ព័ត៍មានទាន់​ហេតុការណ៏
Search

សមាជិក​ថ្មី​ទាំង​៤​របស់​ក្លិប​ភ្នំពេញ​ក្រោ​ន សុទ្ធតែ​មាន​បទពិសោធន៍​ខ្ពស់ៗ​ក្នុង​ពិភព​បាល់ទាត់

ក្លិប​បាល់ទាត់​ភ្នំពេញ​ក្រោ​ន ម្ចាស់​ជើងឯក​ពានរង្វាន់​លី​គ​កំពូល​កម្ពុជា​៦​សម័យកាល បានប្រកាស​បង្ហាញ​សមាជិក​ថ្មី​ចំនួន​៤​រូប នៅ​ថ្ងៃ​ពុធ សប្តាហ៍​នេះ ​ដើម្បី​ត្រៀម​រដូវ​កាល​ថ្មី​ឆ្នាំ​២០១៩ ខាងមុខ ខណៈ​អ្នក​ទាំងអស់​សុទ្ធ​សឹង​ជា​ជនជាតិ​ប្រេ​ស៊ី​ល ដូចគ្នា​ដែល​មាន​២​នាក់​ជា​កីឡាករ និង​២​នាក់​ទៀត​ជា​បុគ្គលិក​ប្រចាំ​ក្រុម​។​

​ចំពោះ​២​នាក់​ជា​កីឡាករ​គឺ​ខ្សែប្រយុទ្ធ Paulo Victor និង​អ្នកចាំទី Leonardo ព្រមទាំង​ក្រុមការងារ​ពេទ្យ​ចលនា​២​រូប​ទៀត​គឺ​លោក​Luiz Andre Bastos Leandro ជា​គ្រូ​ផ្នែក​កាយសម្បទា​និង​គ្រូពេទ្យ​ចលនា លោក​Pedro Icaro Marques Benevenuto​។ ក្លិប​បាន​ចុះកិច្ចសន្យា​ជំ​ហ៊ាន​ដំបូង​រយៈពេល​១​ឆ្នាំ​ជាមួយ​អ្នក​ទាំង​៤​ផងដែរ​។

​ចំពោះ​កីឡាករ Leonardo Oliveira Tavares កើត​នៅ​ថ្ងៃទី​៤ ខែមករា ឆ្នាំ​១៩៩៦​។ រូបគេ​បានចាប់ផ្តើម​អាជីព​បាល់ទាត់​របស់ខ្លួន​នៅ​ប្រទេស​កំណើត​ជាមួយ​ក្លិប Flamengo នៅ​ឆ្នាំ​២០០៩ ហើយ​បន្តដំណើរ​ទៅកាន់​ក្លិប Botafogo នៅ​ឆ្នាំ​២០១០ រហូតដល់​ឆ្នាំ​២០១៦ រូបគេ​បន្តទៅ​កាន់​ក្លិប Porto -SC​ហើយក៏​បន្ត​ទៅលេង​នៅ​ក្លឹប Queimados នា​ឆ្នាំ​២០១៧ និង​លេង​នៅ​ក្លឹប Bacabal ឆ្នាំ​២០១៨ ថ្មីៗ​នេះ​។​

​ចំណែក​កីឡាករ Paulo Victor វិញ​កើត​នៅ​ថ្ងៃ​១៣ ខែកញ្ញា ឆ្នាំ​១៩៩៤ នៅ​ទីក្រុង São Luís នៃ​ប្រទេស​ប្រេ​ស៊ី​ល​។ រូបគេ​លេង​ក្នុងតួនាទី​ជា​ខ្សែបម្រើ​ប្រយុទ្ធ ហើយ​រូបគេ​បានចាប់ផ្តើម​អាជីព​បាល់ទាត់​ឲ្យ​ក្លិប Atlético Sorocaba ក្នុង​ឆ្នាំ​២០១៣ នៅ​ឆ្នាំ​២០១៤ បាន​បន្ត​ទៅលេង​នៅ​ក្លឹប América-RN ហើយ​បន្ត​ទៅលេង​នៅ​ក្លឹប Goyang Zaicro របស់​ប្រទេស​កូរ៉េខាងត្បូង នៅ​ឆ្នាំ​២០១៦ និង​ថ្មីៗ​នេះ​រូបគេ​ក៏​ត្រលប់​ទៅលេង​នៅ​ប្រទេស​ប្រេ​ស៊ី​ល​វិញ​គឺ​ក្លិប Nacional Atl. Muriaé​។​

​ចំណែក​បុគ្គលិក​ទាំង​២​រូបនេះ​មាន​លោក Luiz Andre ធ្លាប់​បទពិសោធន៍​ជាច្រើន​ឆ្នាំ​លើ​ការ​បង្វឹក​កាយសម្បទា​កីឡាករ​ជាពិសេស​លើ​ផ្នែក​កម្លាំង​ដែល​ធ្លាប់​ធ្វើការ​នៅ​ក្លឹប​មួយចំនួន​ដូចជា ជាមួយ​ក្រុម​ជម្រើសជាតិ​ហៃ​ទី ក្លឹប Dempho Sport Club របស់​ប្រទេស​ឥណ្ឌា ក្លឹប Al Arabi និង​ក្លឹប Al Hamrya របស់​ប្រទេស​គុយ​វ៉ែត និង​ក្លិប​មួយចំនួន​នៅ​ប្រទេស​ប្រេ​ស៊ី​ល​ដូចជា Fluminense FC និង Sampaio Correia FC ។ ចំណែក​លោក Pedro Icaro វិញ​បានបញ្ចប់​ការសិក្សា​នៅ​សកល​វិទ្យាល័យ​នៅ​រដ្ឋ Ceara របស់​ប្រទេស​ប្រេ​ស៊ី​ល ហើយក៏​បានធ្វើការ​ជាមួយ​ក្លឹប Ceara Sporting Club រយៈពេល​៤​ឆ្នាំ​ផងដែរ​មុន​សម្រេចចិត្ត​មក​កម្ពុជា​។​

​សូមបញ្ជាក់ថា​ ថ្មីៗ​នេះ​ក្រុម​ភ្នំពេញ​ក្រោ​ន បានតែងតាំង​ក្បាលម៉ាស៊ីន ថ្មី​ក្រោយ​ជម្រុះ​ថ្នាក់ដឹកនាំ​ចាស់​អស់​បន្ទាប់ពី​ចប់​រដូវ​កាល​ឆ្នាំ​២០១៨​។ ចំណែក​ថ្នាក់ដឹកនាំ​ថ្មី​របស់​ក្លិប​មានដូចជា លោក លី ហៀ​ង ជា​អ្នកចាត់ការ​ទូទៅ​ក្លិប ចំណែក លោក Leonardo Vitorino ជា​គ្រូ​បង្គោល​ថ្មី ស្របពេល​ប្អូនប្រុស​របស់ខ្លួន Luis Fernando Vitorino កាន់តំណែង​ជា​គ្រូបង្វឹក​អ្នកចាំទី​ឈុត​ធំ​។ អតីត​គ្រូ​វេ​ស្ទើ​ន លោក ស៊ុំ វណ្ណា បានទទួល​តំណែង​ជា​គ្រូ​ជំនួយ​ក្រុម​ឈុត​ធំ ខណៈដែល​អតីត​ខ្សែប្រយុទ្ធ កែវ សុខ​ង៉​ន ជា​អ្នកចាត់ការ​ទូទៅ​ក្រុម​ឈុត​ធំ​៕