ព័ត៍មានទាន់​ហេតុការណ៏
Search

ក្រុម​សហភាព​សហព័ន្ធ​យុវជន​កម្ពុជា មន្ត្រីរាជការ លោកគ្រូ​អ្នកគ្រូ និង​កងកម្លាំង ប្រដាប់​អាវុធ​ទាំង​៣​ប្រភេទ ស្ម័គ្រចិត្ត​ផ្តល់​ឈាម​ជូន​មន្ទីរពេទ្យ​បង្អែក​ខេត្ត​រតនគិរី ​ក្នុង​ថ្ងៃ​ នៃ​សេចក្ដី​ស្រលាញ់​

​រតនគិរី ៖ ឆ្លើយតប​ទៅ​នឹង​សេចក្ដី​ត្រូវ​ការ​កង្វះខាត​ឈាម​សម្រាប់​សង្គ្រោះ​ជីវិត​មនុស្ស យុវជន សហ​ភាព​សហព័ន្ធ​យុវជន មន្ត្រីរាជការ លោកគ្រូ​អ្នកគ្រូ និង​កងកម្លាំងប្រដាប់អាវុធ​ទាំង៣​ប្រភេទ ​នា​ព្រឹក​ថ្ងៃទី​១៤ ខែ​កុម្ភៈ ឆ្នាំ​២០១៩ បាន​ស្ម័គ្រចិត្ត​អញ្ជើញ​ផ្តល់​ឈាម​ជូន មន្ទីរពេទ្យ​បង្អែក​ខេត្ត​រតនគីរី។​

​លោក​វេជ្ជបណ្ឌិត ហ៊ីង ផាន​សគ​ន្ធា ប្រធាន​មន្ទីរពេទ្យ​បង្អែក​ខេត្ត​បាន​ឲ្យ​ដឹងថា ថ្ងៃ​១៤​កុម្ភៈ ជា​ថ្ងៃ​ នៃ​សេចក្តី​ស្រលាញ់ ហើយ​យុទ្ធសាស្ត្រ​របស់​ក្រសួងសុខាភិបាល​បាន​យក ថ្ងៃ​១៤​កុម្ភៈ​ជា​រៀងរាល់​ឆ្នាំ ជា​ទិវា​ផ្តល់​ឈាម​ ដើម្បី​សង្គ្រោះ​ជីវិត​មនុស្ស​ដែល​ត្រូវការ​ឈាម​។

លោក​វេជ្ជបណ្ឌិត​បាន​បន្ត​ថា ជាក់ស្ដែង​ថ្ងៃ​១៤​ ខែ​កុម្ភៈ ឆ្នាំ​២០១៩ នេះ មាន​ក្រុម​យុវជន​សហភាព​សហព័ន្ធ មន្ត្រីរាជការ លោកគ្រូ​អ្នក​គ្រូ កងកម្លាំងប្រដាប់អាវុធ​ក្នុង​ខេត្ត​ប្រមាណ​ជាង​១០០​នាក់​ បាន​ស្ម័គ្រ​មក​ផ្តល់​ឈាម​ជូន​មន្ទីរពេទ្យ​បង្អែក​ខេត្ត​រតនគិរី។

​សកម្មភាព​នេះ​បញ្ជាក់​ឲ្យ​ឃើញ​ថា យុវជន យុវនារី មន្ត្រីរាជការ លោកគ្រូ​ អ្នកគ្រូ និង​មន្ត្រី​កង​កម្លាំង​ប្រដាប់អាវុធ​ទាំង​៣​ប្រភេទ ពួកគាត់​មានការ​យល់ដឹង​ច្រើន​ទាក់ទង​នឹង​ការ​ផ្តល់​ឈាម​សម្រាប់ ជួយ​សង្គ្រោះ​ជីវិត​មនុស្ស។

លោក​វេជ្ជបណ្ឌិត​បន្ត​ថា នេះ​ជា​លើក​ទី​៦ ហើយ​ដែល​មន្ទីរពេទ្យ​បង្អែ​ខេត្ត​រតនគិរី បាន​ទទួល​ការ​ស្ម័គ្រចិត្ត​ផ្តល់​ឈាម​ពី​មហាជន​ទូទៅ​ហើយ​នៅក្នុង ១​ថ្ងៃៗ មន្ទីរពេទ្យ​ត្រូវការ​ឈាម ២​ប្លោក សម្រាប់​ជួយសង្គ្រោះ​ជីវិត​មនុស្ស ដូច្នេះ​ឈាម​ដែល​បានមកពី​ការ​បរិច្ចាគ​ពី​សប្បុរសជន​ថ្ងៃនេះ​ខាង​មន្ទីរ​ពេទ្យ និង​យកទៅ​ប្រើប្រាស់​ឲ្យ​មាន​តម្លាភាព​បំផុត​៕