ព័ត៍មានទាន់​ហេតុការណ៏
Search

ពានរង្វាន់​ស្វាយរៀង​ខាប់ ឆ្នាំ​២០១៨ ចាប់​គូប្រកួត​វគ្គ​១៦​ក្រុម​ចុងក្រោយ​រួចរាល់​ហើយ​

ពានរង្វាន់​បាល់ទាត់​មហាជន​ធំជាងគេ​ប្រចាំខេត្ត​ស្វាយរៀង ឈ្មោះថា​«​ស្វាយរៀង ខាប់ (Svay Rieng Cup) លើក​ទី​៤ ឆ្នាំ​២០១៨ ដែល​រៀបចំឡើង​ដោយ​សហភាព​សហព័ន្ធ​យុវជន​កម្ពុជា​ខេត្តស្វាយរៀង នឹងធ្វើ​ដំណើរ​ដល់​វគ្គ​ប្រកួត​១៦​ក្រុម​ចុងក្រោយ នៅ​ចុង​សប្ដាហ៍​នេះ បន្ទាប់ពី​បញ្ចប់​វគ្គ​ប្រកួត​ក្នុង​វគ្គ​៣២​ក្រុម​ចុងក្រោយ​ក៏ដូចជា​វគ្គ​ចែក​ពូ​ល​កាលពីពេល​ថ្មីៗ​។

ពានរង្វាន់ Svay Rieng Cup ឆ្នាំមាន​ក្រុម​ចូលរួម​ចំនួន​៥២​ក្រុម​ចែកជា​១៣​ពូ​ល​ផ្សេងគ្នា​នៅ​កីឡដ្ឋាន​ខេត្ត​ជាប់​ព្រំដែន​កម្ពុជា​-​វៀតណាម មួយ​នេះ​។ ក្រោយមក​គណៈកម្មការ​បាន​ស្វែង​រកឃើញ​ក្រុម​ខ្លាំងជាងគេ​ចំនួន​១៦​ឡើង​ទៅ​វគ្គ​បន្ត​។ ការប្រកួត​វគ្គ​នេះ​បែង​ចែកជា​២​លើក​ផ្សេងគ្នា​ដោយនៅ​ថ្ងៃ​សៅរ៍ ទី​៨ ខែធ្នូ ឆ្នាំ​២០១៨ ក្រុម​ក្លិប​កីឡា​ពូ​ប្រុស​ជី​ភូ ប៉ះ​ក្រុម​ស​.​ស​.​យ​.​ក ស្រុក​ស្វាយជ្រុំ នៅ​ម៉ោង​៨​ព្រឹក ខណៈ​នៅ​ម៉ោង​២​រសៀល​ក្រុម Blue Dragon ជួប​ក្រុម​រាជសីហ៍​ផ្សា​ថូ​ម៉ាក់ ហើយ​ក្រុម​ធា​រី​បាវិត ប៉ះ​ក្រុម​សៀង​ហៃ​រី​ហ្សត​អេ​ហ្វ​ស៊ី នៅ​ម៉ោង​៤​ល្ងាច​និង​ក្រុម​អធិការនគរបាល​ក្រុង​បាវិត ជួប​ក្រុម Chong Prek FT នៅ​ម៉ោង​៦​ល្ងាច​។

​ចំណែក​គូ​ផ្សេងទៀត​បន្ត​ប្រកួត​នៅ​ថ្ងៃអាទិត្យ ទី​៩ ខែធ្នូ ឆ្នាំ​២០១៨ ក្រុម​ស​.​ស​.​យ​.​ក​ស្រុក​រមាសហែក ប៉ះ​ក្រុម​រដ្ឋ​ករ​ទឹក​ខេត្តស្វាយរៀង ហើយ​ក្រុម​លីង​គួ​យ​អែ​ហ្វ​ស៊ី ប៉ះ​ក្រុម​ស​.​ស​.​យ​.​ក​ក្រុង​បាវិត នៅ​ម៉ោង​២​រសៀល ខណៈ​នៅ​ម៉ោង​៤​ល្ងាច​ក្រុម​អគ្គីសនី​ស្វាយរៀង ជួប​ក្រុម​សុភ​ក្តិ​មូទ័រ FC ជី​ភូ និង​ចុងក្រោយ​ក្រុម Panda FC ជួប​ក្រុម​ស​.​ស​.​យ​.​ក​ក្រុង​បាវិត​។

ការប្រកួត​ធ្វើឡើង​នៅលើ​ទីលាន​ស្មៅ​ធម្មជាតិ នៃ​កីឡដ្ឋាន​ខេត្តស្វាយរៀង​ជាប់ៗ​គ្នា ខណៈ​នេះ​ជា​លើក​ទី​៤​បន្ទាប់ពី​បង្កើត​ចាប់តាំងពី​ឆ្នាំ​២០១៥​ដោយ​ត្រូវបាន​ផ្តួចផ្តើម​បង្កើតឡើង ដោយ​សហភាព​សហព័ន្ធ​យុវជន​កម្ពុជា​ខេត្តស្វាយរៀង ដែលមាន​ឯកឧត្តម ឌី វិជ្ជា ជា​ប្រធាន ស្របពេល​២​លើ​មុនដំបូង ក្រុមបាល់ទាត់ ស​.​ស​.​យ​.​ក ក្រុង​បាវិត ជា​ម្ចាស់​ជើងឯក​ទាំង​២​ឆ្នាំ​ជាប់ៗ​គ្នា​និង​ចុងក្រោយ​ក្រុមធារីលិញ​គួយ​ជា​ម្ចាស់​ជើង​ឯក​ម្តង៕