ទឹកជំនន់នៅភាគខាងត្បូងថៃ បន្តប៉ះពាល់ដល់មនុស្សជាង ២៣៦ ០០០នាក់ទៀត

នាយកដ្ឋានបង្ការនិងកាត់បន្ថយគ្រោះមហន្តរាយថៃ បានចេញរបាយការណ៍អំពីគ្រោះទឹកជំនន់នៅភាគខាងត្បូង ដោយបង្ហាញថា មនុស្ស ២៣៦ ៣៧៥នាក់ កំពុងបន្តរងផលប៉ះពាល់។

យោងតាមទិន្នន័យដែលផ្សាយបន្តដោយ The Nation កាលពីថ្ងៃសៅរ៍ទី៦ខែធ្នូឆ្នាំ២០២៥, ទឹកជំនន់កំពុងបង្កទុក្ខលំបាកនៅឡើយដល់ដល់ពលរដ្ឋ ៨៤ ៤៥០គ្រួសារនៅភូមិចំនួន៥៣៤ នៃ១០១ឃុំ ក្នុង២២ស្រុក របស់ខេត្តចំនួន៥ ដូចជា៖ Surat Thani, Nakhon Si Thammarat, Trang, Phatthalung និង Songkhla។

ក្នុងនោះ Songkhla ជាខេត្តដែលរងគ្រោះខ្លាំងជាងគេ ដោយពេលទឹកឡើងដល់កម្រិតកំពូល វាបានវាយប្រហារស្រុក Hat Yai យ៉ាងចាស់ដៃ ប៉ុន្តែដ្បិតថាឥឡូវស្ថានភាពទីនោះ បានធូរស្រាលហើយក្តី ប៉ុន្តែគ្រោះធម្មជាតិកំពុងញាំញីស្រុកចំនួន៤ដូចជា Ranot, Krasae Sin, Sathing Phra និង Singhanakhon ដោយប៉ះពាល់ពលរដ្ឋ ៦៩ ០១៦គ្រួសារក្នុង៣៨ឃុំ។

សូមជម្រាបថា ផ្អែកលើទិន្នន័យផ្លូវការចុងក្រោយពីអាជ្ញាធរថៃ, ចំនួនមនុស្សស្លាប់ដោយសារគ្រោះទឹកជំនន់ដ៏សាហាវនៅភាគខាងត្បូងប្រទេស គឺមានចំនួន២៦៧នាក់។

យ៉ាងណា ប្រជាជនថៃបានចោទរដ្ឋាភិបាលទីក្រុងបាងកកថា លាក់បាំងតួលេខ ហើយថែមទាំងរិះគន់ដល់ការមើលស្រាលស្ថានការណ៍ គ្រប់គ្រងមិនបានល្អ និងទុកពួកគេចោលទៀតផង៕

អត្ថបទ៖ សុខ សុវណ្ណ