ព័ត៌មានអន្ដរជាតិ
ដំណឹងល្អ! ថ្នាំព្យាបាលជំងឺមហារីក តម្លៃត្រឹម ១ដុល្លារ ជិតដាក់លក់លើទីផ្សារហើយ
បន្ទាប់ពីការស្រាវជ្រាវអស់រយៈពេលមួយទសវត្សរ៍ វិទ្យាស្ថាន TATA នៅទីក្រុង បុមបៃ ប្រទេសឥណ្ឌា បានផលិតថ្នាំគ្រាប់ ដែលអាចព្យាបាលជំងឺមហារីក ហើយប្រសិនវាទទួលបានភ្លើងខៀវមែន ថ្នាំនេះនឹងត្រូវដាក់លក់លើទីផ្សារនៅខែមិថុនាឬកក្កដា ក្នុងតម្លៃមួយគ្រាប់ត្រឹម១ដុល្លារប៉ុណ្ណោះ។
តាមសេចក្តីរាយការណ៍របស់កាសែត Economic Times, ថ្នាំឈ្មោះ “R+Cu” នេះ មានផ្ទុកសារធាតុប្រឆាំងអុកស៊ីតកម្មដូចជា រ៉េសវេរ៉ាត្រុលនិងទង់ដែង ដែលអាចបង្កើត “រ៉ាឌីកាល់អុកស៊ីសែន” ប្រឆាំងមហារីក។ ថ្នាំនេះមានសមត្ថភាពការពារកោសិកាងាប់ក្នុងខ្លួនមនុស្ស មិនឲ្យប្រែក្លាយមនុស្សមានសុខភាពល្អ ទៅជាអ្នកកើតមហារីក ហើយរារាំងចលនានៃកោសិកាមហារីក មិនឲ្យរាលដាលពីផ្នែកមួយទៅផ្នែកមួយទៀតនៃរាងកាយ ដែលគេស្គាល់ថា “Metastasis”។
ក្រុមអ្នកស្រាវជ្រាវបញ្ជាក់ថា ថ្នាំនេះអាចមានប្រសិទ្ធភាពក្នុងការព្យាបាលមហារីកលំពែង សួត និងមាត់ ហើយវាកំពុងរង់ចាំការយល់ព្រមពីអាជ្ញាធរសុវត្ថិភាពចំណីអាហារ និងស្តង់ដារឥណ្ឌា (FSSAI) មុនដាក់លក់លើទីផ្សារ។
ក្នុងបទសម្ភាសជាមួយ NDTV លោកវេជ្ជបណ្ឌិត Rajendra Badve មកពីមន្ទីរពេទ្យ Tata Memorial និយាយថា “យើងបានធ្វើតេស្តរកផលប៉ះពាល់លើសត្វកណ្តុរនិងមនុស្ស ប៉ុន្តែការធ្វើតេស្តបង្ការ គឺយើងធ្វើឡើងតែលើសត្វកណ្តុរប៉ុណ្ណោះ។ យ៉ាងណា យើងនៅតែបន្តចំណាយពេលប្រហែល៥ឆ្នាំទៀត ដើម្បីបញ្ចប់ការសាកល្បងរឿងនេះលើមនុស្ស។ មានបញ្ហាប្រឈមក្នុងអំឡុងពេលស្រាវជ្រាវ ប៉ុន្តែនៅទីបំផុត យើងទទួលបានជោគជ័យយ៉ាងធំធេង”។
មជ្ឈមណ្ឌល Tata Memorial Center គឺស្ថិតក្នុងចំណោមកន្លែងស្រាវជ្រាវជំងឺមហារីកមានវ័យចំណាស់ជាងគេ និងធំជាងគេលើពិភពលោក ហើយទទួលបានមូលនិធិនិងគ្រប់គ្រងដោយនាយកដ្ឋានថាមពលអាតូមិករបស់ប្រទេសឥណ្ឌា។
ក្នុងនាមជាប្រទេសមានប្រជាជនច្រើនជាងគេលើពិភពលោក ឥណ្ឌាមានអត្រាមហារីកខ្ពស់បំផុតនៅអាស៊ី ហើយជំងឺនេះត្រូវបានគេមើលឃើញថា ជាមូលហេតុចម្បងនៃក្តីបារម្ភរបស់រដ្ឋាភិបាល។ ករណីជំងឺមហារីកនៅក្នុងប្រទេសឥណ្ឌា ត្រូវគេព្យាករថានឹងកើនឡើងពី ១.៤៦លាននាក់ក្នុងឆ្នាំ២០២២ ដល់១.៥៧លាននាក់ក្នុងឆ្នាំ២០២៥។
ដំណឹងល្អនេះកើតឡើងកន្លះខែ បន្ទាប់ពីប្រធានាធិបតីរុស្ស៊ីលោក វ្ល៉ាឌីមៀរ ពូទីន ប្រកាសថា អ្នកវិទ្យាសាស្ត្ររបស់ខ្លួន កំពុងធ្វើការលើវ៉ាក់សាំងប្រឆាំងជំងឺមហារីក និងថ្នាំលេបជំនាន់ថ្មី ដែលពេលនេះជិតផលិតបានហើយ។
តាមការបញ្ជាក់ពីលោកពូទីន, រុស្ស៊ីជិតបង្កើតបាននូវអ្វីដែលគេហៅថា វ៉ាក់សាំងប្រឆាំងនឹងជំងឺមហារីក onco-vaccine និងថ្នាំ immunomodulatory ជំនាន់ថ្មី ហើយក្នុងពេលឆាប់ៗនេះ វានឹងត្រូវបានប្រើយ៉ាងមានប្រសិទ្ធភាពជាវិធីព្យាបាលមនុស្សទូទៅ៕
អត្ថបទ៖ សុខ សុវណ្ណ
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង