ព័ត៍មានទាន់​ហេតុការណ៏
Search

ផ្ទុះ​កំប៉ុង​ហ្គាស៍ ​ឆេះ​ផ្ទះបាយ និង​រោង​មាន់​ប្រជាពលរដ្ឋ ​នៅ​ប៉ៃលិន​

ប៉ៃលិន ​៖ អគ្គិភ័យ​មួយ បាន​ឆាប់ឆេះ​ផ្ទះបាយ និង​រោង​មាន់ ប្រជាពលរដ្ឋ​មួយកន្លែង តែ​សំណាងល្អ មិន​បង្ក​ឲ្យ​រាលដាល​ដ៏​ផ្ទះ​នាក់​ជិតខាង ដោយសារតែ​មានការ​អន្តរាគមន៍​ពី​ប្រជាពលរដ្ឋ និង​រថយន្ត​ពន្លត់​អគ្គិភ័យ​របស់​ស្នងការ​នគរបាល​ខេត្ត ជួយ​អន្តរាគមន៍​បាញ់​ពន្លត់​ទាន់ពេលវេលា​។

ហេតុការណ៍​គ្រោះ​អគ្គិភ័យ​ខាង​លើ​នេះ បាន​កើតឡើង​កាលពី​វេលា​ម៉ោង​២៣​និង​៣០​នាទី​យប់ ​ថ្ងៃ​ទី​០៦ ខែ​ធ្នូ ឆ្នាំ​២០១៨ ស្ថិត​នៅ​ចំណុច​ខាងកើត​ផ្លូវ​ទល់មុខ​រោង​សិប្បកម្ម​១​កន្លែង ក្នុង​ភូមិ​ប៉ា​ហ៊ី​ត្បូង សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន។​

តាម​ប្រភពព័ត៌មាន​ពី​សមត្ថកិច្ច​ការិយាល័យ​ពន្លត់អគ្គិភ័យ​ខេត្ត​បាន​ឲ្យ​ដឹងថា​ ម្ចាស់ផ្ទះ​រងគ្រោះ​ឈ្មោះ ហាក់ ស្រីមុំ ភេទ​ស្រី អាយុ ៥២​ឆ្នាំ មាន​ទីលំនៅ​ក្នុងភូមិ​ប៉ា​ហ៊ី​ត្បូង សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន។ ​បើ​យោងតាម​អ្នកជិតខាង​ប្រាប់ថា មុនពេល​កើតហេតុ គេ​បាន​ឮ​សំឡេង​ផ្ទុះ​ផ្តើម​ចេញ​ពី​ក្នុង​ផ្ទះ​ស្ត្រី​រងគ្រោះ​ខាងលើ បន្ទាប់មក​ក៏​ស្រាប់​តែមាន​អណ្ដាតភ្លើង​ឆេះ​យ៉ាង​សន្ធោសន្ធៅ ​​និង​បាន​បង្ក​ការ​ភ្ញាក់ផ្អើល​ដល់​ប្រជាពលរដ្ឋ ដែល​នៅ​ក្បែរ​នោះ នាំគ្នា​យក​បំពង់​ពន្លត់​អគ្គិភ័យ ព្រមទាំង​រាយការណ៍​ទៅ​សមត្ថកិច្ច​ពន្លត់​អគ្គិភ័យ​ខេត្ត ឲ្យ​ចុះ​អន្តរាគមន៍។

ប្រភព​ព័ត៌មាន​បាន​បន្តថា ភ្លាមនោះ ក្រោម​ការ​បញ្ជា​ផ្ទាល់​ពី​លោក​ឧត្ដមសេនីយ៍​ត្រី ជា ចាន់​ឌិន ស្នង​ការ​នគរបាល​ខេត្ត​ប៉ៃលិន បាន​បញ្ជូន​រថយន្ត​ពន្លត់​អគ្គិភ័យ​ចំនួន​ពីរ​គ្រឿង ចុះមក​អន្តរាគមន៍​ជួយ​ដល់​ប្រជាពលរដ្ឋ​រងគ្រោះ​ទាន់ពេលវេលា មិន​បណ្ដាល​ឲ្យ​នរណា​ម្នាក់​រងគ្រោះ​ដល់​អាយុជីវិត មិន​បង្ក​រីក​រាលដាល​ដល់​ផ្ទះ​អ្នកជិតខាង​ដែរ។

​ប្រភពព័ត៌មាន​បាន​បន្តទៀតថា​ ហេតុការណ៍​គ្រោះ​អគ្គិភ័យ​ខាងលើនេះ បាន​ឆាបឆេះ​ទ្រព្យសម្បត្តិ​នៅ​ខាងក្នុង​ផ្ទះ​អស់​បន្តិចបន្តួច​តែប៉ុណ្ណោះ ដោយសារតែ​មានការ​អន្តរាគមន៍​ពី​ប្រជា​ល​ពលរដ្ឋ និង​រថយន្ត​ពន្លត់​អគ្គិភ័យ​ខេត្ត។​

សមត្ថកិច្ច​បាន​បញ្ជាក់​ថា មូលហេតុ​ នៃ​ការ​ឆេះ​ខាងលើនេះ បណ្តាលមកពី​ការ​ផ្ទុះ​កំប៉ុង​ហ្គាស៍ នៅ​ក្នុង​ចង្ក្រាន​ដាំបាយ ដែល​ម្ចាស់ផ្ទះ​បើក​ហ្គាស៍ ដោយ​ទុកចោល​ ទើប​បង្ក​ឲ្យ​ផ្ទុះ​ឆេះ​បែបនេះ​។​

គួរ​បញ្ជាក់​ដែរ​ថា បច្ចុប្បន្ន​ ពលរដ្ឋ​ក្នុង​ខេត្ត​ប៉ៃលិន មិន​ថា​នៅ​ជនបទ ​ឬ​ទីក្រុង​នោះទេ ភាគច្រើន​មិន​សូវ​ជា​ប្រើប្រាស់​អុស ​ឬ​ធ្យូង​នោះឡើយ ដោយ​ចាប់ផ្ដើម​ប្រើប្រាស់​កំប៉ុង​ហ្គាស៍ ​ឬ​ធុង​ហ្គាស៍​វិញ​ ព្រោះ​វា​ងាយ​ស្រួយ​ក្នុង​ការប្រើ និង​ទាន់ពេលវេលា ​ក្នុងការ​ធ្វើ​របស់​អ្វី​សម្រាប់​អាហារ​ប្រចាំថ្ងៃ​ផង​ដែរ ។ ​ប៉ុន្តែ​ក្នុងការ​ប្រើប្រាស់​កំប៉ុង​ហ្គាស៍​នេះដែរ ក៏​ត្រូវមាន​ការប្រុងប្រយ័ត្ន​ផង​ដែរ ចំពោះ​កំប៉ុង​ហ្គាស៍​ចាស់ៗ ,​កំប៉ុង​ហ្គាស៍​ទុកចោល​យូរ ,​កំប៉ុង​ហ្គាស៍​ទុក​ក្នុង​កម្ដៅ​ថ្ងៃ​ក្ដៅ និង​ការ​ប្រើ​ទុយយោ​ចាស់​ មាន​ធ្លាយ​ភ្ជាប់​ជា​ធុង​ហ្គាស៍​ជាដើម​ផង​ដែរ៕

​