ព័ត៍មានទាន់​ហេតុការណ៏
Search

លោក Bolton ​៖​ អ្នកការទូត​អាមេរិក​សួរសុខទុក្ខ​គ្រូពេទ្យ​សញ្ជាតិ​អាមេរិក​-​អារ៉ាប៊ីសាអ៊ូឌីត​ដែល​ជាប់ពន្ធនាគារ

មន្ត្រី​សេត​វិមាន​ជាន់ខ្ពស់​មួយរូប​បាន​និយាយ​កាលពី​ថ្ងៃអាទិត្យ​ថា អ្នកការទូត​អាមេរិក​បាន​ទៅសួរសុខទុក្ខ​បុរស​សញ្ជាតិ​អាមេរិក​-​អារ៉ាប៊ីសាអ៊ូឌីត​ម្នាក់​ ដែល​ត្រូវបាន​គេ​រាយការណ៍​ថា ត្រូវ​រង​ការធ្វើ​ទារុណកម្ម​ ខណៈពេល​ជាប់ពន្ធនាគារ​ក្នុង​សណ្ឋាគារ Ritz-Carlton នៅ​ទីក្រុង​រី​យ៉ា​ដ។

ដោយ​ដកស្រង់​ការរៀបរាប់​លម្អិត​ពី​មិត្តភក្តិ​ម្នាក់​ដែល​មិន​បញ្ចេញ​ឈ្មោះ​, កាសែត New York Times បាន​រាយការណ៍​ថា ឆ្មាំ​បាន​អូស​លោក Walid Fitaihi ដែលជា​គ្រូពេទ្យ​ទទួល​ការហ្វឹកហ្វឺន​ពី​សាកលវិទ្យាល័យ Harvard ទៅ​បន្ទប់​មួយ​នៅក្នុង​សណ្ឋាគារ​នេះ​ដែលជា​កន្លែង​គាត់​ត្រូវបាន​គេ​ទះកំផ្លៀង រុំ​ភ្នែក​និង​ចង​ជាប់​កៅអី។

កាសែត The Times បាន​រាយការណ៍​ថា បន្ទាប់មក​ពួកគេ​បានធ្វើ​ទារុណកម្ម​គាត់​ជាមួយនឹង​ការ​ឆក់​ខ្សែរ​ភ្លើង​នៅក្នុង​ការសួរចម្លើយ​មួយ​ដែលមាន​រយៈពេល​ប្រហែល​មួយ​ម៉ោង។

ទីប្រឹក្សា​សន្តិសុខ​ជាតិ​សេត​វិមាន​លោក John Bolton ត្រូវបាន​សាកសួរ​អំពី​ទង្វើ​ដែល​គេ​ធ្វើ​ដាក់​លោក Fitaihi នៅក្នុង​បទសម្ភាសន៍​មួយ​នៃ​កម្មវិធី “State of the Union” របស់​ទូរទស្សន៍ CNN។

លោក​និយាយថា “​នៅពេលនេះ ខ្ញុំ​យល់ថា​យើង​មាន​អ្វីដែល​គេ​ហៅថា ដំណើរការ​កុងស៊ុល​ដែល​នេះ​មានន័យថា ក្រុម​អ្នកការទូត​អាមេរិក​នៅក្នុង​ប្រទេស​អា​រ៉ាប៊ីសាអ៊ូឌីត​បាន​ទៅសួរសុខទុក្ខ​គាត់​”​។ លោក Bolton បាន​បន្ថែមទៀតថា “​លើសពីនេះទៅទៀត យើង​ពិតជា​មិនមាន​ព័ត៌មាន​បន្ថែម​ទេ​នៅពេលនេះ”។

លោក Fitaihi អាយុ​៥៤​ឆ្នាំ​គឺជា​ម្នាក់​ក្នុងចំណោម​ជនជាតិ​អារ៉ាប៊ីសាអ៊ូឌីត​លេចធ្លោ​ប្រហែល​២០០​នាក់​ដែល​ត្រូវបាន​ឃុំឃាំង​នៅក្នុង​សណ្ឋាគារ​ប្រណីត​របស់​ទីក្រុង​រី​យ៉ា​ដ​ជា​ផ្នែក​មួយ​នៃ​ការបង្ក្រាប​យ៉ាង​ពេញទំហឹង​លើ​អំពើពុករលួយ​ក្រោម​ការគ្រប់គ្រង​របស់​ព្រះអង្គម្ចាស់ Mohammed ។​

ភាគច្រើន​នៃ​អ្នក​ដែល​ត្រូវបាន​ឃុំខ្លួន​គឺ​ត្រូវបាន​គេ​រាយការណ៍​ថា ត្រូវបាន​គេ​ធ្វើ​ទារុណកម្ម​និង​រំលោភបំពាន​ហើយ​អ្នកខ្លះ​ត្រូវបាន​បង្ខំ​ឲ្យ​បង់ប្រាក់​ជាច្រើន​ដើម្បី​ទទួលបាន​ការដោះលែង​។​

លោក Fitaihi គឺជា​មនុស្ស​ម្នាក់​ក្នុងចំណោម​៦០​នាក់​ដែល​ត្រូវបាន​ឃុំខ្លួន​សម្រាប់​ការកាត់ទោស​បន្ទាប់ពី​ការបង្ក្រាប​រយៈពេល​១៥​ខែ​ដែល​ត្រូវបាន​គេ​មើលឃើញថា​ជាការ​ពង្រឹង​អំណាច​របស់​ព្រះអង្គម្ចាស់ Mohammed៕ AFP



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114