ​បានដាក់​បទបញ្ជា​ហើយ​ដូច្នេះ​គាត់​មិន​អាច​ចូលមក​បានទេ»​។

ជា​មួយនេះ​សម្តេច​តេ​ជោ ហ៊ុន សែន ក៏បាន​អំពាវនាវ​ឲ្យ​អ្នកគាំទ្រ​បក្ស​ប្រឆាំង​មួយចំនួន​ដែលកំពុង​លាក់ខ្លួន​នៅ​ក្នុង​ព្រៃ​ដូចជា​នៅ​ភ្នំ​ក្រវ៉ា​ញ​ជាដើម​បើ​ដឹង​ថា ខុស​ឆាប់​ចេញ​មក​សារភាព​និង​ចូលរួម​លេង​កំសាន្ត​ក្នុង​បុណ្យអុំទូក​ទៅ ​ព្រោះ​បើ​មិន​ធ្វើ​សកម្មភាព​អ្វី​ទេ​គេ​មិន​ធ្វើ​អីយើង​ដែរ​។ សម្តេច​បាន​បន្ត​ថា ការ​ចាប់ខ្លួន​នេះ​ ដោយសារតែ​អ្នកឯង​បាន​ដើរ​ហួស​ពី​សិទ្ធិ​បញ្ចេញមតិ ហួស​បន្ទាត់​ក្រហម​ហើយ​អ្នក​ដែល​ចូលរួម​ត្រូវតែ​មានទោស​ដូច្នេះ​សុំ​ចេញ​សារភាព​ឲ្យ​ត្រង់​មក​។ បើ​មិន​ចេញ​ទេ​គឺ​តាម​ដល់​ត្រង់ណា​ចាប់​យក​នៅត្រង់​នោះ​តែម្ដង​។ សម្តេច​ជោ​បន្ត​ថា ​អ្នក​ទាំងឡាយ​ណា​ដែល​ជាប់​ពាក់ព័ន្ធ​ហើយ​មាន​ក្នុង​បញ្ជី​រួចហើយ អ្នកឯង​មិន​អាច​ទៅណា​រួច​ទេ​ប្រសិនជា​នៅ​លាក់ខ្លួន​ទៀត​នឹងត្រូវ​ចាប់ខ្លួន​ប៉ុន្តែ​បើ​អ្នកឯង​ចេញ​មក​សារភាព​យើង​នឹង​សណ្ដោសប្រណី​ដោយសារ​អ្នកឯង បាន​បោះបង់ចោល​នូវ​ផែនការ​ក្បត់​,​ផែនការ​ផ្ដួល​រលំ​រាជរដ្ឋាភិបាល​។ ដូចនេះ​វា​ជា​រឿង​មួយ​មិត្ត​ភ័​ក្កិ​បរទេស​សុំ​យោគយល់​ចំពោះ​កម្ពុជា ​ព្រោះ​កម្ពុជា​គ្មាន​ជម្រើស​ណា​ក្រៅពី​ការពារ​ជីវិត​របស់​ប្រជាជន​នៅ​ក្នុង​សុខ​សន្តិភាព​មួយ​ដែល​មិន​ត្រូវ​ឲ្យ​បំផ្លាញ​ដោយសារ​ក្រុម​មនុស្ស​មួយក្រុម​តូច​នោះឡើយ​។

សម្តេច​តេ​ជោ​បន្ត​ថា រាជរដ្ឋាភិបាល​មួយ​ដែល​មាន​រចនាសម្ព័ន្ធ​ពីលើ​ដល់​ក្រោម​មាន​កម្លាំង​ប្រដាប់អាវុធ​តើ​គេ​អាច​ធ្វើ​ឲ្យ​ដួល​បានទេ។​ សម្តេច​តេ​ជោ​បន្ត​ថា អ្នក​មិន​យល់​គឺ​នៅតែ​មិន​យល់​ទេ។ ប៉ុន្តែ​អ្នកឯង​មុខសញ្ញា​ត្រូវ​មាន​រហូត​បើ​អ្នកឯង​មិន​ចេញ​មក​សារភាព​ទេនោះ គឺ​រដ្ឋាភិបាល​នឹង​បន្ត​ចាប់ខ្លួន​វា​មិន​ចប់​ថ្ងៃ ត្រឹម​ថ្ងៃ​ទី៩ វិច្ឆិកា​ទេ​គឺ​វា​នៅតែ​ត​ភាគ​បើ​អា​ឆ្កែ​មួយ​ក្បាល​នោះ​មិន​ព្រម​ប្រកាស​បញ្ចប់​នោះ​ យើង​ក៏​នៅតែ​បន្ត​ហើយ​អ្នក​ដែល​រងគ្រោះ​គឺ​អ្នក​ដែល​គាំទ្រ​។

សម្តេច​បន្ត​ថា អា​អ្នក​នៅ​ក្រៅ​ប្រទេស​វា​មិន​ជួប​បញ្ហា​ទេ​ តែ​អា​អ្នក​នៅក្នុង​ប្រទេស​ត្រូវ​ចាប់ខ្លួន​និង​ត្រូវ​ជាប់គុក​ដូចនេះ​យក​ល្អ​ចេញ​មកលេង​បុណ្យអុំទូក​ជា មួយ​គ្នា​ទៅ​បើ​មិន​ចេះ​អុំទូក​ទេ​មក​សុំ​ហាត់​ធ្វើជា​អ្នក​អុំទូក​ជាមួយ​គេ​ទៅ​បាន​វា​ស្រួល​និង​ចូលរួម​អកអំបុក​៩​វិច្ឆិកា​ក្រោម​ពាក្យស្លោក​អំបុក​ខ្មែរ​ថែ​ជាតិ សាសនា ព្រះមហាក្សត្រ។ ឯ​ការប្រកាស​ចាប់ខ្លួន ហ៊ុន សែន តែ ហ៊ុន សែន ប្រកាស​ស៊ី​អំបុក​។

