រដ្ឋបាលព្រៃឈើខេត្តក្រចេះ បង្ក្រាបរថយន្តដឹកសសរឈើប្រណិត ៩ដើម ក្រោយជួបគ្រោះថ្នាក់ចរាចរណ៍

រថយន្តដឹកសសរឈើប្រភេទឈ្លិច និងផ្ចឹកមូលចំនួន ៩ដើម ត្រូវបានមន្ត្រីជំនាញរដ្ឋបាលព្រៃឈើថ្មគ្រែនៃខេត្តក្រចេះ ចុះបង្ក្រាប និងបានរឹបអូសរថយន្តសាំយ៉ុងដឹកឈើខាងលើ រួមទាំងវត្ថុតាងទាំងនោះយកទៅរក្សាទុកនៅថ្នាលបណ្តុះកូនឈើខ្សា ក្នុងភូមិខ្សារ ឃុំដារ ស្រុកចិត្របុរី ខេត្តក្រចេះ ដើម្បីបន្តនីតិវិធី។

ប្រភពពីមន្ត្រីជំនាញ បានឱ្យដឹងថា រថយន្តដឹកជញ្ជូនផលអនុផលព្រៃឈើខាងលើនេះ គឺកម្លាំងជំនាញបានបង្ក្រាបនៅចំណុចនៅទីតាំង ភូមិសំបុក ឃុំសំបុក ស្រុកចិត្របុរី ខេត្តក្រចេះ នាថ្ងែទី២៥ ខែវិច្ឆិកា ឆ្នាំ២០២៥នេះ។ ក្នុងប្រតិបត្តិការចុះបង្ក្រាប មន្ត្រីជំនាញបានដកហូតឈើប្រភេទឈ្លិចមូលចំនួន ៦ដុំ និងផ្ចឹកចំនួន ៣ដុំ។

មន្ត្រីជំនាញបានបញ្ជាក់បន្ថែមថា ក្រោយពីមានសេចក្ដីរាយការណ៍មកថា មានរថយន្តសាំយ៉ុងដឹកឈើមួយគ្រឿង ជួបគ្រោះថ្នាក់ដាច់កង់ មន្ត្រីជំនាញក៏បានរកមធ្យោបាយ ដើម្បីស្ទូចយករថយន្តមករក្សាទុកនៅទីតាំងខាងលើដើម្បីបន្តនីតិវិធីច្បាប់។

យោងតាមប្រភពផ្សេងទៀត បានឱ្យដឹងថារថយន្តខាងលើនេះ តែងតែធ្វើសកម្មភាពដឹកជញ្ជូនផលអនុផលព្រៃឈើគ្មានច្បាប់អនុញ្ញាតជាហូរហែយ៉ាងអនាធិបតេយ្យ ស្រាប់តែពេលនេះ មិនដឹងថាការធ្វើចរាចណ៍របស់ឈ្មួញខាងលើរូបនេះ ប្រែប្រួលយ៉ាងដូចម្តេចបានជា ជួបគ្រោះថ្នាក់ដាច់កង់រថយន្តបណ្តាលឱ្យទៅមុខលែងរួចតែម្តង តែទោះជាយ៉ាងណាមិនបានបង្កគ្រោះថ្នាក់ធ្ងន់ធ្ងរដល់អាយុជីវិតអ្នកបើកបរ ឬអ្នកណាម្នាក់ឡើយនៅក្នុងហេតុការណ៍នេះ៕

អត្ថបទ៖ ប្រុញ វិធិន