BREAKING NEWS
Search

ក្រុមហ៊ុនRoyal Group​ និង​ក្រុមហ៊ុន​ចែកចាយ​ទីផ្សារ​ឈានមុខ​គេ​លំដាប់​ពិភពលោក EMART​ ចុះ​អនុស្សរណៈ​យោគយល់​ ​

ភ្នំពេញ​ ៖​ ក្រុមហ៊ុន Royal Group តំណាង​ដោយ​អ្នកឧកញ៉ា គិត ម៉េង ប្រធាន​ក្រុមហ៊ុន​រ៉ូយ៉ាល់​គ្រុប និង​ក្រុមហ៊ុន​ចែកចាយ​ទីផ្សារ​ឈានមុខ​គេ​លំដាប់​ពិភពលោក EMART ដែលជា​បុត្រ​សម្ព័ន្ធ​ក្រុមហ៊ុន Shinsegac Group នៃ​សាធារណរដ្ឋ​កូរ៉េ ចុះ​អនុស្សរណៈ​យោគយល់ ដើម្បី​វឌ្ឍនភាព​ថ្មី នៃ​ទំនាក់ទំនង​សេដ្ឋកិច្ច រវាង​ព្រះរាជាណាចក្រ​កម្ពុជា និង​សាធារណរដ្ឋ​កូរ៉េ​។​

ពិធីនោះ​មានការ​ចូលរួម​ពី លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម កាលពី​រសៀល​ថ្ងៃទី​២៨ ខែកក្កដា ឆ្នាំ​២០១៧ ។ លោក ប៉ាន សូរ​ស័ក្តិ រដ្ឋមន្ត្រីក្រសួង​ពាណិជ្ជកម្ម បាន​មានប្រសាសន៍​សម្តែង​នូវ​សេចក្ដីសោមនស្ស​រីករាយ ដែល​បាន​ចូលរួម​ក្នុង​ពិធី​ចុះ​អនុស្សរណៈ​យោគយល់ រវាង​ក្រុមហ៊ុន​ចែកចាយ​ទីផ្សារ​ឈានមុខ​គេ លំដាប់​ពិភពលោក EMART ដែលជា​បុត្រ​សម្ព័ន្ធ​ក្រុមហ៊ុន Shinsegac Group នៃ​សាធារណរដ្ឋ​កូរ៉េ និង​ក្រុមហ៊ុន​សាជីវកម្ម Royal Group ដ៏​ធំជាងគេ​របស់​កម្ពុជា​។

អនុស្សរណៈ​យោគយល់​នេះ តំណាង​ឲ្យ​វឌ្ឍនភាព​ថ្មី នៃ​ទំនាក់ទំនង​សេដ្ឋកិច្ច រវាង​ព្រះរាជាណាចក្រ​កម្ពុជា និង​សាធារណរដ្ឋ​កូរ៉េ​។​

លោក​រដ្ឋមន្ត្រី បាន​បន្តថា​ទៀតថា ក្នុង​រយៈពេល​ជាង ២​ទសវត្ស​កន្លងមកនេះ កម្ពុជា​បាន​រីករាយ​ជាមួយ​ផ្លែផ្កា​នៃ​កំណើនសេដ្ឋកិច្ច ដែល​សម្រេចបាន​ក្នុង​រង្វង់ ៧% ជា​រៀងរាល់ឆ្នាំ​។ លទ្ធផល​ដ៏​គាប់ប្រសើរ​នេះ កើតចេញពី​ការដឹកនាំ​ប្រកបដោយ​ភាពឈ្លាសវៃ និង​សមត្ថភាព​ខ្ពង់ខ្ពស់​របស់ សម្តេច​អគ្គមហាសេនាបតី​តេ​ជា ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ដែល​បាន​ដាក់ចេញ​នូវ​កម្មវិធី​កំណែទម្រង់ សំដៅ​លើកស្ទួយ​ស្ថិរភាព​ពាណិជ្ជកម្ម និង​វិនិយោគ ព្រមទាំង​យុទ្ធសាស្ត្រ​កាត់បន្ថយ​ភាពក្រីក្រ ដែល​អនុញ្ញាត​ឲ្យ​ប្រជាពលរដ្ឋ ទទួលបាន​អត្ថប្រយោជន៍​ពី​កម្មវិធី​កំណែទម្រង់​។​

តាមរយៈ​វឌ្ឍនភាព​សេដ្ឋកិច្ច​កម្រិត​នេះ បានផ្តល់​ឱកាស​ដល់​ប្រជាជន​កម្ពុជា ក្នុងការ​ទទួលបាន​ផលិតផល និង​សេវាកម្ម​ស្ទើរ​គ្រប់​ប្រភេទ រួមទាំង​បទពិសោធន៍​នៃ​ការទិញ​ទំនិញ​ថ្មី ដែល​ក្រុមហ៊ុន EMART នឹង​ផ្តល់ជូន​អតិថិជន​កម្ពុជា​ទូទាំងប្រទេស​។​ លោក​រដ្ឋមន្ត្រី បាន​កោតសរសើរ​ចំពោះ​ក្រុមហ៊ុន EMART ដែល​សម្រេច​បានកំណត់​ត្រា​ប្រសើរ​បំផុត ក្នុងការ​បំពេញ​ប្រតិបត្តិការ​របស់ខ្លួន ចាប់តាំងពី​ឆ្នាំ​១៩៩០ និង​មាន​ជំនឿ​យ៉ាង​មុតមាំ​ថា ជាមួយនឹង​បទពិសោធន៍​រឹងមាំ ក្នុងការ​ចែកចាយ និង​ធ្វើ​ទីផ្សារ​របស់ ក្រុមហ៊ុន EMART ព្រមទាំង​ការដឹកនាំ​ក្នុង​វិស័យ​ជាច្រើន​របស់ Royal Group ការចាប់​ដៃគូ​រវាង​ក្រុមហ៊ុន​ទាំងពីរ នឹង​ផ្តល់​អត្ថប្រយោជន៍​ពិតប្រាកដ​ចំពោះ​ទីផ្សារ​កម្ពុជា តាមរយៈ​ការនាំមក​នូវ​បទពិសោធន៍ ជំនាញ បណ្តាញ​ទីផ្សារ​ទំនើប និង​កម្រិត​ខ្ពស់​បែប​ច្នៃប្រឌិត ព្រមទាំង​ឱកាស​ការងារ​ដ៏​សម្បូរបែប ដែល​នឹង​រួមចំណែក​ដល់​ការអភិវឌ្ឍ​កំណើនសេដ្ឋកិច្ច​។​ លោក​រដ្ឋមន្ត្រី បាន​ជូនពរ​ឲ្យ​ទទួលបាន​ផ្លែផ្កា​នៅក្នុង​កិច្ចសហការ​នេះ ព្រមទាំង​មាន​ភាពជោគជ័យ ក្នុងការ​បណ្ដាក់​ទុនវិនិយោគ​រួមគ្នា​របស់​ក្រុមហ៊ុន​ទាំងពីរ​៕​



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684