ព័ត៍មានទាន់​ហេតុការណ៏
Search

ក្រុម​អាជីវករ​ផ្សារ​ព្រៃ​សណ្ដែក​ស្រុក​ទ្រាំង​ នៅតែ​មាន​ការ​តវ៉ា​ជាមួយ​ក្រុមហ៊ុន​វិនិយោគ​ផ្សារ​ដដែល​បើ​ទោះបី​មានការ​ចុះ​អន្តរាគមន៍​ពី​លោក​ចៅហ្វាយខេត្ត​ជាច្រើនលើក​ក៏ដោយ

តាកែវ​ ៖​ ក្រុម​អាជីវករ​ ដែល​ធ្លាប់​មាន​តូប​លក់ដូរ​នៅ​ក្នុង​ផ្សារ​ព្រៃ​សណ្ដែក​ចាស់​ ស្រុក​ទ្រាំង ខេត្ត​តាកែវ នៅតែ​មាន​ការ​តវ៉ា​ជាមួយ​នឹង​ក្រុមហ៊ុន​វិនិយោគ​ផ្សារ​ដដែល ​បើ​ទោះ​បី​មានការ​ចុះ​សម្របសម្រួល​ពី​លោក អ៊ូច ភា អភិបាល​នៃ​គណៈ​អភិបាល​ខេត្ត​តាកែវ​ជាច្រើន​លើក​ច្រើនសា​​ក៏ដោយ។

ក្រុម​អាជីវករ ​ដែល​នាំគ្នា​ធ្វើការ​តវ៉ា​ទាំង​នោះ​ បាន​អះអាង​ថា ក្រុមហ៊ុន​វិនិយោគ​ផ្សារ​ព្រៃ​សណ្តែក​ថ្មី​នេះ នៅតែ​រំលោភ​លើ​កិច្ចសន្យា​ចំពោះ​ពួកគាត់​ដដែល​ពាក់ព័ន្ធ នឹង​ទំហំ​តូប តម្លៃ​តូប និង​ទីតាំង​ដែល​ពួកគាត់​ធ្លាប់​លក់​ពីមុន ពិសេស​អាជីវករ​ចាស់​ក្រុមហ៊ុន​គ្មាន​តូប​លក់​ឲ្យ បែរជា​មាន​តូប​លក់​ទៅ​ឲ្យ​អាជីវករ​ថ្មី​ទៅវិញ​។ ក្រោយពី​មានការ​ចុះ​សម្របសម្រួល​ពី​លោក អ៊ូច ភា អភិបាល​នៃ​គណៈ​អភិបាលខេត្ត​តា​កែវ​កន្លងទៅ​ថ្មីៗ​នេះ​ដូចជា​មិនមាន​ផ្លែផ្កា នៅ​ព្រឹក​ថ្ងៃទី​១១ ខែកុម្ភៈ ឆ្នាំ​២០១៩​​ ក្រុមអាជីវករ​បាន​ផ្ទុះ​ការតវ៉ា​ជាថ្មី​ម្តងទៀត ​ស្រប​ពេលដែល​លោក​អភិបាល​ខេត្តតាកែវ​ក៏មាន​វត្តមាន​ក្នុងពេល​នោះដែរ​។ ជាមួយនឹង​វត្តមាន​លោក​អភិបាល​ខេត្តតាកែវ​ដែល​ចុះ​ដោះស្រាយ​នាពេលនេះ ពន្លឺ​នៃ​ក្តីសង្ឃឹម​របស់​ក្រុមអាជីវករ​ហាក់​មានព​ន្លឺ​តិចតួច ព្រោះ​លោក​បាន​លើក​ពេល​សម្រាប់​ការ​ដោះស្រាយ​ជូន​ពួកគាត់​ទៅ​ថ្ងៃ​ខាងមុខ​ទៀត​។​

​ពាក់ព័ន្ធ​នឹង​សំណង់​ផ្សារ​ព្រៃ​សណ្តែក​ថ្មី​នេះ លោក នួន សុធា ប្រធាន​មន្ទីរ​សូ​រិ​យោ​ដី​នគរូបនីយកម្ម​និង​សំណង់​ខេត្តតាកែវ​ធ្លាប់​បានចេញ​លិខិត​បំភ្លឺ​ផងដែរ ដោយ​ក្នុង​លិខិត​ដែល​លោក​ប្រធាន​មន្ទីរ​បំភ្លឺ​នោះបាន​សង្កត់ធ្ងន់​៤​ចំណុច​ដែល​ប្រធាន​វិនិយោគ​ផ្សារ​មួយ​នេះ​មិន​គោរព​តាម​គឺ ទី​១​ផ្សារ​ព្រៃ​សណ្ដែក​នេះ​គឺ​ពុំមាន​លិខិតអនុញ្ញាត​ឲ្យ​សាងសង់​នោះទេ​។​ ២. ទំហំ​តូប​ថ្មី​ក្នុង​ផ្សារ​គឺ​តូច​ជាង​ទំហំ​តូប​ដែល​បាន​សន្យា​មុនពេល​សាងសង់​។ ៣.​តូប​ថ្មី​ដែល​បាន​សាងសង់​មិន​គ្រប់​ចំនួន​តូប​ចាស់​ឬ​តូប​ដែល​បាន​កក់​ប្រាក់​។​ ៤. អាជីវករ​ដែល​ទទួល​បាន​តូប​ថ្មី​គឺ​ខុសពី​ទីតាំង​ចាស់​ឬ​នៅ​ឆ្ងាយ​ពី​ទីតាំង​ចាស់​ដែល​ខ្លួន​ធ្លា​ប់​លក់​។​

សូម​បញ្ជាក់​ផង​ដែរ​ថា​ ផ្សារ​ព្រៃ​សណ្ដែក​ថ្មី​នេះ​ត្រូវ​បាន​ទទួល​ការ​សាងសង់​ដោយ ក្រុមហ៊ុន ខេង យ៉ា​រី​ឌី​វេឡុ​ប​មេន អ៊ិន​វេស មេន (​ខេ​. វ៉ា​យ​ឌី​. អ៊ី​) ជិត​រួចរាល់​ទៅហើយ ក៏ប៉ុន្តែ​នៅតែមាន​ការជជែក​តវ៉ា​មិន​សុខចិត្ត​ពី​ក្រុម​អាជីវករ​មួយចំនួន​ដដែល​បើទោះបី​ជាមាន​ការចុះ​សម្របសម្រួល​ពី​លោក អ៊ូច ភា អភិបាល​នៃ​គណៈ​អភិបាល​ច្រើនលើកច្រើនសា​យ៉ាងណាក៏ដោយ​។ ដែល​ចំណុច​នេះ​បានធ្វើ​ឲ្យ​ក្រុមអាជីវករ​មានការ​សង្ស័យ​ទៅលើ​អាជ្ញាធរ​ស្រុក​ក៏ដូចជា​អាជ្ញាធរ​ពាក់ព័ន្ធ​ថា​អាចមាន​ការជាប់​ពាក់ព័ន្ធ​ស៊ុមគ្រលុំ​គ្នា​ជាមួយ​ប្រធាន​ក្រុមហ៊ុន​សាងសង់​ផ្សារ ជា​ថ្នូរ​នឹង​លាភសក្ការៈ​ចូល​ហោប៉ៅ​រៀងៗ​ខ្លួន​៕