ព័ត៍មានទាន់​ហេតុការណ៏
Search

បើក​គោយន្ត​លឿន​មិន​ប្រយ័ត្ន​ ក្រឡាប់​ខ្លួនឯង​ ស្លាប់​ម្នាក់ របួសធ្ងន់​និង​ស្រាល​៣​នាក់​ នៅ​ស្រុក​បរ​កែវ​

​រតនគិរី ៖ យ៉ាងហោចណាស់ ​បុរស​ម្នាក់​ បាន​ស្លាប់​ភ្លាមៗ​នៅ​កន្លែងកើតហេតុ​ និង​៣​នាក់​ផ្សេងទៀត​បាន​រងរបួស​ធ្ងន់​និង​ស្រាល បន្ទាប់ពី​ជួប​គ្រោះថ្នាក់​ចរាចរណ៍​ក្រឡាប់​គោយន្ត​កែច្នៃ​ដោយ​ខ្លួនឯង​។​

​ករណី​ក្រឡាប់​គោយន្ត​ខ្លួនឯង​នេះ ​បាន​កើតឡើង​នៅវេលា​ម៉ោង​៧​និង​១៨​នាទី​ព្រឹក ​ថ្ងៃ​អង្គារ ១០​កើត ខែបុស្ស ឆ្នាំច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី​១៥ ខែមករា ឆ្នាំ​២០១៩ តាម​បណ្តោយ​ផ្លូវជាតិ​លេខ​៧៨ ត្រង់ចំណុច​ទល់មុខ​ចម្ការ​យាយ​ចិន ស្ថិតក្នុង​ភូមិ​លូត ឃុំ​ទីង​ចាក់ ស្រុក​បរ​កែវ​។​

​អធិការនគរបាល​ស្រុក​បរ​កែវ​ លោក ជួប វណ្ណ​រក្ស បាន​ឲ្យ​កម្ពុ​ជាថ្មី ឲ្យ​ដឹង​នៅ​រសៀល​ថ្ងៃទី​១៥​មករា​នេះ​ថា ខណៈ​គោយន្ត​កែច្នៃ​មួយគ្រឿង​ បើកបរ​ក្នុង​ល្បឿន​លឿន ​ជ្រុល​ចង្កូត​ធ្លាក់​ផ្លូវថ្នល់ ​ក្រឡាប់​ផ្ងារ​ជើង​ឡើងលើ ​ហើយ​កិន​មនុស្ស​ម្នាក់​ស្លាប់ និង​​អ្នករួមដំណើរ​៣​នាក់ ដោយ ៖​
​ទី​១-​ឈ្មោះ វូ ខូ​រ ភេទ​ប្រុស អាយុ​១៨​ឆ្នាំ ជនជាតិ​ទំពួន បច្ចុប្បន្ន​រស់នៅ​ភូមិ​លុង​ឃុ​ង ឃុំ​លុង​ឃុ​ង ស្រុក​បរ​កែវ ខេត្ត​រតនគិរី​(​ស្លាប់​)​។ ទី​២-​ឈ្មោះ​ សៀន សេ​ម៉ា ភេទ​ប្រុស អាយុ​២១​ឆ្នាំ ជនជាតិ​ទំពួន បច្ចុប្បន្ន​រស់នៅ​ភូមិ​អុល ឃុំ​ប៉ា​តាង ស្រុក​លំផាត់ ខេត្ត​រតនគិរី (​របួសស្រាល​)​។ ទី​៣-​អ្នកបើកបរ​គោយន្ត​កែច្នៃ​ឈ្មោះ រ៉េវ ចាន់​រី ភេទ​ប្រុស អាយុ​២៥​ឆ្នាំ ជនជាតិខ្មែរ បច្ចុប្បន្ន​រស់​ភូមិ​ដី​ឡូ ឃុំ​ជ័យ​ឧ​ត្ត​ម ស្រុក​លំផាត់ ខេត្ត​រតនគីរី ក្រោយ​កើតហេតុ បាន​រត់​គេចខ្លួនបាត់​។ ទី​៤-​ឈ្មោះ ម៉េង មេសា ភេទ​ប្រុស អាយុ​២៤​ឆ្នាំ ជនជាតិខ្មែរ។ បច្ចុប្បន្ន​រស់នៅ​ភូមិ​អុល​ ឃុំ​ប៉ា​តាង ស្រុក​លំផាត់ ខេត្ត​រតនគិរី (​របួសធ្ងន់​)​។​

​ក្រោយ​កើតហេតុ​ នគរបាល​មូលដ្ឋាន​ បាន​ចុះមក​អន្តរាគមន៍ ​ដឹក​បញ្ជូន​ជនរងគ្រោះ​ទៅ​មន្ទីរពេទ្យ​បង្អែក​ខេត្ត​ ដើម្បី​ជួយសង្គ្រោះ​។ រីឯ​សព ​សមត្ថកិច្ច​បានប្រគល់​ទៅ​ឲ្យ​សាច់ញាតិ​យកទៅ​ធ្វើបុណ្យ​ទៅតាម​ប្រពៃណី​ផងដែរ​។​

​ដោយឡែក​ គោយន្ត​កែច្នៃ​ សមត្ថកិច្ច​បាន​រឹបអូស​យកមក​រក្សាទុក​នៅ​ប៉ុស្តិ៍​ឃុំ​ទីង​ចាក់ ​ដើម្បី​ចាត់​វិធានការ​ទៅតាម​នីតិ​វិធី​ច្បាប់​៕