ព័ត៍មានទាន់​ហេតុការណ៏
Search

មន្ទីរ​បញ្ច​កោណ​បញ្ជូន​ជើង​ហោះហើរ​ទៅលើ​ប្រទេស​អ៊ុយ​ក្រែ​ន​ បន្ទាប់ពី​ឧបទ្ទវហេតុ​កងទ័ពជើងទឹក​រុស្ស៊ី

ក្រុមមន្ត្រី​បាន​និយាយថា យន្តហោះ​សង្កេតការណ៍​របស់​កង​ទ័ពអាកាស​អាមេរិក ​បាន​ហោះហើរ​លើ​ប្រទេស​អ៊ុយ​ក្រែ​ន​កាលពី​ថ្ងៃ​ព្រហស្បតិ៍​នៅ​ក្នុង​បេសកកម្ម​មួយ​ ដើម្បី​បង្ហាញ​ពី​ការគាំទ្រ​របស់​អាមេរិក​ចំពោះ​ទីក្រុង​គៀវ ​បន្ទាប់ពី​រុស្ស៊ី​រឹបអូស​យក​នាវា​កងទ័ព​ជើង​ទឹក​អ៊ុយ​ក្រែ​ន​ចំនួន​៣​គ្រឿង​នៅ​សមុទ្រ Azov។

ការប្រឈមមុខគ្នា​កាលពី​ថ្ងៃទី​២៥​ខែវិច្ឆិកា​គឺជា​ឧបទ្ទវហេតុ​យោធា​បើកចំហ​ដំបូងបង្អស់​រវាង​ក្រុង​គៀវ​និង​ក្រុង​មូ​ស្គូ​ចាប់តាំងពី​ឆ្នាំ​២០១៤​មក​នៅពេលដែល​ប្រទេស​រុស្ស៊ី​កាត់​បញ្ចូល​តំបន់ Crimea ជា​ឧបសម្ព័ន្ធ​និង​ជម្លោះ​ដែល​ផ្ទុះឡើង​នៅ​ភាគ​ខាងកើត​ប្រទេស​អ៊ុយ​ក្រែ​ន​។​

មន្ទីរ​បញ្ច​កោណ​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ថ្ងៃនេះ សហរដ្ឋអាមេរិក​និង​សម្ព័ន្ធមិត្ត​បាន​អនុវត្ត​ការហោះហើរ​មិនធម្មតា​មួយ​ក្រោម​សន្ធិសញ្ញា “​មេឃ​បើកចំហ​”​។ ពេលវេលា​នៃ​ការហោះហើរ​នេះ​គឺ​ដើម្បី​បញ្ជាក់​ជាថ្មី​នូវ​ការប្តេជ្ញាចិត្ត​របស់​សហ​រដ្ឋ​អាមេរិក​ចំពោះ​ប្រទេស​អ៊ុយ​ក្រែ​ន​និង​ប្រជាជាតិ​ជា​ដៃគូ​ដទៃទៀត​”​។​

សន្ធិសញ្ញា​មេឃ​បើកចំហ​គឺ​សំដៅ​ជំរុញ​តម្លាភាព​ខាង​យោធា​តាមរយៈ​ការហោះហើរ​អង្កេត​តាម​ដានដែល​មិនមាន​អាវុធ​លើ​ផ្ទៃដី​នៃ​ប្រទេស​ហត្ថលេខី​នីមួយៗ​ចំនួន​៣៤​។​

មន្ទីរ​បញ្ច​កោណ​បាន​និយាយថា នេះ​គឺជា​ការហោះហើរ “​មិនធម្មតា​” លើកដំបូង​ក្រោម​សន្ធិសញ្ញា​មេឃ​បើកចំហ​ចាប់តាំងពី​ឆ្នាំ​២០១៤​មក​។ ការហោះហើរ​បែបនេះ​គឺ​កើតឡើង​ក្រៅពី​កាលវិភាគ​នៃប្រតិបត្តិ​ការធម្មតា​ដែល​គ្រោងទុក​នៅពេល​មាន​ស្ថាន​ភាពមិនប្រក្រតី​កើតឡើង​។​

គួរ​បញ្ជាក់ថា បន្ទាប់ពី​ឧបទ្ទវហេតុ​កាលពី​ខែ​មុន ប្រទេស​រុស្សី​បាន​នាំខ្លួន​នាវិក​អ៊ុយ​ក្រែ​ន​ចំនួន​២៤​នាក់​ទៅក្នុង​មន្ទីរឃុំឃាំង​។ នាវិក​ទាំងនេះ​បានបង្ហាញ​ខ្លួន​នៅមុខ​តុលាការ​មួយ​ក្នុង​ទីក្រុង Simferopol ដែលជា​ទីក្រុង​សំខាន់​មួយ​នៅក្នុង​តំបន់ Crimea ហើយ​បាន​បញ្ជា​អោយ​ឃុំឃាំង​មុន​ការកាត់ទោស​សម្រាប់​រយៈ​ពេល​ពីរ​ខែ​៕ AFP