នាវាទ័ពជើងទឹកចិន និងទ័ពជើងទឹកអូស្រ្តាលីចូលសំចតនៅដែនសមុទ្រកម្ពុជា

នាវាកងទ័ពជើងទឹកចិនចំនួន២គ្រឿង និងនាវាទ័ពជើងទឹកអូស្ត្រាលីចំនួន១គ្រឿង បានចូលសំចតនៅដែនសមុទ្រកម្ពុជា នៅព្រឹកថ្ងៃទី១០ ខែតុលា ឆ្នាំ២០២៥នេះ។ ការចូលសំចតរបស់នាវាយោធាទាំងពីរប្រទេសនេះគឺដើម្បីរឹតចំណងទាក់ទង និងកិច្ចសហប្រតិបត្តិការយោធាជាមួយកម្ពុជាឱ្យកាន់តែល្អប្រសើរបន្ថែមទៀត។

នាវាកងទ័ពជើងទឹកចិនចំនួន២គ្រឿង ដែលចូលសំចតនៅកំពង់ផែស្វយ័តក្រុងព្រះសីហនុនោះ គឺនាវា Qi Jiguang (PLAN 83) និងនាវា Yi Mengshan (PLAN 988) ដើម្បីធ្វើទស្សនកិច្ចនៅកម្ពុជា រយៈពេល៥ថ្ងៃ ចាប់ពីថ្ងៃទី១០ ដល់ថ្ងៃទី១៤ ខែតុលា ឆ្នាំ២០២៥។

លក្ខណៈ​បច្ចេកទេសរបស់​នាវា QI JIGUANG (PLANS 83) គឺជាប្រភេទនាវាហ្វឹកហ្វឺន មានទម្ងន់ផ្ទុក ៩ ០០០តោន បណ្ដោយ ១៦៥.៣ម៉ែត្រ ទទឹង ២២.២ម៉ែត្រ ​ជម្រៅ​ទឹក ៦.៨ម៉ែត្រ។ ខណៈនាវាឈ្មោះ YIMENG SHAN (PLANS 988) ជាប្រភេទនាវាបុកច្រាំងដែលមានទម្ងន់ផ្ទុក ២៥ ០០០តោន បណ្ដោយ ២១០ម៉ែត្រ ទទឹង ២៨ម៉ែត្រ និងជម្រៅ​ទឹក ៧ម៉ែត្រ។ សរុបនាវឹកលើនាវាទាំងពីរនេះមានចំនួន១ ២០៧នាក់។

ដោយឡែកនាវារបស់កងទ័ពជើងទឹកអូស្រ្តាលី ដែលមានឈ្មោះថា HMAS Ballarat -FFH155 (Anzac Class FFH) ក៏បានចូលសំចតនៅកំពង់ផែស្វយ័តក្រុងព្រះសីហនុនេះដែរ ដឹកនាំដោយវរនាវីទោ Dean Uren ជាមេបញ្ជាការនាវា។ លក្ខណៈបច្ចេកទេសនៃនាវា HMAS Ballarat -FFH155 គឺមានទម្ងន់ផ្ទុក៣៩០០តោន បណ្ដោយ១១៨ម៉ែត្រ ប្រវែងទទឹង១៤.៨ម៉ែត្រ និងជម្រៅទឹក៦.៤ម៉ែត្រ។

នាវាយោធានេះនឹងធ្វើទស្សនកិច្ចនៅកម្ពុជា រយៈពេល៤ថ្ងៃ ចាប់ពីថ្ងៃទី១០ ដល់ថ្ងៃទី១៣ ខែតុលា ក្នុងគោលបំណងដើម្បីពង្រឹងកិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព សាមគ្គីភាពឱ្យកាន់តែល្អទ្វេឡើងថែមទៀតរវាងកម្ពុជា-អូស្ត្រាលី៕

អត្ថបទ៖ ធឿន វ៉ាន់សុង