BREAKING NEWS
Search

លោកស្រី Suwanna Gauntlett ប្រឈម​នឹង​បណ្តឹង​៤​ករណី បើ​មិន​សុំទោស​ជា​សាធារណៈ

​ភ្នំពេញ ​៖ កញ្ញា ធី សុវណ្ណ​ថា ប្រធាន​យុវជន​កិច្ចការ​សង្គម​របស់​គ​ណ​បក្ស​ប្រជាជន​កម្ពុជា បានអះអាងថា លោកស្រី Suwanna Gauntlett នាយក​ប្រតិបត្តិ​អង្គការ Wildlife Alliance បាន​បង្កើតបទល្មើស​មួយ​ថែមទៀត​ហើយ គឺ “​បរិហារកេរ្តិ៍​” ទាក់ទង​ការសង់​បង្គន់​អនាម័យ​ជូន​អ្នកភូមិតំបន់​អា​រ៉ែ​ង ខេត្តកោះកុង ហើយ​បើ​មិន​សុំទោស​ជា​សាធារណៈ​ទេ លោកស្រី​នឹង​ប្រឈម​៤ករណី​។

​កញ្ញា ធី សុវណ្ណ​ថា បញ្ជាក់​បែបនេះនៅលើ​បណ្តាញ​សង្គម​ផ្លូវការ​របស់ខ្លួន កាលពី​យប់​ថ្ងៃទី​២៦ ខែមករា ឆ្នាំ​២០១៨ និង​បន្ទាប់ពី​បាន​ព្រមាន​ប្តឹង​លោកស្រី Suwanna Gauntlett ពីបទ “​រើសអើង​” តាមមាត្រា​ ២៦៥ ទាមទារ​ចំណង​ជំងឺ​ចិត្ត​១០​ម៉ឺន​ដុល្លារ ដោយសារ​តែ​នាយក​ប្រតិបត្តិ​អង្គការ​នោះធ្វើឲ្យ​ប៉ះពាល់​ធ្ងន់ធ្ងរ​លើ​កិត្តិយស​។ កញ្ញា​លើកឡើងថា “​ក្រោយពី​លោកស្រី Suwanna Gauntlett ជួប​លោកជំទាវ មិថុនា ភូ​ថង អភិបាលខេត្ត​កោះកុង គាត់​បាន​ផ្ញើលិខិត​ដោះសារ “​យល់ច្រឡំ​” ជូននាង​ខ្ញុំ ដែល​លិខិត​នោះលោកស្រី​បាន​បន្ថែម​បទល្មើស​១​ទៀត គឺ​“​បរិហារកេរ្តិ៍​” ដែលថា ខ្ញុំ​សង់ ”បង្គន់​អនាម័យ​២” ជូន​អ្នកភូមិ​តំបន់​អា​រ៉ែ​ង​”​។

​កញ្ញា ធី សុវណ្ណ​ថា បញ្ជាក់ទៀតថា “​ខ្ញុំ​ជម្រាបជូន​លោកស្រី​ថា ខ្ញុំ​សង់​បង្គន់​តំបន់​អា​រ៉ែ​ង មាន​ជាង​២០​បង្គន់ និង​កំពុង​សាងសង់​៤​បន្តទៀត​…​គ្រាន់តែ​នៅ​ជុំវិញ​ស្នាក់ការ​លោកស្រីមាន​៥​បង្គន់​។ Clip video នេះ ជា​ភស្តុតាង​យ៉ាងច្បាស់​បញ្ជាក់ថា លោកស្រី​និយាយ “​បដិសេធ​” វត្តមាន​ខ្ញុំកុំ​ឲ្យ​ចូលរួម​បោះជុំរុំនៅ​តំបន់​អា​រ៉ែ​ង ដែល​នាង​ខ្ញុំ​ត្រូវបាន​អនុញ្ញាត​ឲ្យ​ចូលរួម​ពី​លោកជំទាវ​អភិបាលខេត្ត មិថុនា ភូ​ថង ដោយ​ឲ្យ​ហេតុផល​ថា “​ខ្ញុំ​អ្នកនយោបាយ ខ្ញុំ​ល្បី​ពេក​” នេះ​ជា​ហេតុផលដែល​ល្មើសច្បាប់ក្រមព្រហ្មទណ្ឌ​។ សូម​លោកស្រី​មើល​វចនានុក្រម​ខ្មែរ ឬអង់គ្លេស​ “​បដិសេធ​” មានន័យថា “​ការហាម​, ការឃាត់​” និង​សូម​មើល​លក្ខន្តិកៈ​របស់​អង្គការ​លោកស្រី ដែល​តម្កល់​នៅក្រសួងមហាផ្ទៃប្រទេស​កម្ពុជា​”​។ កញ្ញា​បញ្ជាក់​ដែរ “​ខ្ញុំ​ទៅ​ចូលរួម​បោះជុំរុំ នៅ​តំបន់​អា​រ៉ែ​ង ក្នុងនាម​ជា “​ភ្ញៀវ​របស់​អភិបាលខេត្ត​កោះកុង​” ខ្ញុំ​មិនបាន​សុំ​អង្គការ ​Wildlife Alliance ទេ​។

​ជាមួយគ្នា​នោះ កញ្ញា ធី សុវណ្ណ​ថា បញ្ជាក់ប្រាប់​លោកស្រី Suwanna Gauntlett ថា កម្មវិធី​បោះជុំរុំរបស់​កញ្ញា ត្រូវបាន​កោតសរសើរ​ពីស​ម្តេច​តេ​ជោ ហ៊ុន សែន​ នៅលើ​វេទិកា​មច្ឆា​ជាតិខេត្តកំពង់ស្ពឺ ហើយ​សម្តេច​តេ​ជោ​តែងតែ​លើកទឹកចិត្ត និង​គាំទ្រ ដូច្នេះ​លោកស្រី លោកស្រី Suwanna Gauntlett ត្រូវតែ​ទទួលខុសត្រូវ​លើ​ពាក្យសម្តីដែល​បាន​និយាយ​។ កញ្ញា​ត្រូវការ “​យុត្តិធម៌​” និង “​កិត្តិយស​ក្នុងនាម​ជា​ជនជាតិខ្មែរ​” មិនអាច​ឲ្យ​បរទេស​មើលងាយ ប្រមាថ​បានទេ ហើយ​លោកស្រី​នៅសល់​ពេល “២​ថ្ងៃ​” ទៀត ដើម្បី​សុះ​ទោស​ជា​សា​ធាន​រណៈ​”​។ បើ​លោកស្រី​មិន​ភ្ញាក់រលឹក សុំទោស​តាម​កំណត់​ទេ កញ្ញា​នឹង​ឲ្យ​ក្រុម​មេធាវី​សិក្សា “៤​ករណី​” ប្តឹង​លោកស្រី Suwanna Gauntlett ទី​១, រើសអើង​សិទ្ធ​នយោបាយ ទី​២, អប្បគមន៍ ទី​៣, ប្រឆាំង​រាជការ​សាធារណ​: និង​ទី​៤, បរិហារកេរ្តិ៍​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114