ថៃ ចល័តទ័ពត្រៀមប្រយុទ្ធជាមួយ មីយ៉ាន់ម៉ា

បន្ថែមពីលើការរៀបចំបញ្ជូនសព្វាវុធទៅព្រំដែនជាប់មីយ៉ាន់ម៉ា ថៃក៏ចល័តកងទ័ពផងដែរនៅទល់ដែននោះ ដើម្បីត្រៀមឆ្លើយតបនិងប្រយុទ្ធជាមួយកងទ័ពខាងមីយ៉ាន់ម៉ា ខណៈស្ថានការណ៍កាន់តែមិនស្រួល។

តាមការផ្សាយរបស់ Bangkok Post កាលពីថ្ងៃចន្ទទី២៤ខែវិច្ឆិកាឆ្នាំ២០២៥ យុធភូមិភាគ៣ថៃ ក្រោមការដឹកនាំពីមេទ័ព Worathep Boonya កំពុងតែត្រៀមខ្លួនហើយនៅតាមបណ្តោយព្រំដែនមីយ៉ាន់ម៉ា ដើម្បីបើកឆាកប្រយុទ្ធបន្ទាប់ពីសមរភូមិក្នុងរដ្ឋ ការ៉ែន នៃប្រទេសមីយ៉ាន់ម៉ារវាងកងកម្លាំងរបបសឹកនិងក្រុមឧទ្ទាម បានរាលដាលចូលដីថៃក្នុងភូមិសាស្រ្តខេត្ត Tak ម្តងជាពីរដង។

ដោយស្ថិតនៅចម្ងាយត្រឹម១គីឡូម៉ែត្រពីសមរភូមិក្នុងរដ្ឋការ៉ែន, ស្រុក Mae Sot នៃខេត្ត Tak ប្រទេសថៃ តែងត្រូវគ្រាប់ធ្លាក់លើម្តងហើយម្តងទៀត បង្កភាពវឹកវរ បង្ខំឲ្យពលរដ្ឋរត់ចែកជើងគ្នារកកន្លែងសុវត្ថិភាព។

ថ្មីនេះៗ កងទ័ពមីយ៉ាន់ម៉ាឈានដល់ការបាញ់កាំភ្លើងធំ ៦០មិល្លីម៉ែត្រ បណ្តាលឲ្យគ្រាប់ធ្លាក់ចូលដីថៃ ត្រូវខ្ទេចផ្ទះ៤ខ្នងនិងរថយន្តភីកអាប់មួយគ្រឿង ប៉ុន្តែគ្មាននរណាម្នាក់រងរបួសឡើយ។ 

មិនត្រឹមប៉ុណ្ណឹង ទាហានមីយ៉ាន់ម៉ានិងក្រុមឧទ្ទាម​ ក៏បាញ់តដៃគ្នាយ៉ាងស្វិតស្វាញនៅក្បែរព្រំដែនថៃ ធ្វើឲ្យគ្រាប់កាំភ្លើងបាញ់ធ្លាយចូលដល់ស្រុក Mae Sot ប៉ះត្រូវសាលារៀន Ban Mae Kon Kaen បង្ខំឲ្យមានការជម្លៀសសិស្សយ៉ាងប្រញាប់ផងដែរ។

យ៉ាងណា ថៃបានត្រឹមបាញ់ផ្សែងឡើងលើដើម្បីគំរាមប៉ុណ្ណោះ ហើយចាត់វិធានការការពារនិងប្រុងជើងការខ្ពស់ ប៉ុន្តែមកដល់ថ្ងៃអាទិត្យ កងកម្លាំង Rajamanu ​សហការជាមួយ Naresuan បានរៀបចំបញ្ជូនសព្វាវុធនិងគ្រឿងបរិក្ខាយោធា ទៅព្រំដែនព្រមទាំងបង្កើនការល្បាតទាំងថ្ងៃយប់។

មិនត្រឹមប៉ុណ្ណឹង ថៃក៏បញ្ជូនកម្លាំងបន្ថែមទៅព្រំដែន ហើយដាក់ពង្រាយទ័ពតាមកន្លែងឈរជើងសំខាន់ៗ ដើម្បីត្រៀមប្រយុទ្ធក្នុងករណីស្ថានការណ៍វិវឌ្ឍដល់កម្រិតធ្ងន់ធ្ងរ៕

អត្ថបទ៖ សុខ សុវណ្ណ