ទឹកជំនន់ពីទីហ្វុងម៉ាតម៉ូ បង្កការខាតបង់ជាង ២០០ លានដុល្លារ នៅវៀតណាម

ទឹកជំនន់ដែលបង្កឡើងដោយភ្លៀងធ្លាក់ខ្លាំងដោយសារតែព្យុះទីហ្វុងម៉ាតម៉ូ បានបង្ក​ការបំផ្លិចបំផ្លាញយ៉ាងធ្ងន់ធ្ងរនៅទូទាំងតំបន់ភាគខាងជើងនៃប្រទេសវៀតណាម ដោយ​បណ្ដាលឱ្យ​មនុស្ស ១៨ នាក់ស្លាប់ និង​បាត់ខ្លួន ផ្ទះសម្បែង​រាប់សែនខ្នងត្រូវជន់លិច និងហេដ្ឋារចនាសម្ព័ន្ធរងការខូចខាតយ៉ាងដំណំ។ នេះបើតាមការចុះផ្សាយរបស់កាសែត Viet Nam News។

គិតត្រឹមល្ងាចថ្ងៃសុក្រ របាយការណ៍បឋមពីតំបន់ដែលរងផលប៉ះពាល់បានប៉ាន់ប្រមាណថា ការខាតបង់សរុបមានចំនួនជាង ៥,៤៥ ទ្រីលានដុង (ប្រហែល ២០៧ លាន​ដុល្លារអាមេរិក)។

យោងតាមអាជ្ញាធរគ្រប់គ្រងគ្រោះមហន្តរាយ និងទំនប់វារីអគ្គិសនី ចំណុះឱ្យ​ក្រសួងកសិកម្ម និងបរិស្ថានវៀតណាម ខេត្ត Thai Nguyên បានរងការខូចខាតយ៉ាងធ្ងន់ធ្ងរបំផុត គិតជាទឹកប្រាក់ប្រហែល ២,៤ ទ្រីលានដុង បន្ទាប់មកខេត្ត Cao Bằng ២ ទ្រីលានដុង និងខេត្ត Lạng Sơn ១,០៥ ទ្រីលាន​ដុង។

ទឹកជំនន់បាន​បង្កការជន់លិចផ្ទះសម្បែង ប្រមាណជាង ២៣០ ០០០ ខ្នង នៅទូទាំងតំបន់ភាគខាងជើងនៃប្រទេស​វៀតណាម ខណៈជន់លិច ឬបំផ្លិចបំផ្លាញផលដំណាំ រួមទាំងស្រូវ ជាង ២៥ ០០០ ហិចតា។

គួរគូសបញ្ជាក់ថា តំបន់ភាគកណ្ដាល និងខាងជើងវៀតណាមបាន​រងនូវការវាយប្រហារដោយផ្ទុះទីហ្វុងជាបន្តបន្ទាប់នៅឆ្នាំនេះ ដែលបង្កជាគ្រោះទឹកជំនន់ធ្ងន់ធ្ងរ ដោយសារភ្លៀងធ្លាក់ខ្លាំងជោគជាំ ការរអិលបាក់ដី ជំនោរទឹកសមុទ្រ ព្យុះកំបុងត្បូង និងខ្យល់កន្រ្តាក់ខ្លាំងក្លាជាដើម។

ម៉ាតម៉ូ គឺជាទីហ្វុង​ចុងក្រោយ​បំផុតដែលវាយប្រហារកាលពីថ្ងៃចន្ទដើមសប្ដាហ៍ ពោលគឺត្រឹមតែ ៧ ថ្ងៃប៉ុណ្ណេះ ក្រោយទីហ្វុងប៊ូឡូយ វាយប្រហារតំបន់ភាគខាងជើងក្បែរកណ្ដាលវៀតណាម ដោយ​សម្លាប់មនុស្សជាង ៥០ នាក់៕