ព័ត៍មានទាន់​ហេតុការណ៏
Search

ខ្សែប្រយុទ្ធ​កូរ៉េខាងត្បូង Gi Sung Yeon ត្រឡប់​មក​ប្រកប​អាជីព​នៅ​ប្រទេស​កម្ពុជា​វិញ​ដោយ​ចូលរួម​ជាមួយ​ព្រះខ័ន​រាជ​ស្វាយរៀង

​ខ្សែប្រយុទ្ធ​ជនជាតិ​កូរ៉េខាងត្បូង គឺ​កីឡាករ Gi Sung Yeon ដែល​ធ្លាប់​ចូលរួម​ជាមួយ​ក្លិប​ភ្នំពេញ​ក្រោ​ន សមាជិក​ក្នុង​លី​គ​កំពូល​កម្ពុជា កាលពី​រដូវ​កាល​ឆ្នាំ​២០១៧-២០១៨​កន្លងទៅ នៅ​ពេល​នេះ​បាន​ត្រឡប់​មក​ប្រទេស​កម្ពុជា វិញ​ហើយដោយ​ចូលរួម​ជាមួយ​ក្រុម​ព្រះខ័ន​រាជ​ស្វាយរៀង បន្ទាប់ពី​រូបគេ​ផុត​កិច្ចសន្យា​រយៈពេល​ពាក់កណ្ដាល​រដូវ​កាល​នៅ​លី​គ​កំពូល​ប្រទេស​ម៉ាឡេស៊ី​។

​យោងតាម​សេចក្តីប្រកាស​របស់​ក្លិប​ព្រះខ័ន​រាជ​ស្វាយរៀង នៅ​ថ្ងៃ​សុក្រ ទី​៧ ខែធ្នូ នេះ​កីឡាករ Gi Sung Yeon បានសម្រេច​ចុះកិច្ចសន្យា​រយៈពេល​១​រដូវ​កាល​ជាមួយ​ក្លិប​ខ្លួន ស្រប​ពេល​រូបគេ​ជា​កីឡាករ​បរទេស​ទី​៣​នៅ​ក្រុម​ព្រះខ័ន​រាជ​ស្វាយរៀង បន្ទាប់ពី​កីឡាករ​ជប៉ុន Daisuke Kobayashi ដែលជា​សមាជិក​កាលពី​រដូវ​កាល​មុន រួម​ម​ជាមួយ Harley Willard ដែល​ទើប​ចុះកិច្ចសន្យា​កាលពី​ប៉ុន្មាន​ខែ​មុន​។

​កីឡាករ Gisung Yeon កើត​នៅ​ថ្ងៃទី​១ ខែសីហា ឆ្នាំ​១៩៨៩ នៅ​ទីក្រុង Suwon នៃ​សាធារណរដ្ឋ​កូរ៉េខាងត្បូង​។ អាជីព​បាល់ទាត់​របស់​គេ​មានកំណើត​ចេញពី​សាលា Baekam High School នៅ​ទីក្រុង Yongin និង​បន្ត​ចេញទៅ​សកល​វិទ្យាល័យ Honam University ក្នុង​ទីក្រុង Gwangju មុន​ចេញ​ទៅលេង​នៅ​ក្លិប​Gyeongnam ដែលជា​សមាជិក​នៃ​លី​គ​កំពូល​កូរ៉េខាងត្បូង​។

រូបគេ​បាន​ដើរចេញ​ប្រកប​អាជីព​នៅក្រៅ​ប្រទេស​ចាប់ពី​ឆ្នាំ​២០១១ មក​ដោយ​ធ្វើដំណើរ​មកកាន់​ប្រទេស​ថៃ ចូលរួម​ជាមួយ​ក្រុម​TTM Phichit, BEC Tero, PTT Rayong តែ​នៅ​ឆ្នាំ​២០១៥ គេ​បាន​ផ្លាស់​ទៅលេង​នៅ​ក្លឹប Yadanarbon ក្នុង​ប្រទេស​មី​យ៉ាន់​ម៉ា វិញ​ម្តង​។ ក្នុង​ពាក់​កណ្តាល​រដូវ​កាល​ឆ្នាំ​២០១៦ គេ​បាន​ត្រឡប់​មក​ចូលរួម​ជាមួយ​ក្រុម​Bangkok Christian College​នៅ​ប្រទេស​ថៃ​សាជាថ្មី​ម្តងទៀត​។ លុះដល់​ដើមឆ្នាំ​២០១៧ គេ​បានធ្វើ​ដំណើរ​មកកាន់​រាជធានី​ភ្នំពេញ ដោយ​ចូលរួម​ជាមួយ​ក្រុម​ភ្នំពេញ​ក្រោ​ន មួយ​រដូវ​កាល​។​

ក្រោយ​ចប់​រដូវ​កាល​ឆ្នាំ​២០១៧ នេះ​រូបគេ​ជា​កីឡាករ​បរទេស​១​រូប​ក្នុងចំណោម​៣​រូប​ដែល​ក្លិប​ភ្នំពេញ​ក្រោ​ន សម្រេច​មិន​បន្ត​កិច្ចសន្យា​សម្រាប់​រដូវ​កាល​ក្រោយ​ថែមទៀត​។ អំឡុងពេល​រួមរស់​ជាមួយ​ក្រុម​ភ្នំពេញ​ក្រោ​ន កីឡាករ Gi Sung Yeon ធ្លាប់​រក​គ្រាប់​បាល់​ឱ្យ​ក្រុម​ចំនួន​១១​នាក់​គ្រាប់ ខណៈ​រូបគេ​ក៏ត្រូវ​ខកខាន​ប្រកួត​មួយរយៈ​ដែរ​ដោយសារ​រង​របួស​។ ក្រោយ​ចាក​ចេញពី​ក្លិប​ភ្នំពេញ​ក្រោ​ន របស់​កម្ពុជា​នៅ​ពាក់កណ្ដាល​ឆ្នាំ​២០១៨ កីឡាករ Gi Sung Yeon បាន​ទៅ​ចូលរួម​ក្លិប PKNP FC សមាជិក​ថ្មីនៅ​លីគ​កំពូល​ប្រទេស​ម៉ាឡេស៊ី​ផង​ដែរ​៕