ព័ត៍មានទាន់​ហេតុការណ៏
Search

អង្គការ​ILO​ អះអាង​ថា ​ការ​គោរព​លក្ខខណ្ឌ​ការងារ​តាម​រោងចក្រ​មាន​ភាព​ប្រសើរ​ជាង​មុន​

​ភ្នំពេញ ​៖ ​អង្គការ​អន្តរជាតិ​ខាង​ការងារ​ ដែល​ហៅ​កាត់​ថា ILO​ បាន​អះអាងថា​ ការគោរព​លក្ខខណ្ឌ​ការងារ​តាម​រោងចក្រ​មាន​ភាព​ប្រសើរ​ជាង​មុន​ ដោយ​កើន​ឡើង​ពី​៣២% ដល់​៤១% ​នៅ​ឆ្នាំ​២០១៨​នេះ​។​

យោង​តាម​របាយការណ៍​របស់​គម្រោង​រោងចក្រ​កាន់តែ​ប្រសើរ​ ឆ្នាំ​២០១៨ ​របស់​អង្គការ ​ILO បាន​ឲ្យ​ដឹងថា រោងចក្រ​ដែល​គោរព​លក្ខខណ្ឌ​ការងារ​បានល្អ​ប្រសើរ​ សំដៅ​ទៅលើ​រោងចក្រ​ទាំងនោះ​ អនុវត្ត​ទៅតាម​ច្បាប់​ការងារ​រួមមាន ​គោរព​កិច្ចសន្យាការងារ កន្លែងធ្វើការ​មាន​សុវត្ថិភាព​ល្អ បើកប្រាក់​ឈ្នួល​បាន​ទៀងទាត់​ និង​គោរព​ម៉ោង​ធ្វើការ​ត្រឹមត្រូវ​ជាដើម​។​

ការអះអាង​របស់​អង្គការ​អន្តរជាតិ​ខាង​ការងារ​នេះ​ ធ្វើឡើង​តាមរយៈ​របាយការណ៍​ប្រចាំ​ឆ្នាំ​២០១៨​របស់ខ្លួន​ដែល​បាន​វាយតម្លៃ​ស្ថានភាព​ការងារ​ពី​ខែ​ឧសភា ឆ្នាំ​២០១៧ ដល់​ខែ​មិថុនា ឆ្នាំ​២០១៨ និង​ពិនិត្យមើល​រោងចក្រ​ចំនួន​៤៦៤​រោងចក្រ​។​

តាម​របាយការណ៍​ដដែល​បាន​ឲ្យ​ដឹង​ទៀតថា ​រោងចក្រ​ដែល​គោរព​លក្ខខណ្ឌ​ការងារ​បាន​ល្អ​ប្រសើរ​នេះ​បាន​ជួយ​ឲ្យ​សុខភាព​កម្មករ​និយោជិក​ល្អ​ជំរុញ​ផលិតភាព​ខ្ពស់​ក្នុង​ការ​ប្រកួតប្រជែង​នៅ​ក្នុង​វិស័យ​កាត់ដេរ​ឲ្យ​កាន់តែ​រីកចម្រើន​ថែមទៀត​។​

អ្នកស្រី Esther Germans ប្រធាន​ គម្រោង​រោងចក្រ​ កាន់តែ​ប្រសើរ​របស់​អង្គការ​អង្គការ​អន្តរជាតិ​ខាង​ការងារ​ជំរុញ​ឲ្យ​ដៃគូ​ពាក់ព័ន្ធ​ខិតខំ​ប្រឹងប្រែង​បន្ថែមទៀត ​ដើម្បី​កែលំអ​លក្ខខណ្ឌ​ការងារ នៅ​ក្នុង​រោង​ចក្រ​ឲ្យ​កាន់តែ​ល្អ​ប្រសើរ ​ព្រោះថា​ការ​គោរព​លក្ខខណ្ឌ​ការងារ​តាម​រោងចក្រ​ បាន​ដើរ​តួនាទី​យ៉ាង​សំខាន់ ធ្វើ​ឲ្យ​ឧស្សាហកម្ម​កាត់ដេរ​មាន​ភាព​រីកចម្រើន ​ដែល​ជួយ​ឲ្យ​កម្ពុជា​កាន់តែ​មាន​កេរ្តិ៍ឈ្មោះ​ល្បី និង​ជាទី​ផលិត​ទំនិញ​ដែល​មាន​ក្រមសីលធម៌​ល្អ​។​