ជា​មួយ​នេះ​ដែរ សម្តេច​ក៏បាន​ថ្លែង​ទៅកាន់​មិត្តភក្តិ​បរទេស​សុំ​ឲ្យ​យល់​ពី​ស្ថានភាព​របស់​កម្ពុជា​ព្រោះ​កម្ពុជា​ត្រូវ​គ្រប់គ្រង​សភាពការណ៍​មួយ​ចាំបាច់​គឺ​រក្សា​ឲ្យ នូវ​ស្ថិរភាព​និង​សន្តិភាព ។​ពីព្រោះ​កម្ពុជា​ធ្លាប់​បានទទួល​ការឈឺចាប់​វា​រាប់​ភ្លេច​រាប់មិនអស់​ទៅ​ហើយ​ច្រើនពេក​ហើយ​ដែល​ប្រជាជន​កម្ពុជា​ទទួលរង​នូវ​ការ​ឈឺចាប់​ ដោយសារតែ​អា​ពាក្យ​ប្រជាធិបតេយ្យ​និង​សិទ្ធិមនុស្ស​បន្ទាប់មក​គឺ​ការ​ផ្ដួលរំលំ​ដែល​ធ្វើ​ឲ្យ​ប្រជាជន​កម្ពុជា​ស្លាប់​រាប់លាន​នាក់ ​ឥឡូវ​យើង​មិន​អាច​ជឿ ទៅលើ​អ្វី​ដែល​ជា​ពាក្យ​គ្រាន់តែ​និយាយ​ប្រជាធិបតេយ្យ​និង​សិទ្ធិមនុស្ស​នោះទេ​។ សិទ្ធិមនុស្ស​ពិតប្រាកដ​គឺ​សិទ្ធិ​រស់រាន​មាន​ជីវិត​ដែល​មិន​ត្រូវ​ទទួល​ការ​គំ​រាម​កំហែង ​ដោយ​ការ​ស្លាប់​ឬ​ត្រូវរបួស​ដោយ​សង្គ្រាម​នោះ​ទេ​។

ខ្ញុំ​មិន​ទុក​ឲ្យ​ប្រជាជន​កម្ពុជា​របស់ខ្ញុំ​ទទួលរង​នូវ​វិនាសកម្ម​ព្រាត់ប្រាស​ដូច​អតីតកាល​ទៀត​នោះ ទេ​។ ទម្រាំ​រក​បាន​សន្តិភាព​យើង​ត្រូវ​ចំណាយ​សាច់ឈាម​ដើម្បី​ធានា​ឲ្យ​កម្ពុ​ជាមួយ​មានការ​ឯកភាព​ទឹកដី​លើកដំបូង​នៅ​ក្នុង​ប្រវត្តិសាស្ត្រ​បើ​មិន​និយាយ​ដល់ ៥០០​ឆ្នាំ​ទេ​និយាយ​ត្រឹម​១០០​ឆ្នាំ​បន្ទាប់ពី​បារាំង​បាន​ចូល​មក​ដាក់​អាណានិគម​នៅ​កម្ពុជា​ទឹកដី​កម្ពុជា​តែងតែមាន​ការបែងចែក​ក្រុម​ប្រដាប់​អាវុធ​ច្រើន​ក្រុម​យើងខ្ញុំ​បាន​យក​ជីវិត​ធ្វើ​ដើមទុន​ដើម្បី​ធានា​ឲ្យ​ជាតិ​មួយ​នេះ​មាន​ឯកភាព​ជាតិ ។ ដូច្នេះ​ដោយ​តម្លៃ​ណាក៏ដោយ​ខ្ញុំ​ត្រូវធ្វើ​សកម្មភាព​ទប់ស្កាត់​ឲ្យ​ខាង​តែ​បាន​។ យើងខ្ញុំ​គោរព​ដំណើរការ​ប្រជាធិបតេយ្យ​យើងខ្ញុំ​នឹង​ផ្ដល់​សិទ្ធិ​ឲ្យ​អ្នកណា​ដែល​ឈ្នះ​ឆ្នោត​ដោយ​ប្រជាធិបតេយ្យ​មិនមែន​មក​ដណ្ដើម​អំណាច​ប្រកាស​ចាប់ខ្លួន​ហ៊ុនសែន​នៅ​ថ្ងៃទី​៩​វិច្ឆិកា​នោះទេ​។ សម្តេច​តេ​ជោ​បន្ត​ទៀត​ថា​ចាំ​មើល​ថ្ងៃទី​៩​វិច្ឆិកា អា​មួយ​នេះ​វា​នៅ​ប៉ារីស​តើ​មក​ចាប់ ហ៊ុន សែន នៅ​ភ្នំពេញ​បែប​ណា​។ វា​ដូចជា​ឆ្ងល់​វា​ដូចជា​កម្លាំង​នោះ​វា​ច្រើន​ហួស​ប្រសិនជា​ចឹ​ង​មែន ហ៊ុន សែន មិន​អាច​នឹង​ដើរ​ធ្វើការ​បានទេ​។ សម្តេច​បន្តទៀត​ថា ប្រជុំ​អាស៊ាន​មិន​មាន​អ្នក​ណាមួយ​លើក​មក​និយាយ​អំពី​បញ្ហា​ទាក់ទង​នឹង​កម្ពុជា​នោះទេ​។ ​ទាំង​ក្នុង​ក្របខ័ណ្ឌ​អាស៊ាន​ទាំង​ដៃគូ​អាស៊ាន​និង​អាស៊ី​បូព៌ា​គឺ​មិន​មាន​ទេ​៕
ណា​រី



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114