ព័ត៍មានទាន់​ហេតុការណ៏
Search

ជម្លោះ​ពាក្យ​សំដី​ជាមួយ​អ្នក​ស្រវឹង​ស្រា ​​​ក្លាយ​ជា​អំពើ​ហិង្សា​របួស​២នាក់

កំពង់ចាម​ ៖ ​ជម្លោះ​ពាក្យ​សំដី​ជាមួយ​អ្នក​ស្រវឹង​ស្រា ​បាន​ក្លាយ​ជា​អំពើ​ហិង្សា​ដោយ​ចេតនា​ បណ្ដាលឲ្យ​​​យុវជន​២​នាក់ ​បាន​រង​របួស​ ដោយសារ​ការ​វាយប្រហារ​របស់​ជនសង្ស័យ​កាលពី​ថ្ងៃ​ទី​០៦ ខែ​ធ្នូ ឆ្នាំ ២០១៨ វេលា​ម៉ោង​១៧ និង​០០​នាទី ចំណុច​ភូមិ​ថ្លុក​ក្រ​វ៉ាន់ ឃុំ​បុសខ្នុរ ស្រុក​ចំការលើ ខេត្ត​កំពង់ចាម។

ប៉ូលិស​បានអោយដឹងថា ជនរងគ្រោះ​ចំនួន (២​នាក់​)​រង​ការវាយប្រហារ​គឺ​ ១.​ឈ្មោះ យិន វរៈ ភេទ​ប្រុស អាយុ​២០​ឆ្នាំ និង ២.​ឈ្មោះ អៀង ឌី ភេទ​ប្រុស អាយុ​១៨​ឆ្នាំ របួស ចំក្បាល អ្នក​ទាំងពីរ​មាន​ទីលំនៅ ភូមិ​ថ្លុក​ក្រ​វ៉ាន់ ឃុំ​បុសខ្នុរ ស្រុក​ចំការលើ ខេត្តកំពង់ចាម ត្រូវ​របួស​ត្រង់ ក្បាល​ដូចគ្នា។ ចំណែក​ជនសង្ស័យ ឈ្មោះ វឿន វី ភេទ​ប្រុស អាយុ​៣៥​ឆ្នាំ​ជាតិខ្មែរ នៅ​ភូមិ​ថ្លុក​ក្រ​វ៉ាន់ ឃុំ​បុសខ្នុរ ស្រុក​ចំការលើ ខេត្តកំពង់ចាម មានមុខ​របរ លក់ដូរ។

តាម​ការបំភ្លឺ​ពី​ជនរងគ្រោះ​បានអោយដឹងថា មុនពេល​កើតហេតុ ពួកខ្លួន​អ្នក​ទាំងពីរ​នាក់ បាន​អង្គុយ​មើល​រឿង​ក្នុង​ទូរស័ព្ទ នៅ ក្រោមផ្ទះ​ម្តាយ​របស់​ជនសង្ស័យ។ ពេលនោះ​ឈ្មោះ អៀង ឌី បានឮ កូន​ម្ចាស់ផ្ទះ​ឡូឡា​ថ្លង់​ពេក ក៏​និយាយ ថា អាណា​ខូច ស្រាប់តែ​ឈ្មោះ វឿន វី ជា​(​ជនសង្ស័យ​)​ស្រវឹងស្រា​ដើរមក​ដល់​បាន​យក​ដំបង មែក​ស្វាយចន្ទី វាយ​ទៅលើ ពួកខ្លួន​ទាំង​២​នាក់​បណ្តាលឲ្យ​រងរ​បួស​ក្បាល ហើមប៉ោង​ដូចគ្នា​។​

ប៉ូលិស​បានឲ្យដឹងថា ភ្លាមនោះ​សមត្ថកិច្ច​បាន​ចុះទៅ​កន្លែងកើតហេតុ រក​ជនសង្ស័យ ហើយ​ត្រូវបាន​ឃាត់ខ្លួន​តាម​បញ្ជា​លោក​ហួត វុទ្ធី ព្រះរាជអាជ្ញា​អម​សាលាដំបូង​ខេត្តកំពង់ចាម និង​នាំមក​ទុក​នៅ​អធិការដ្ឋាន​នគរបាល​ស្រុក​ចំការលើ ដើម្បី​កសាង​សំណុំរឿង​តាម​នីតិវិធី​បញ្ជូន​ទៅ​តុលាការ៕