ព័ត៍មានទាន់​ហេតុការណ៏
Search

ហ្វូង​សត្វ​គោ​នៅ​ខណ្ឌ​ជាយក្រុង​មួយ​នេះ តែង​បង្ក​គ្រោះថ្នាក់​ដល់​មនុស្ស​ញឹកញាប់

ភ្នំពេញ ៖ ហ្វូង​សត្វ​គោ​នៅក្នុង​ខណ្ឌ​ពោធិ៍​សែន​ជ័យ​មិនមែន​ទើបតែ​ពេលនេះ​នោះ​ទេ​ ដែល​គេ​ប្រលែង​ចោល​បែប​អនាធិបតេយ្យ​អីចឹង​នោះ​តែ​វា​បាន​បង្ក​ភាព​អនាធិបតេយ្យ​បែបនេះ​ជា​យូរ​មក​ហើយ ​ទោះបី​អាជ្ញាធរ​ថ្នាក់​សង្កាត់​ខណ្ឌ​ចុះ​ចាប់​ណែនាំ​ដល់​ម្ចាស់​ស្ទើរ​រាប់មិនអស់​ក៏ដោយ ​ក៏​ហ្វូង​សត្វ​គោ​ទាំងនេះ​ នៅតែ​បង្ក​ភាព​អនាធិបតេយ្យ​បែបនេះ​ជា​ដដែល​។

ប្រជាពលរដ្ឋ​បាន​លើក​ឡើង​ថា សត្វ​គោ​ទាំងនេះ​ត្រូវ​បាន​ម្ចាស់​មួយចំនួន​ចិញ្ចឹម​ហើយ​ប្រលែង​ឲ្យ​ដើរ​សេរី​ពាស​វាល​ពាល​កាល បង្ក​ឲ្យ​ប៉ះពាល់ សណ្តាប់ធ្នាប់ សម្បត្តិ​សាធារណៈ​ និង​អាច​បង្ក​ឲ្យ​មាន​គ្រោះថ្នាក់​ដោយសារ​សត្វ​គោ​ទាំងនោះ​ដើរ​ឆ្លងផ្លូវ ដើរ​ដោយ​សេរី ទាំងយប់​ទាំង​ថ្ងៃ​ម្ចាស់​មិនដែល​អើពើ​រវល់​ពី​ការ​មើល​ថែទាំ​នោះ​ឡើយ។ ហ្វូងគោ​ទាំងនេះ​ដើរ​ត្រាច់ចរ​ទាំងយប់​ទាំង​ថ្ងៃ តាមផ្លូវ​សាធារណៈ​ ជាពិសេស​នៅ​ផ្លូវ​ទំនប់​កប់​ស្រូវ ដែល​ស្ថិតនៅ​សង្កាត់​៣​មាន​ ព្រំប្រទល់​ជាប់​គ្នា មាន​សង្កាត់​ចោមចៅ​ទី​៣​សង្កាត់​ត្រពាំង​ក្រសាំង និង​សង្កាត់​សំរោងក្រោម ទោះជា​កន្លងមក​អាជ្ញាធរ​ខណ្ឌ ដាក់​បទបញ្ជា​ឲ្យ​មន្ត្រី​តាម​បណ្តា​សង្កាត់​ចាត់វិធានការ​ចំពោះ​គោ​ទាំងនោះ ដែល​ម្ចាស់​ចិញ្ចឹម​ហើយ មិន​រវល់​ថែរក្សា​និង​ធ្លាប់​ហៅ​ម្ចាស់ មក​ធ្វើ​ការអប់រំ​ពី​ការ​ផល​ប៉ះពាល់​យ៉ាងណា​ក៏​សកម្មភាព​នេះ​នៅ​ដដែល។

បញ្ហា​នេះ​វា​តែង​កើតឡើង​ជារឿយៗ​ដល់​អ្នក​ធ្វើ​ដំណើរ​តាម​ដងផ្លូវ ​រីឯ​ម្ចាស់​អ្នក​ចិញ្ចឹម មិន​ខ្វាយខ្វល់ ពី​ការ​ប្រឈម បង្ក​គ្រោះថ្នាក់​ដល់​អ្នកដទៃ​អ្វី​ឡើយ​។ ដោយឡែក​នៅ​យប់​ថ្ងៃទី​៦​ខែធ្នូ​ឆ្នាំ​២០១៨​នេះ មាន​គោ​ជាច្រើន​ក្បាល ដែល​ដើរ​តាមផ្លូវ​ទំនប់​កប់​ស្រូវ​ដើរ ពាសវាល​ពាស​កាស​ខ្លះ​ដេក​នៅលើ​ឃឿន​ពុះ​ចែក​ទ្រូងផ្លូវ ខ្លះ​ដេក​តាមផ្លូវ​និង​ខ្លះទៀត​ដើរ​ស៊ី​កាកសំណល់​នៅ​តាម​ដងផ្លូវ មិន​មាន អាជ្ញាធរ ក្នុង​សង្កាត់​ឈឺក្បាល​និង​ចាត់វិធានការ​នោះ​ឡើយ​អាច​ប្រហែល​មកពី​ពួកគាត់​អស់​លទ្ធភាព​ក្នុងការ​ចាត់វិធានការ​ហើយក៍​មិនដឹង ព្រោះ​រឿង​នេះ​វា​មិនមែន​ទើបតែ​កើតឡើង​នៅពេលនេះ​ទេ​គឺ​វា​បាន​កើតឡើង​យូរហើយ​ដោះស្រាយ​មិន​ចេញ​ទេ៕