លោក​ទេសរដ្ឋមន្ត្រី ប៉ាន សូរ​ស័ក្តិ រដ្ឋមន្ត្រី​ក្រសួង​ពាណិជ្ជកម្ម​បាន​ស្វាគមន៍​លទ្ធផល​របាយការណ៍​ឆ្នាំ ២០១៨ របស់​គម្រោង​រោងចក្រ​កាន់តែ​ប្រសើរ នៅ​កម្ពុជា (BFC) ដែល​បង្ហាញ​ពី​ភាព​ប្រសើរឡើង ​នៃ​បរិយាកាស​ការងារ ការ​ថយ​ចុះ​អំពើ​ហិង្សា និង​ការ​មិន​គោរព​បទដ្ឋាន​ច្បាប់ នៅ​តាម​រោងចក្រ​ សហ​គ្រាស​ចំនួន​៤៦៤​ទីតាំង​។​

លោក​ទេសរដ្ឋមន្ត្រី​ បានលើកឡើង​បែបនេះ ​នៅក្នុង​កិច្ចប្រជុំ​ប្រចាំ​ត្រីមាស ស្ដីពី​ការអនុវត្ត​លក្ខខណ្ឌ​ការងារ នៃ​ឧស្សាហកម្ម​កាត់ដេរ សំលៀកបំពាក់ និង​ស្បែកជើង នៅ​ទីស្ដីការ​ក្រសួងពាណិជ្ជកម្ម កាល​ពី​ចុងខែ​វិច្ឆិកា ​ឆ្នាំ​២០១៨​កន្លងទៅនេះ​។​

លោក​ទេសរដ្ឋមន្ត្រី​ឲ្យ​ដឹងថា ​គម្រោង​រោងចក្រ​កាន់តែ​ប្រសើរ នៅ​កម្ពុជា​ បាន​នាំមក​នូវ​លទ្ធផល វិជ្ជ​មាន សម្រាប់​ឧស្សាហកម្ម វាយនភណ្ឌ​ជាតិ ជាពិសេស​ចូលរួម​លើកស្ទួយ​លក្ខខណ្ឌ​ការងារ និង​ជីវភាព​រស់នៅ​របស់​កម្មករ និយោជិក ប្រមាណ​ជាង​៧​សែន​នាក់ ដែល​កំពុង​បំពេញ ការងារ​នៅ​តាម​រោងចក្រ​សហគ្រាស​នានា​ទូទាំង​ប្រទេស។​

ជាមួយគ្នានេះ​លោក​ទេសរដ្ឋមន្ត្រី​បាន​បន្ត​ថា ​គម្រោង​នេះ ​បាន​រួម​ចំណែក​លើកកម្ពស់​កិត្តិនាម និង​ឧត្ដមភាព​ប្រកួតប្រជែង​របស់​កម្ពុជា ក្នុងនាម​ជា​ប្រទេស​ផលិត និង​នាំចេញ​ផលិតផល​សំលៀក​បំពាក់ ប្រកបដោយ​ក្រមសីលធម៌ ស្របតាម​បទដ្ឋាន​ស្តង់ដារ​ការងារ​ខ្ពស់ ជួយ​កែលំអ​លក្ខខណ្ឌ​ការងារ និង​បង្កើន​ប្រាក់ចំណេញ​ដល់​ឧស្សាហកម្ម វាយនភណ្ឌ​កម្ពុជា​ ព្រមទាំង​ពង្រឹង​កេរ្តិ៍ឈ្មោះ​ឧស្សាហកម្ម​កាត់ដេរ​កម្ពុ​ជា​ ទទួល​បាន​នូវ​ទំនុក​ចិត្ត​ខ្ពស់​ជាមួយនឹង​ការ​បញ្ជាទិញ​កាន់តែច្រើន ពី​ទីផ្សារ​អន្តរជាតិ​ធំៗ​នៅលើ​ពិភពលោក​។​

គួរ​បញ្ជាក់​ថា ​របាយការណ៍​របស់​គម្រោង​រោងចក្រ​កាន់តែ​ប្រសើរ​ឆ្នាំ​២០១៨ ​របស់​អង្គការ​ILO នេះ​ធ្វើឡើង​ក្រោម​ការចុះ​សិក្សា​ និង​វាយតម្លៃ​ពី​គណៈកម្មាធិការ​ពិគ្រោះ​យោបល់​គម្រោង (PAC) ដែល​ចូលរួម​ដោយ​ក្រសួង​ការងារ និង​បណ្ដុះបណ្ដាល​វិជ្ជាជីវៈ ក្រសួងពាណិជ្ជកម្ម សមាគម​រោងចក្រ​កាត់​ដេរ​នៅ​កម្ពុជា និង​សហជីព​ការងារ​៕