អ្នកជំនាញ​វៀតណាមចេញការព្រមាន ក្រោយមនុស្សជាង ២០០ នាក់ ពុលនំបុ័ងដាក់សាច់ នៅ​ហូជីមិញ

អ្នកជំនាញសុខាភិបាល​នៅវៀតណាម​បាន​ចេញការព្រមាន ដោយ​ស្នើឱ្យ​មាន​ការវិធានការសុវត្ថិភាពចំណីអាហារត្រឹមត្រូវ ក្រោយ​មនុស្សប្រមាណ ២៣៥ នាក់នៅទីក្រុងហូជីមិញ​ បាន​ពុលចំណី ​ក្រោយ​បរិភោគបាញ់មី(នំ​បុ័ងដាក់សាច់) ចន្លោះពីថ្ងៃព្រហស្បតិ៍សប្ដាហ៍មុន ដល់ថ្ងៃចន្ទ ដើមសប្ដាហ៍នេះ។

តាមការចុះផ្សាយរបស់កាសែត Tuoi Tre ​កាលពីថ្ងៃអង្គារ​ មន្ទីរសុខាភិបាលទីក្រុងហូជីមិញ បាន​ឱ្យដឹងថា ក្នុងចំណោមអ្នកពុលចំណីទាំង​ជាង ២០០ នាក់នោះ មាន​ ១ ករណី ​ស្ថិតក្នុង​​​ស្ថានភាព​ធ្ងន់ធ្ងរ។ បាក់តេរី Salmonella ​អាច​ជាមូលហេតុចម្បង ​ដែលដូចគ្នានឹង​ករណីពុលចំណីពីការបរិភោគ ​នំំបុ័ងដាក់សាច់ កាលពីមុនៗដែរ។​

អ្នកជំនាញម្ហូបអាហារវៀតណាម បាន​និយាយថា ការពុលនំំបុ័ងដាក់សាច់ អាច​មកពីគ្រឿងផ្សំផ្សេងៗរបស់អាហារប្រភេទនេះ ជាជាងនំបុ័ង។ ​ ពួកគេបានព្រមានថា គ្រឿងផ្សំដូចជាសាច់ជ្រូក​ ប៉ាតេ សាច់ក្រក ត្រសក់ ទឹកជ្រលក់ម្ទេស និងបន្លែឆៅ ងាយនឹងឆ្លង​បាក់តេរីបំពុល​។

ប៉ាតេមានហានិភ័យខ្ពស់បំផុត ព្រោះវាត្រូវបានផលិតចេញពីថ្លើមចំហុយ និងខ្លាញ់ជ្រូក ដែលអាចនឹងមិនសម្លាប់បាក់តេរីទាំងអស់នោះទេ។ ប្រសិនបើរក្សាទុកមិនត្រឹមត្រូវ បាក់តេរីអាចកើនឡើងយ៉ាងឆាប់រហ័ស ​ដែលទោះការកំដៅវា ​ក៏មិនអស់ជាតិពុល។

ហាង​នំំបុ័ងដាក់សាច់ធំៗ ប្រឈមមុខនឹងហានិភ័យខ្ពស់ ព្រោះពួកគេប្រើប្រាស់គ្រឿងផ្សំជាច្រើន ដែល​ត្រជាក់ និងមិនបានកំដៅ​ ​ខណៈ​អនាម័យ ឬការ​ស្ដុកទុក​មិនល្អ ​អាចធ្វើឱ្យការចម្លងមេរោគកាន់​តែអាក្រក់។

ជាធម្មតា រោគសញ្ញា​នៃបាក់តេរី Salmonella រួមមានរាគ គ្រុនក្តៅ រមួលក្រពើ និងចង្អោរ។ ​អ្នកពុលចំណីភាគច្រើនក្នុងករណីពុលបាញ់មី បាន​ជាសះស្បើយ ប៉ុន្តែកុមារ និងមនុស្សចាស់ អាចទទួលរងនូវផលវិបាកធ្ងន់ធ្ងរដូចជា សម្ពាធឈាមចុះទាបខ្លាំង ឬខ្សោយតម្រងនោម។ ប្រហែល ៨% ​នៃករណីពុលចំណី អាចនាំឱ្យមានការឆ្លងមេរោគក្នុងចរន្តឈាម។

អ្នកជំនាញ បាន​ជំរុញឱ្យអ្នកលក់បង្កើនសុវត្ថិភាពចំណីអាហារដោយធានាការគ្របគ្រង ការស្ដុកទុក និងការរៀបចំឱ្យបានត្រឹមត្រូវ ដើម្បីការពារការផ្ទុះឡើង​ករណីពុលអាហារ ​នាពេលអនាគត។

រដ្ឋបាលចំណីអាហារវៀតណាម (VFA) ​​របស់​ក្រសួងសុខាភិបាល បាននិយាយថា ខ្លួនកំពុងរៀបចំសេចក្តីព្រាងគោលការណ៍ណែនាំថ្មីស្តីពីសុវត្ថិភាពចំណីអាហារសម្រាប់អ្នកលក់ដូរតាមចិញ្ចើមផ្លូវ និងផ្ទះបាយរួម ដោយគ្របដណ្តប់លើការជ្រើសរើសគ្រឿងផ្សំ ការរក្សាទុក ការបង្ការការចម្លងរោគ និងនីតិវិធីដោះស្រាយសម្រាប់ករណីសង្ស័យថាមានការពុលអាហារជាដើម៕