ព័ត៍មានទាន់​ហេតុការណ៏
Search

សាច់ញាតិ​របស់​ជនជាតិ​អ៊ុយ​ហ្គ័​រ​ ដែល​បាត់​ខ្លួន​បានទាមទារ​ឲ្យ​ប្រទេស​ចិន​បង្ហាញ​វីដេអូ​ភស្តុតាង​នៃ​ការ​រស់រាន​មានជីវិត

ជនជាតិ​ដើម​ភាគតិច​អ៊ុយ​ហ្គ័​រ​ បាន​ចាប់ផ្ដើម​យុទ្ធនាការ​ជាស​កល​មួយ​ដើម្បី​ជំរុញ​ឲ្យ​ប្រទេស​ចិន​បង្ហាញ​ភស្តុតាង​ជា​វីដេអូ​ថា សាច់ញាតិ​ដែល​បាត់​ខ្លួន​របស់​ពួកគេ​គឺ​នៅ​រស់រាន​មាន​ជីវិត ​បន្ទាប់​ពី​រដ្ឋាភិបាល​ក្រុង​ប៉េកាំង​បាន​ប្រើប្រាស់​វីដេអូ​មួយ​ដើម្បី​ជំទាស់​ទៅ​នឹង​ការ​អះអាង​ដែល​ថា ជនជាតិ​អ៊ុយ​ហ្គ័​រ​ដ៏​ល្បីឈ្មោះ​ម្នាក់​បាន​ស្លាប់​នៅ​ក្នុង​មន្ទីរឃុំឃាំង។

យុទ្ធនាការ​តាម​ប្រព័ន្ធ​ផ្សព្វផ្សាយ​សង្គម​បាន​បើក​ដំណើរការ​កាលពី​ថ្ងៃ​អង្គារ​នៅក្រោម Hashtag #MeTooUyghur បន្ទាប់ពី​ប្រទេស​ចិន​បាន​បញ្ចេញ​វីដេអូ​មួយ​បង្ហាញ​បុរស​ម្នាក់​ដែល​បានកំណត់​អត្តសញ្ញាណ​ខ្លួនឯង​ថា​ជា​អ្នកនិពន្ធ​កំណាព្យ​និង​ជា​តន្ត្រីករ​ជនជាតិ​អ៊ុយ​ហ្គ័​រ​ឈ្មោះ Abdurehim Heyit ហើយ​និយាយថា គាត់​នៅ​រស់រានមានជីវិត​និង​មាន​សុខ​ភាពល្អ។

វីដេអូ​នេះ​ត្រូវបាន​ផ្សព្វផ្សាយ​ជា​សាធារណៈ​បន្ទាប់ពី​ប្រទេស​ទួរគី​អះអាងថា លោក Heyit បាន​ស្លាប់​ក្នុង​ពន្ធនាគារ​ចិន​នៅក្នុង​សេចក្តីថ្លែងការណ៍​មួយ​ដែល​ក្នុងនោះ​រដ្ឋាភិបាល​ទីក្រុង​អង់កា​រ៉ា​បាន​ថ្កោលទោស​ប្រទេស​ចិន​ចំពោះ​ការ​ឃុំឃាំង​ជនអន្តោប្រវេសន៍​ជនជាតិភាគតិច​អ៊ុយ​ហ្គ័​រ​ជាច្រើន​នាក់​នៅក្នុង​ជំរំ “​អប់រំ​ឡើងវិញ​” នៅ​តំបន់​ស៊ីន​ជាំ​ង​ដាច់ស្រយាល។

លោក Murat Harri Uyghur សកម្មជន​ម្នា​ក់នៅ​ប្រទេស​ហ្វាំ​ង​ឡង់​ដែល​បាន​បង្កើត Hashtag នេះ​បាន​និយាយថា “​អាជ្ញាធរ​ចិន​ត្រូវ​បង្ហាញ​វីដេអូ​ជា​ភស្តុតាង​ថា លោក Heyit នៅតែមាន​ជីវិត​។ ឥឡូវនេះ​យើង​ចង់ដឹងថា​តើ​ជនជាតិ​អ៊ុយ​ហ្គ័​រ​រាប់លាន​នាក់​នៅទីណា​? ”​។​

លោក​បាន​ប្រាប់ AFP ថា ឪពុកម្តាយ​របស់លោក​ផ្ទាល់​ត្រូវបាន​ឃុំខ្លួន​ពីមុន​ប៉ុន្តែ​ត្រូវបាន​ដោះលែង​វិញ​កាលពី​ឆ្នាំមុន​។​
Hashtag នេះ​បាន​ជំរុញ​ឲ្យ​មានការ​បង្ហោះ​ពី​ជនជាតិ​អ៊ុយ​ហ្គ័​រ​នៅ​ជុំវិញ​ពិភពលោក​ជាមួយនឹង​រូបភាព​នៃ​ម្តាយ ឪពុក កូនស្រី​ឬ​មិត្តភក្ដិ​ដែល​បាត់​ខ្លួន​ហើយ​ទាមទារ​ឲ្យ​ដឹង​ពី​វាសនា​របស់​ពួកគេ​។​

ក្រុម​អ្នកជំនាញការ​របស់​អង្គការសហប្រជាជាតិ​បាន​និយាយថា ជនជាតិ​អ៊ុយ​ហ្គ័​រ​ជិត​មួយ​លាន​នាក់​និង​ជនជាតិភាគតិច​និយាយ​ភាសា​ទួរគី​ជាច្រើន​នាក់​ទៀត​ត្រូវបាន​ឃុំឃាំង​ក្នុង​ជំរំ​នៅ​តំបន់​ស៊ីន​ជាំ​ង​ដែលជា​កន្លែង​ប្រជាជន​អ៊ុយ​ហ្គ័​រ​ភាគច្រើន​ក្នុងចំណោម​ប្រជាជន​អ៊ុយ​ហ្គ័​រ​ជាង​១០​លាន​នាក់​របស់​ប្រទេស​ចិន​រស់នៅ​៕ AFP



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114