ចរាចរណ៍

សង្ស័យស្រវឹងស្រា បើករថយន្តបុករះនៅ ដឺប្រ៊ីត របួសធ្ងន់-ស្រាល មនុស្ស ៣ នាក់

បានផុស

៩ ខែ មុន

នៅ

ថ្ងៃសុក្រ ១០ តុលា ២០២៥

ដោយ

សង្ស័យស្រវឹងស្រា បុរសម្នាក់ បើករថយន្តលឿនដូចហោះ រេចង្កូតបុករះម៉ូតូ ០២ គ្រឿង រថយន្ត ០៣ គ្រឿង រួមទាំងរ៉ឺម៉ក ០១ គ្រឿង បណ្ដាលឲ្យមនុស្សប្រុស-ស្រី ចំនួន ០៣ នាក់ រងរបួសធ្ងន់-ស្រាល ត្រូវបានដឹកបញ្ជូនទៅកាន់មន្ទីរពេទ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ០៤ និង ២០ នាទីរសៀល ថ្ងៃទី ០៩ ខែតុលា ឆ្នាំ ២០២៥ នៅចំណុចអាគារ ដឺប្រ៊ីត តាមបណ្ដោយផ្លូវលេខ ៧៨ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមការបញ្ជាក់ពីប្រជាពលរដ្ឋបានឲ្យដឹងថា មុនកើតហេតុ គេឃើញបុរសម្នាក់សង្ស័យស្រវឹងស្រា បើករថយន្ត ០១ គ្រឿង ម៉ាក តូយូតា ឡង់គ្រឺស័រ ពណ៌ស ពាក់ស្លាកលេខ ភ្នំពេញ 2AA-6878 តាមបណ្ដោយផ្លូវលេខ ៧៨ ក្នុងល្បឿនយ៉ាងលឿន លុះមកដល់ចំណុចកើតហេតុ ក៏ជ្រុលបុកម៉ូតូ ០២ គ្រឿង ម៉ាក ស្កុបពី ពណ៌ឈាមជ្រូក និង ពណ៌ស បុកពីក្រោយពេញទំហឹង បណ្តាលឲ្យស្ត្រីជាអ្នកជិះម៉ូតូរងរបួសធ្ងន់ និង មនុស្សប្រុស ០២ នាក់ទៀត រងរបួសស្រាល បញ្ជូនទៅមន្ទីរពេទ្យសង្គ្រោះភ្លាមៗ។ ចំណែករថយន្តបង្កមិនទាន់អស់ល្បឿន បន្តទៅបុករថយន្តព្រុស ពាក់ស្លាកលេខ ភ្នំពេញ 2BU-2543 កំពុងចតចិញ្ចើមផ្លូវ ទៅរុញផ្ទប់ពីក្រោយរថយន្ត ០២ គ្រឿង បង្កការខូចខាតយ៉ាងដំណំ។ ភ្លាមៗ ជនបង្ក ត្រូវបានសមត្ថកិច្ចឃាត់យកទៅសួរនាំ។