មុន DJ Ngan 98 បុគ្គលល្បីៗទាំងនេះ ក៏ត្រូវចាប់ខ្លួន ពីបទលក់ទំនិញក្លែងក្លាយដែរ

នាថ្ងៃទី ១៣ ខែតុលា ប៉ូលិសទីក្រុងហូជីមិញបានកាត់ទោសជាផ្លូវការ និងចេញដីកាឃុំខ្លួនបណ្តោះអាសន្នលើ Vo Thi Ngoc Ngan (DJ Ngan 98) ពីបទផលិត និងជួញដូរផលិតផលអាហារក្លែងក្លាយ ព្រមទាំងមាន​សារធាតុ​ហាមឃាត់។ ព័ត៌មានមួយនេះ បានទាក់ទាញចំណាប់អារម្មណ៍សាធារណៈយ៉ាងឆាប់រហ័ស។

យ៉ាងណាមិញ នៅមុនពេលដែលផ្ទុះរឿងចម្រូងចម្រាសនៅមានតារាជាច្រើនទៀត ក៏ត្រូវបានកាត់ទោសពីបទលក់ទំនិញក្លែងក្លាយផងដែរ។ ដូច្នេះ ករណី​ DJ Ngan 98 ដែល​ត្រូវ​កាត់​ទោស​មិន​មែន​ជា​រឿង​ដាច់​ដោយ​ឡែក​ទេ។

នៅឆ្នាំ ២០២៥ ដដែល តារាល្បីជាច្រើនត្រូវបានស៊ើបអង្កេតសម្រាប់ការជាប់ពាក់ព័ន្ធរបស់ពួកគេក្នុងការផលិត ការផ្សាយពាណិជ្ជកម្ម និងការជួញដូរទំនិញក្លែងក្លាយ ដែលបង្ហាញពីការពិតគួរឲ្យព្រួយបារម្ភនៃឧស្សាហកម្មអាជីវកម្មអនឡាញ ពឹងផ្អែកលើមនុស្សល្បី។

កាលពីខែមិថុនា ប៉ូលិសខេត្ត Ninh Binh បានចាប់ខ្លួន Le Van Hai ម្ចាស់ប៉ុស្តិ៍ TikTok ដែលមានឈ្មោះថា Gia Dinh Hai Sen ដែលមានអ្នកតាមដាន ២.៦ លាននាក់ និង Tran Dai Phuc នាយកក្រុមហ៊ុន Hai Be Company Limited ពីបទជួញដូរទំនិញក្លែងក្លាយ។

មនុស្សពីរនាក់នេះល្បីល្បាញដោយសារការផ្សាយពាណិជ្ជកម្មផលិតផល Hai Be Delicious Syrup ដែលត្រូវបានណែនាំជា ថ្នាំអព្ភូតហេតុ ដើម្បីជួយកុមារឲ្យញ៉ាំបានល្អ និងបង្កើនភាពស៊ាំ។ ប៉ុន្តែលទ្ធផលវាយតម្លៃបានបង្ហាញថា សារធាតុផ្សំសំខាន់ៗដូចជា វីតាមីន A កាល់ស្យូម និងវីតាមីន C មានតិចជាង ៧០% នៃបរិមាណដែលបានប្រកាស ហើយត្រូវបានគេកំណត់ថាជារបស់ក្លែងក្លាយ។ លើសពីនេះ Hai ក៏បានលក់គ្រឿងសម្អាង និងអាហារមុខងារជាច្រើនទៀត ដែលមិនទាន់បានផ្ទៀងផ្ទាត់គុណភាព។

នៅក្នុងខែមេសា ក្រសួងសន្តិសុខសាធារណៈបានកាត់ទោស Pham Quang Linh (Quang Linh Vlog) និង Nguyen Thi Thai Hang (Hang Du Muc) និងមុខសញ្ញាពាក់ព័ន្ធចំនួនបីពីបទរំលោភលើការផលិតទំនិញក្លែងក្លាយ និងបោកប្រាស់អតិថិជន។ ផលិតផល ស្ករគ្រាប់បន្លែ Kera នៃក្រុមនេះធ្លាប់ធ្វើឲ្យមានការរំជើបរំជួលជាមួយនឹងពាក្យស្លោក «ស្ករគ្រាប់មួយចានស្មើបន្លែ» ដែលត្រូវបានផ្សព្វផ្សាយយ៉ាងទូលំទូលាយដោយបវរកញ្ញា Nguyen Thuc Thuy Tien។

លទ្ធផលតេស្តបានបង្ហាញថា ស្ករគ្រាប់មិនមានផ្ទុកសារធាតុបន្លែដែលបានប្រកាសទេ (ត្រឹមតែ ០៦-០.៧៥% ជំនួសឲ្យ ២៨.១៣%) ហើយថែមទាំងមានផ្ទុកសារធាតុ Sorbitol ដែលជាសារធាតុផ្អែមដែលមិនមាននៅលើស្លាកសញ្ញា។ ក្រោយមក ក្រសួងសន្តិសុខសាធារណៈបានពង្រីកការស៊ើបអង្កេត និងកាត់ទោស និងឃុំខ្លួនបណ្តោះអាសន្នលើ Nguyen Thuc Thuy Tien ពីបទ បោកប្រាស់អតិថិជន។

រឿងអាស្រូវនេះបានបន្តរីករាលដាលនៅពេលដែលនៅចុងខែឧសភា ឆ្នាំ ២០២៥ ប៉ូលិសខេត្ត Dong Nai បានចេញសេចក្តីសម្រេចកាត់ទោសលើករណី ការផលិត និងការជួញដូរទំនិញក្លែងក្លាយ នៅក្រុមហ៊ុន EBC Dong Nai Medical Factory Joint Stock Company ទាក់ទងនឹងក្រុមហ៊ុន VB Group Trading and Service Company Limited ដែលមានលោក Nguyen Quoc Vu ប្តីរបស់ Doan Di Bang ជាតំណាងស្របច្បាប់។

បន្ទាប់ពីកាបូបស្ពាយគ្រឿងសម្អាង និងអាហារមុខងារដែលចែកចាយដោយក្រុមហ៊ុននេះ ត្រូវបានរកឃើញថាបំពានគុណភាព Doan Di Bang ជា KOL ជាស្ត្រីអ្នកមានដែលមានអ្នកតាមដានជាង ១.៧ លាននាក់នៅលើបណ្តាញសង្គមបានលុបផលិតផលទាំងអស់ចេញពីរទេះទិញទំនិញរបស់នាង និងបានរារាំងមតិយោបល់នៅលើ TikTok ។

ឧប្បត្តិហេតុទាំងនេះមិនត្រឹមតែបំផ្លាញរូបភាពនៃអ្នកជំនួញដ៏ល្បីល្បាញប៉ុណ្ណោះទេ ថែមទាំងគំរាមកំហែងដោយផ្ទាល់ដល់សុខភាពសាធារណៈផងដែរ។ ដោយសារតែជនរងគ្រោះភាគច្រើនជាអ្នកប្រើប្រាស់ដែលជឿជាក់លើឈ្មោះដោយជឿថា ផលិតផលដែលមនុស្សល្បីប្រើគឺជាផលិតផលល្អ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

រកឃើញថ្នាំសម្រក​ទម្ងន់​៣​មុខ របស់ DJ វៀតណាម ​ផ្ទុក​សារធាតុ​ហាមឃាត់