លោក Vladimir Putin កាលពីថ្ងៃពុធបានគំរាមអភិវឌ្ឍន៍មីស៊ីលនុយក្លេអ៊ែរដែលត្រូវបានហាមឃាត់ក្រោមសន្ធិសញ្ញាជាមួយសហរដ្ឋអាមេរិក បន្ទាប់ពីទីក្រុងវ៉ាស៊ីនតោនផ្តល់ថ្ងៃកំណត់អោយទីក្រុងមូស្គូគោរពតាមកិច្ចព្រមព្រៀងគ្រប់គ្រងអាវុធដ៏សំខាន់។
ភាពតានតឹងចុងក្រោយបំផុតនេះបានកើតឡើងមួយថ្ងៃបន្ទាប់ពីរដ្ឋមន្ត្រីការបរទេសអាមេរិកលោក Mike Pompeo និយាយថា ក្រុងវ៉ាស៊ីនតោននឹងដកខ្លួនចេញពីសន្ធិសញ្ញាសង្គ្រាមត្រជាក់ដ៏សំខាន់មួយដែលដាក់កំហិតអាវុធនុយក្លេអ៊ែររយៈចម្ងាយមធ្យមក្នុងពេល៦០ថ្ងៃប្រសិនបើរុស្ស៊ីមិនរុះរើមីស៊ីលដែលអាមេរិកអះអាងថា រំលោភកិច្ចព្រមព្រៀងនេះទេនោះ។
លោក Putin បានច្រានចោលសេចក្តីថ្លែងរបស់លោក Pompeo ដោយនិយាយថា ក្រុងវ៉ាស៊ីនតោនបានសម្រេចរួចទៅហើយក្នុងការលះបង់សន្ធិសញ្ញាកងកម្លាំងនុយក្លេអ៊ែររយៈចម្ងាយមធ្យម (INF) ។
ប្រមុខវិមានក្រឹមឡាំងរូបនេះបាននិយាយថា “ពួកគេគិតថា យើងនឹងមិនកត់សម្គាល់ទេ”។ លោកអះអាងថា មន្ទីរបញ្ចកោណបានកំណត់ចំនួនទឹកប្រាក់រួចទៅហើយសម្រាប់ការអភិវឌ្ឍន៍មីស៊ីលដែលត្រូវបានហាមឃាត់ដោយសន្ធិសញ្ញានេះ។
លោកបានបន្តថា “យើងប្រឆាំងនឹងការបំផ្លាញសន្ធិសញ្ញានេះ។ ប៉ុន្តែប្រសិនបើរឿងនេះកើតឡើងមែននោះ យើងនឹងប្រតិកម្មទៅតាមនោះ”។
លោក Putin បាននិយាយទៀតថា បណ្តាប្រទេសជាច្រើនកំពុងផលិតមីស៊ីលរយៈចម្ងាយមធ្យមនៃប្រភេទដែលត្រូវបានហាមឃាត់ដោយសន្ធិសញ្ញា INF ។
លោកបានបន្ថែមថា “បច្ចុប្បន្នដៃគូអាមេរិកជឿជាក់ថា ស្ថានភាពបានផ្លាស់ប្តូរយ៉ាងខ្លាំងដែលសហរដ្ឋអាមេរិកគួរតែមានអាវុធបែបនេះ។ តើអ្វីនឹងជាចម្លើយរបស់យើង? ចម្លើយដ៏សាមញ្ញមួយគឺថា យើងក៏នឹងធ្វើវាផងដែរ”។
នៅទីក្រុងប្រ៊ូសសែល ប្រធានសហភាពអឺរ៉ុបលោក Federica Mogherini បានជំរុញដល់ប្រទេសរុស្ស៊ីនិងសហរដ្ឋអាមេរិកអោយសង្គ្រោះសន្ធិសញ្ញានេះដោយព្រមានថា ទ្វីបអឺរ៉ុបមិនចង់ក្លាយជាសមរភូមិសម្រាប់មហាអំណាចសកលលោកជាថ្មីម្តងទៀតដូចដែលបានកើតឡើងអំឡុងសង្គ្រាមត្រជាក់ទេ៕ AFP
