បារាំង​ចេញ​សេចក្ដីថ្លែងការណ៍​អំពី​ស្ថានភាព​ជម្លោះ​ព្រំដែន​កម្ពុជា-ថៃ

ក្រសួងអឺរ៉ុប និងការបរទេសបារាំង តាម​រយៈ​ស្ថាន​ទូត​បារាំង​ប្រចាំ​កម្ពុជា នាថ្ងៃ​អង្គារ​ទី​៩​ខែ​ធ្នូ​ឆ្នាំ​២០២៥​នេះ បាន​ចេញ​សេចក្ដី​ថ្លែងការណ៍​មួយ​នៅលើ​បណ្ដាញ​សង្គម​ហ្វេសប៊ុក អំពី​ភាពតានតឹងដែលកើតមានឡើងសាជាថ្មីរវាងកម្ពុជា-ថៃ។

អត្ថន័យ​​ទាំង​ស្រុង​នៃ​សេចក្ដីថ្លែង​ការណ៍់​របស់​បារាំង មាន​ដូច​ខាង​ក្រោម៖

«ប្រទេសបារំាងមានការព្រួយបារម្ភចំពោះភាពតានតឹងដែលកើតមានឡើងជាសាថ្មីរវាងប្រទេសថៃ និងប្រទេសកម្ពុជា ហើយដែលបង្កឱ្យមានជនរងគ្រោះថ្មីៗ។ ប្រទេសបារំាងអំពាវនាវឱ្យមានការគោរពពេញលេញ និងការអនុវត្តជាក់ស្តែងនូវបទឈប់បាញ់ចុះថ្ងៃទី២៨ ខែកក្កដា ឆ្នាំ២០២៥ និងសេចក្តីថ្លែងការណ៍រួមធ្វើឡើងដោយនាយករដ្ឋមន្ត្រីនៃប្រទេសទាំងពីរ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ក្នុងអំឡុងកិច្ចប្រជុំកំពូលអាស៊ានលើកទី៤៧ នៅទីក្រុងគូឡាឡាំពួរ។

ប្រទេសបារំាងបញ្ជាក់សាជាថ្មីនូវការគាំទ្រដល់កិច្ចខិតខំប្រឹងប្រែងសម្របសម្រួលធ្វើឡើងដោយអាស៊ាន ជាពិសេសដោយលោកនាយករដ្ឋមន្រ្តីម៉ាឡេស៊ី អាន់វ៉ា អ៊ីប្រាហ៊ីម ក្នុងនាមជាប្រធានអាស៊ានឆ្នាំ២០២៥។

ប្រទេសបារំាងជឿជាក់ថា មាគ៌ាតែមួយគត់ដើម្បីដោះស្រាយជម្លោះប្រកបដោយចីរភាព និងសន្តិវិធី គឺធ្វើឡើងតាមរយៈការបន្តកិច្ចសន្ទនាឡើងវិញ ការគោរពច្បាប់អន្តរជាតិ និងការប្តេជ្ញាចិត្តនានាដែលប្រទេសទាំងពីរបានធ្វើឡើងជាមួយដៃគូអាស៊ាន»៕

ប្រែសម្រួល៖ ឈាង