ព័ត៌មានអន្ដរជាតិ

ថៃសុំទោសឡាវចំពោះការបិទច្រកដឹកប្រេង ដោយថាខ្លួនគ្មានចេតនាធ្វើបាបឡាវទេ

បានផុស

៧ ខែ មុន

នៅ

ថ្ងៃចន្ទ ១៥ ធ្នូ ២០២៥

ដោយ

ប្រទេសថៃបានសុំទោសឡាវចំពោះការបិទច្រកនាំចេញប្រេងឥន្ធនៈ និងសម្ភារៈយោធាតាមរយៈច្រកព្រំដែន Chong Mek នៃខេត្ត ឧប៊ុនរ៉ាចាថានី ដែលមានព្រំប្រទល់ជាប់នឹងខេត្តភាគខាងត្បូងឡាវ។ នេះបើតាមការឱ្យដឹងរបស់អ្នកនាំពាក្យក្រសួងការពារជាតិថៃ លោក ស៊ូរ៉ាសាន់ គង់ស៊ីរី (Surasant Kongsiri) នៅថ្ងៃចន្ទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់ថៃ ធ្វើឡើងក្រោយការបិទរបស់ថៃកាលពីពាក់កណ្ដាលអធ្រាត្រយប់មិញ បានបង្ករថយន្តដឹកប្រេងប្រហែល ៨០ គ្រឿង ដែលអាចផ្ទុកប្រេងឥន្ធនៈជាង ៤ លានលីត្រ ជាប់គាំង និងរង់ចាំនៅច្រកត្រួតពិនិត្យ Chong Mek។

តាមការចុះផ្សាយរបស់សារព័ត៌មាន Thai PBS លោក ស៊ូរ៉ាសាន់ បានបញ្ជាក់ថា ចំណាត់ការរបស់ថៃបានប៉ះពាល់ប្រជាជនឡាវ ប៉ុន្តែ «ថៃគ្មានចេតនាបង្កការលំបាកសម្រាប់ប្រជាជនឡាវនោះទេ»។ លោកបន្តថា៖ «បទបញ្ជានេះត្រូវបានចេញ ដោយសារស្ថានភាពព្រំដែនរវាងថៃ និងកម្ពុជា ហើយមិនពាក់ព័ន្ធនឹងប្រទេសផ្សេងទៀតទេ»។

លោកបានសុំទោសដល់ប្រជាជនឡាវដែលអាចរងផលប៉ះពាល់ ហើយបាននិយាយថា ថៃកំពុងខិតខំប្រឹងប្រែងដើម្បីអនុវត្តវិធានការផ្សេងៗឱ្យបានឆាប់រហ័ស ខណៈកាត់បន្ថយផលប៉ះពាល់។

គួររំឭកថា ថៃចេញការនាំឃាត់នៅច្រក Chong Mek ដោយអះអាងថា កម្ពុជាអាចទិញប្រេង និងទំនិញយុទ្ធសាស្រ្តដោយប្រើឡាវជាច្រកឆ្លងកាត់។ ថៃចាត់ការបែបនេះ ខណៈមានសេចក្ដីរាយការណ៍ដដែល មានគម្រោងបិទឈូងសមុទ្រថៃ ដើម្បីកាត់ផ្ដាច់ប្រេង និងទំនិញយុទ្ធសាស្រ្តចូលមកកម្ពុជា។

យ៉ាងណាមិញ កម្ពុជា បានហាមឃាត់ការនាំចូលប្រេងឥន្ធនៈថៃតាំងពីចុងខែមិថុនាមកម្ល៉េះ ដោយបង្កើនការផ្គត់ផ្គង់ពីវៀតណាម និងសិង្ហបុរីជាដើម ខណៈទំនិញផ្សេងៗដែលនាំចូលពីថៃ ក៏ធ្លាក់ចុះខ្លាំងគួរឱ្យកត់សម្គាល់ ដោយការបិទព្រំដែនគោករវាងប្រទេសទាំង២៕