ព័ត៍មានទាន់​ហេតុការណ៏
Search

រដ្ឋមន្ត្រី​ក្រសួង​សាធារណការ ​បង្ហាញ​សក្តានុពល​ខេត្តកំពង់ឆ្នាំង​ដល់​អ្នកវិនិយោគ​បរទេស

ភ្នំពេញ​ ៖​ រដ្ឋមន្ត្រី​ក្រសួង​សាធារណការ​ និង​ដឹកជញ្ជូន ​បាន​បង្ហាញ​សក្តានុពល​ខេត្តកំពង់ឆ្នាំង​ដល់​អ្នកវិនិយោគ​បរទេស ខណៈ​ខេត្ត​នេះ​មាន​ផ្លូវ​គមនាគមន៍​ទាំងបី​ ដែល​នឹង​អាច​បើក​ដំណើរការ​បាន​គឺ​ផ្លូវគោក ផ្លូវ​ទឹក និង​ផ្លូវអាកាស។

លោក​ទេសរដ្ឋមន្ត្រី និង​ជា​រដ្ឋមន្ត្រីក្រសួង​សាធារណការ និង​ដឹកជញ្ជូន ស៊ុន ចាន់ថុល​ថ្លែង​បែបនេះ នៅក្នុង​ពិធី​ចុះហត្ថលេខា​លើ​អនុស្សារណៈ​យោគយល់​គ្នា​និង​កិច្ចព្រមព្រៀង​ហិរញ្ញប្បទាន​រវាង​UNDP និង​ក្រុមហ៊ុន​Shenzhen 4PX Express ដើម្បី​ភ្ជាប់​ទំនាក់ទំនង​ជាមួយ​ប្រទេស​កម្ពុជា​រួមគ្នា​ឆ្ពោះទៅរក​សេដ្ឋកិច្ច​ឌីជីថល នា​ព្រឹក​ថ្ងៃទី​១៩ ខែមីនា​នេះ នៅ​សណ្ឋាគារ​សូ​ហ្វី​តែ​ល​ភ្នំពេញ​។​

លោក​ទេសរដ្ឋមន្ត្រី ស៊ុន ចាន់ថុល បាន​មានប្រសាសន៍​បញ្ជាក់ថា ខេត្ត​កំពង់​ឆ្នាំមាន​ព្រលានយន្តហោះ​មាន​ផ្លូវ ៤​គន្លង​ឆ្លងកាត់​បួន​ប្រាំ​ខេត្ត​ជាប់​គ្នា រហូតដល់​ជាយដែន​ថៃ​។ កត្តា​អំណោយផល​នៃ​ផ្លូវ​គមនាគមន៍​ទាំងនេះ ជា​សក្តានុពល​ដ៏​សំខាន់​ដែល​អ្នកវិនិយោគ​អាច​ពិចារណា​បោះទុន​វិនិយោគ​នៅ​ទីនោះ​បាន​។ លោក ទេសរដ្ឋមន្ត្រី​បន្តថា រាជរដ្ឋាភិបាល​កម្ពុជា​ចង់​ប្រើប្រាស់​ឱ្យ​អស់ពី​លទ្ធភាព​នូវ​អ្វី ដែលមាន​ក្នុងប្រទេស ដូច្នេះ​«​ខ្ញុំ​ស្នើឱ្យ​វិស័យ​ឯកជន​ពិនិត្យមើល តើ​អាច​រៀបចំ​ខេត្តកំពង់ឆ្នាំង​ទៅជា​តំបន់​ឡូ​ជី​ស្ទីក​របស់​មហា​អនុតំបន់​មេគង្គ​តែម្តង​»​។

លោក​ទេសរដ្ឋមន្ត្រី និង​ជា​រដ្ឋមន្ត្រីក្រសួង សាធារណការ និង​ដឹកជញ្ជូន​បាន​បន្ថែមថា អ្នកវិនិយោគ​ដែល​បោះទុន​វិនិយោគ​នៅ​ខេត្តកំពង់ឆ្នាំង​ អាច​ពង្រីក​អាជីវកម្ម​របស់ខ្លួន​ទូទាំង​តំបន់​អាស៊ីអាគ្នេយ៍​តែម្តង ព្រោះ​សេវា​ដឹកជញ្ជូន​នឹងមាន​គ្រប់ផ្នែក​ទាំងអស់​ភ្ជាប់​ទៅ​ប្រទេសជិតខាង។

លោក Wang Wentian ឯកអគ្គរដ្ឋទូត​សាធារណរដ្ឋ​ប្រជាមានិត​ចិន​ប្រចាំ​កម្ពុជា ដែល​បាន​ធ្វើជា​សាក្សី នៃ​ពិធី​ចុះហត្ថលេខា​ខាងលើ​នេះដែរ បាន​សន្យាថា នឹង​លើកទឹកចិត្ត​ឱ្យ​ក្រុមហ៊ុន​ចិន​មក​វិនិយោគ​វិស័យ​ឡូ​ជី​ស្ទិ​ក​នេះ នៅក្នុង​ប្រទេស​កម្ពុជា​ដើម្បី​ជួយ​លើកកម្ពស់​សេដ្ឋកិច្ចកម្ពុជា​ស្របពេល​ដែល​ចិន​កំពុង​ពង្រីក​គោលនយោបាយ​ផ្លូវ​មួយ​ខ្សែក្រវ៉ាត់​មួយ​។​

យោងតាម​សេចក្តីប្រកាស​ព័ត៌មាន​ពាក់ព័ន្ធ​អនុស្សរណៈ​យោគយល់​គ្នា និង​កិច្ចព្រមព្រៀង​ហិរញ្ញប្បទាន​រវាង​UNDP​និង​ក្រុមហ៊ុន​Shenzhen 4PX Express បានឱ្យដឹងថា ព្រះរាជាណាចក្រ​កម្ពុជា មាន​សក្តានុពល​ក្នុងការ​ទាញ​ប្រយោជន៍​ពី​ពាណិជ្ជកម្ម​តាម​ប្រព័ន្ធ​អេ​ឡិ​ក​ត្រូ​និក​(E-Commerce) ដើម្បី​ផ្តល់​ភាពងាយស្រួល និង​មាន​ប្រសិទ្ធភាព​ដល់​អតិថិជន​អ្នក​លក់រាយ ទីផ្សារ និង​ការទទួល បាន ព័ត៌មាន​ពាណិជ្ជកម្ម​។ ពាណិជ្ជកម្ម​តាម​ប្រព័ន្ធ​អេ​ឡិ​ក​ត្រូ​និក​មាន​អត្ថប្រយោជន៍​ក្នុងការ​ធ្វើ​ពាណិជ្ជកម្ម​អន្តរជាតិ​ព្រមទាំង​មាន​សក្តានុពល​ក្នុង​ការជួយ​លើកកម្ពស់​ទីផ្សារ​ក្នុងស្រុក​ផងដែរ​៕