ព័ត៍មានទាន់​ហេតុការណ៏
Search

ផ្លូវ​ខេត្ត​បន្ទាយឆ្មារ ភ្នំ​ដងរែក ដែល​អនុវត្ត​ដោយ​មន្ទីរ​សាធារណការ ​និង​ដឹកជញ្ជូន​ខេត្តបន្ទាយ​មាន​ជ័យ​នោះ ធ្វើបាន​៨០​ភាគរយ​ហើយ

​បន្ទាយមានជ័យ ៖ ផ្លូវ​ខេត្ត​បន្ទាយឆ្មារ ទៅ​ភ្នំ​ដងរែក​ ដែល​អនុវត្ត​ដោយ​​មន្ទីរ​សាធារណការ​ និង​ដឹកជញ្ជូន​ខេត្តបន្ទាយមានជ័យ​នោះ ​ធ្វើបាន​៨០​ភាគរយ​ហើយ។​

លោក គឹម សុវណ្ណ ប្រធាន​មន្ទីរ​សាធារណការ ​និង​ដឹកជញ្ជូន​ខេត្តបន្ទាយមានជ័យ​បាន​ប្រាប់​អ្នកយក​ព័ត៌មាន​នៅ​ថ្ងៃទី​២១ ​ខែ​មីនា ឆ្នាំ​២០១៩​នេះ​ថា ​មកទល់ពេលនេះ​ គិត​ត្រឹម​ថ្ងៃទី​២១ ខែ​មីនា ឆ្នាំ​២០១៩ នេះ ​ក្រុម​គ្រឿងចក្រ​ និង​ក្រុមការងារ​ដែល​ម៉ៅការ​ បានធ្វើ​សកម្មភាព ការងារ​ធ្វើ​ផ្លូវ ដោយ​ពង្រីក និង ចាក់ដី ស លើក​កម្ពស់ និង​ក្រាល​ដី​ក្រួស​ក្រហម​លើផ្លូវ​លេខ​2563A ផ្លូវ​ខេត្ត​ភ្ជាប់​ផ្លូវជាតិ កាត់​ទ​ទឹង​ទៅ​ផ្លូវជាតិ ពី​ម្តុំ​ប្រាសាទបន្ទាយឆ្មារ ទៅ​ភ្នំ​ដងរែក ​ឃុំ​បន្ទាយឆ្មារ ​ស្រុក​ថ្មពួក​ ខេត្ត​បន្ទាយ​មាន​ជ័យ ធ្វើបាន​ប្រវែង​៥.៥០០​ម៉ែត្រ ទ​ទឹង​៨ ម៉ែត្រ ពោល​គឺ​អនុវត្ត​ការងារ​សម្រេច​បាន​៨០% ហើយ។

លោក គឹម សុវណ្ណ ​បន្តថា​ នេះ​ ជា​គម្រោង​អនុវត្ត​របស់​មន្ទីរ​សាធារណការ និង ដឹក​ជញ្ជូន​ខេត្ត​បន្ទាយ​មានជ័យ​។ ក្រៅពីនោះ គម្រោង​ផ្លូវ​ខេត្ត​ ដែល​គ្រប់គ្រង​ដោយ​មន្ទីរ តែ​អនុវត្ត​ដោយ​ក្រុមហ៊ុន ​ឬ​អ្នកម៉ៅការ​ផ្សេងទៀត ក៏​ធ្វើបាន​យ៉ាង​ច្រើន ហើយ​មាន​ផ្លូវ​ក្រាល​កៅស៊ូ​ផង​ដែរ។​

លោក ​គឹម​ សុវណ្ណ​ បានបញ្ជាក់​ឲ្យ​ដឹង​ទៀតថា ​ដើម្បី​សម្រួល​ឲ្យ​ប្រជាពលរដ្ឋ​គាត់​ធ្វើដំណើរ​​បាន​ស្រួល​ក្នុង​ការដឹក​ផលិតផល​ទៅកាន់​ទីផ្សារ​ ក៏ដូចជា សិស្សានុសិស្ស​ធ្វើដំណើរ​ទៅកាន់​សាលារៀន និង​ដឹក​អ្នក​ជំងឺ​ទៅកាន់​មណ្ឌល​សុខភាព​បាន​ទាន់ពេលវេលា ក្នុងនោះ ​លោក​ គឹម​ សុវណ្ណ​ បាន​សំណូមពរ​ផងដែរ​ ដល់​ប្រជាពលរដ្ឋ បើ​ការធ្វើ​ផ្លូវ​នេះ​មាន ការប៉ះពាល់ សូម​ចូលរួម​សហការ​ជាមួយ​ក្រុមការងារ​ ព្រោះនេះ គឺ​ផលប្រយោជន៍​រួម​ទាំងអស់គ្នា។ ​ដោយ​ក្តី​រីករាយ​យ៉ាង​ក្រៃលែង​នោះ​ប្រជាពលរដ្ឋ​ បាន​ថ្លែងអំណរគុណ​ដល់​ សម្ដេច​តេ​ជោ ហ៊ុន សែន​ នាយករដ្ឋមន្ត្រី​កម្ពុជា​ ​ដែល​បាន​ផ្តល់​ផ្លូវ​១​ខ្សែ​នេះ​ជូន​ដល់​ពួកគាត់ ​ពីមុនមក​គាត់​ជួប​បញ្ហាលំបាក​ជាច្រើន​ឆ្នាំ​មកហើយ ពិសេស គឺ​នា​រដូវវស្សា​ជួប​បញ្ហា​ខ្លាំង​ ពេលនេះ​បាន​ផ្លូវ​ថ្មី​គាត់​ពិតជា​មាន​សេចក្ដីត្រេកអរ​ខ្លាំង​ណាស់​៕​