ប្រទេសជាង៣០ មិនអាចចូល អាមេរិក បានទេ ក្រោយលោកត្រាំ រឹតបន្តឹងធ្ងន់ជាងមុន

រដ្ឋមន្ត្រីសន្តិសុខមាតុភូមិ លោកស្រី Kristi Noem បាននិយាយកាលពីថ្ងៃព្រហស្បតិ៍ថា សហរដ្ឋអាមេរិកនឹងពង្រីកការហាមឃាត់ធ្វើដំណើររបស់ខ្លួនដល់ប្រទេសជាង ៣០ ខណៈដែលរដ្ឋបាលលោកត្រាំ នឹងពង្រីកការរឹតបន្តឹងដែលជំរុញដោយសន្តិសុខ។ នេះបើតាមទីភ្នាក់ងារសារព័ត៌មាន Reuters បានចុះផ្សាយ នាថ្ងៃទី ៥ ខែធ្នូ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងបទសម្ភាសន៍មួយនៅលើកម្មវិធី The Ingraham Angle របស់ Fox News លោកស្រី Noem ត្រូវបានគេសួរដើម្បីបញ្ជាក់ថា តើរដ្ឋបាលរបស់ប្រធានាធិបតី ដូណាល់ ត្រាំ នឹងបង្កើនចំនួនប្រទេសនៅក្នុងបញ្ជីហាមឃាត់ការធ្វើដំណើរដល់ ៣២ ដែរឬទេ?

លោកស្រីនិយាយថា «ខ្ញុំមិនអាចបញ្ជាក់ឲ្យច្បាស់លាស់អំពីចំនួននោះទេ ប៉ុន្តែវាលើសពី ៣០ ហើយប្រធានាធិបតីកំពុងបន្តវាយតម្លៃប្រទេសនានា»។

កាលពីខែមិថុនា លោកត្រាំបានចុះហត្ថលេខាលើសេចក្តីប្រកាសមួយ ដោយហាមឃាត់ពលរដ្ឋនៃប្រទេសចំនួន ១២ មិនឲ្យចូលអាមេរិក និងរឹតត្បិតអ្នកមកពីប្រទេសចំនួន៧ផ្សេងទៀត ដោយថា​វាចាំបាច់ដើម្បីការពារប្រឆាំងនឹង «ភេរវករអន្តរជាតិ» និងការគំរាមកំហែងសន្តិសុខផ្សេងទៀត។ ការហាមឃាត់ទាំងនេះអនុវត្តចំពោះអ្នកតាំងលំនៅ ជនអន្តោប្រវេសន៍ និងមិនមែនជនអន្តោប្រវេសន៍ ដូចជាអ្នកទេសចរ និស្សិត និងអ្នកធ្វើដំណើរអាជីវកម្ម។

បើទោះបីជាលោកស្រីមិនបានដាក់ឈ្មោះប្រទេសថ្មីជាក់លាក់ណាមួយ ដែលនឹងត្រូវដាក់ក្នុងបញ្ជីខ្មៅក៏ដោយ លោកស្រី Noem បានពន្យល់អំពីលក្ខណៈវិនិច្ឆ័យត្រួតពិនិត្យរបស់រដ្ឋាភិបាល។ លោកស្រីអះអាងថា ប្រសិនបើប្រទេសដែលគ្មានរដ្ឋាភិបាលមានស្ថិរភាព មិនអាចរក្សាសណ្តាប់ធ្នាប់ដោយខ្លួនឯង ឬមិនអាចផ្តល់ព័ត៌មានផ្ទៀងផ្ទាត់អត្តសញ្ញាណពលរដ្ឋដើម្បីគាំទ្រអាមេរិកក្នុងការត្រួតពិនិត្យសន្តិសុខ ទីក្រុងវ៉ាស៊ីនតោនមិនមានហេតុផលណាមួយដើម្បីអនុញ្ញាតឲ្យមនុស្សមកពីប្រទេសនោះចូលប្រទេសនោះទេ។

ចលនាដើម្បីបង្កើនការគ្រប់គ្រងព្រំដែននេះ បន្ទាប់ពីការបាញ់ប្រហារលើសមាជិកឆ្មាំជាតិពីរនាក់នៅទីក្រុងវ៉ាស៊ីនតោនឌីស៊ី កាលពីថ្ងៃទី ២៦ ខែវិច្ឆិកា ដែលបានសម្លាប់មនុស្សម្នាក់។ អ្នកស៊ើបអង្កេតបានកំណត់អត្តសញ្ញាណជនសង្ស័យថាជាពលរដ្ឋអាហ្វហ្គានីស្ថាន ដែលបានចូលអាមេរិកក្នុងឆ្នាំ ២០២១ ក្រោមកម្មវិធីតាំងទីលំនៅថ្មី។ ករណីនេះបានក្លាយជាមូលដ្ឋានសម្រាប់រដ្ឋបាលត្រាំ ដើម្បីអះអាងថាដំណើរការវាយតម្លៃពីមុនមិនតឹងរ៉ឹងគ្រប់គ្រាន់ទេ ហើយអាចមានគ្រោះថ្នាក់។

មិនតែប៉ុណ្ណោះ ការពង្រីកហាមឃាត់ការធ្វើដំណើរលើកនេះ ក៏ជាការផ្លាស់ប្តូរថ្មីមួយនៅក្នុងគោលនយោបាយរបស់លោកត្រាំ ដោយផ្លាស់ប្តូរការផ្តោតអារម្មណ៍ពីការធ្វើអន្តោប្រវេសន៍ខុសច្បាប់ ទៅជាការផ្លាស់ប្តូរទាំងស្រុងនូវលំហូរនៃជនអន្តោប្រវេសន៍ស្របច្បាប់ទៅកាន់សហរដ្ឋអាមេរិក៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ហេតុអ្វីកូនប្រសាត្រាំ ទៅចរចាជម្លោះរុស្ស៊ី-អ៊ុយក្រែន ខណៈរដ្ឋមន្ត្រីការបរទេសអាមេរិក បែរអវត្តមាន?