ព័ត៌មានជាតិ

រដ្ឋមន្ត្រីក្រសួងរ៉ែ «៦ ខែ ទៀតនឹងសិក្សាចប់ ភ្នំណាទុកសម្រាប់វប្បធម៌ ភ្នំណាជាទីតាំងប្រវត្តិសាស្ត្រ ភ្នំណាទុកធ្វើអាជីវកម្ម »

បានផុស

៨ ខែ មុន

នៅ

ថ្ងៃសុក្រ ២១ វិច្ឆិកា ២០២៥

ដោយ

រដ្ឋមន្ត្រីក្រសួងរ៉ែ និងថាមពល បានគូសបញ្ជាក់ពីការរៀបចំយន្តការគ្រប់គ្រងការស្នើសុំវិនិយោគលើអាជីវកម្មថ្មភ្នំ ចៀសវាងផ្តល់ការអនុញ្ញាតដោយមិនបានគិតគូរច្បាស់លាស់ នាំឲ្យហិនហោចដល់ធនធានធម្មជាតិប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងវេទិកាកិច្ចសន្ទនាជាមួយនិស្សិតនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច កាលពីថ្ងៃទី ១៩ ខែវិច្ឆិកា ឆ្នាំ២០២៥ ដែលមានការចូលរួមពីលោកឧបនាយករដ្ឋមន្ត្រី កើត រិទ្ធ រដ្ឋមន្ត្រីក្រសួងយុត្តិធម៌ លោក កែវ រតនៈ រដ្ឋមន្ត្រីក្រសួងរ៉ែ និងថាមពលបានបញ្ជាក់ថា ក្រសួងកំពុងដំណើរការកំំណត់តំបន់ Zoning ទូទាំងប្រទេស ខណៈការផ្តល់អាជ្ញាបណ្ណលើអាជីវកម្មថ្មសំណង់ត្រូវមានការប្រុងប្រយ័ត្នមិនមែនចេះតែឲ្យតាមការស្នើសុំនោះទេ។

លោករដ្ឋមន្រ្តីបានអះអាងថា បច្ចុប្បន្នថ្មសំណង់មានគ្រប់គ្រាន់សម្រាប់បម្រើដល់ការសាងសង់សំណង់អគារ និងផ្លូវថ្នល់ មិនមានការខ្វះខាតនោះឡើយ។

លោករដ្ឋមន្រ្តីបានគូសបញ្ជាក់ថា ការងារកំណត់ Zoning បានច្រើនខេត្តហើយ នៅសល់តែ ៦ ខែទៀតទេ ការងារនេះនឹងចប់សព្វគ្រប់ ដោយនឹងមានការកំណត់ទីតាំងច្បាស់លាស់នៅទូទាំងប្រទេស។ នេះមានន័យថា ខេត្តនីមួយៗនឹងមានផែនទី កំណត់រួចជាស្រេចថា តើកន្លែងណាដែលអនុញ្ញាតឲ្យធ្វើអាជីវកម្មរ៉ែសំណង់ និងកន្លែងណាដែលមិនអនុញ្ញាត។

ពាក់ព័ន្ធដំណើរការកំណត់តំបន់ (Zoning) លោករដ្ឋមន្ត្រីបានណែនាំឲ្យមន្ទីររ៉ែ និងថាមពល ដោយមានការចង្អុលទិសពីក្រសួង ធ្វើការជាមួយមន្ទីរបរិស្ថាន មន្ទីរវប្បធម៌ និងទេសចរណ៍សហការគ្នា ដើម្បីកំណត់ប្រភេទភ្នំឲ្យបានច្បាស់លាស់ ភ្នំណាដែលត្រូវទុកសម្រាប់វប្បធម៌ ភ្នំណាដែលជាទីតាំងប្រវត្តិសាស្ត្រ កន្លែងណាដែលអាចយកថ្មមកកាយ ដើម្បីបម្រើការងារសង្គម។

«ការអភិវឌ្ឍជាមួយការអភិរក្ស កំពុងតែត្រូវបានអនុវត្តជាក់ស្តែងរាល់ថ្ងៃ មិនមែនគ្រាន់តែជាការនិយាយនៅលើក្រដាសនោះទេ»។ លោករដ្ឋមន្រ្តីបញ្ជាក់។

យ៉ាងណាមិញលោករដ្ឋមន្ត្រីបានលើកឡើងថា ក៏មិនអាចទុកភ្នំទាំងអស់នោះដែរ ព្រោះបើមិនដូច្នោះទេនឹងមិនមានថ្មសំណង់សម្រាប់សង់ផ្ទះ ធ្វើបេតុង ឬធ្វើផ្លូវបានឡើយ។ ប៉ុន្តែការផ្តល់អាជ្ញាប័ណ្ណទៅមុខទៀត គឺត្រូវមានការចង្អុលទិសឲ្យបានត្រឹមត្រូវ។

បើតាមលោករដ្ឋមន្រ្តី ប្រសិនការធ្វើអាជីវកម្មក្នុងតំបន់ដែលបានកំណត់ (Zoning) មិនគ្រប់គ្រាន់ នោះនឹងពិភាក្សាអំពីការពង្រីកបន្តទៀត គោលដៅគឺត្រូវផ្តល់ឲ្យគ្រប់គ្រាន់នៅទូទាំងប្រទេស៕