ព័ត៌មានអន្ដរជាតិ

មហាអំណាចចិនជាក្តីសង្ឃឹមថ្មីនាំថៃទៅរកតុចរចា និងស្តារសន្តិភាពឡើងវិញ

បានផុស

៧ ខែ មុន

នៅ

ថ្ងៃព្រហស្បតិ៍ ១៨ ធ្នូ ២០២៥

ដោយ

ដំណើរទស្សនកិច្ចរបស់ លោក ដេង ស៊ីជុន (Deng Xijun) ប្រសិតពិសេសទទួលបន្ទុកកិច្ចការអាស៊ីនៃក្រសួងការបរទេសចិន ដែលមានបំណង «ដោះស្រាយជម្លោះព្រំដែនរវាងថៃនិងកម្ពុជា» ធ្វើឲ្យមានក្តីសង្ឃឹមថ្មីមួយទៀត នាំទៅរក «បទឈប់បាញ់»ថ្មីមួយរវាងថៃនិងកម្ពុជា។

លោក ដេង ស៊ីជុន (Deng Xijun) ប្រសិតពិសេសទទួលបន្ទុកកិច្ចការអាស៊ីនៃក្រសួងការបរទេសចិន។ bnionline.net

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ដេង ស៊ីជុន នឹងផ្តើមបំពេញទស្សនកិច្ចដំបូងនៅប្រទេសកម្ពុជា និងប្រទេសថៃជាលើកទី២ នៅថ្ងៃទី១៨ខែធ្នូ ឆ្នាំ២០២៥ ដើម្បីសម្របសម្រួលឱ្យមានសន្តិភាពឡើងវិញរវាងប្រទេសទាំង២កម្ពុជា-ថៃ បន្ទាប់ពីការបំពេញទស្សនកិច្ចលើកទី១កាលពីពាក់កណ្តាលខែកញ្ញាឆ្នាំ២០២៥ ដោយបានរំឭកភាគីទាំងពីរឲ្យប្រកាន់ខ្ជាប់ភាពជាអ្នកជិតខាងល្អ បន្តការចរចាគ្នាដោយសន្តិភាព។

ដំណើរទស្សនកិច្ចក្នុងពេលវេលាដ៏ចាំបាច់នាពេលនេះ ដើម្បីរលត់ភ្លើងសង្គ្រាមដែលផ្តើមឆាបឆេះជាថ្មីកាលថ្ងៃទី៧ខែធ្នូ ដោយសារតែភាគីថៃ បានបើកការវាយប្រហារមកលើកម្ពុជា ហើយភាគីថៃបានប្រកាសលុបចោលការចរចាជាមួយកម្ពុជាតាមគ្រប់មធ្យោបាយទាំងអស់ ដែលខិតខំផ្តួចផ្តើមដោយអន្តរជាតិ មានម៉ាឡេស៊ីជាប្រធានអាស៊ាន និង មហាអំណាចសហរដ្ឋអាមេរិក។

ការដំណើរទស្សនកិច្ចរបស់ប្រេសិតពិសេសនៃក្រសួងការបរទេសចិនលើកនេះ គឺជាកិច្ចខិតខំប្រឹងប្រែងថ្មីមួយទៀតរបស់មហាអំណាចចិនក្នុងការផ្សះផ្សាជម្លោះរវាងកម្ពុជានិងថៃ បន្ទាប់ពីប្រេសិតពិសេសរូបនេះជួបមន្ត្រីយោធាជាន់ខ្ពស់កម្ពុជានិងថៃកាលពីពាក់កណ្តាលខែកញ្ញា ដោយបានហៅដំណើរទស្សនកិច្ចពេលនោះថា «ដើម្បីការងារដោះស្រាយជម្លោះព្រំដែនកម្ពុជា-ថៃ»។

លោក ហ្គួ ជាគុន (Guo Jiakun) អ្នកនាំពាក្យក្រសួងការបរទេសចិនកាលពីថ្ងៃទី១៧ ខែធ្នូ បានអះអាងថា៖«ក្នុងនាមជាប្រទេសជិតខាង និងជាមិត្តភក្តិជិតស្និទ្ធរបស់កម្ពុជា និងថៃ ប្រទេសចិនបានតាមដានយ៉ាងយកចិត្តទុកដាក់ចំពោះជម្លោះព្រំដែនដែលកំពុងបន្តរវាងប្រទេសទាំងពីរ និងបានធ្វើសកម្មភាពសម្របសម្រួលទៅវិញទៅមករវាងភាគីទាំងពីរ ដើម្បីលើកកម្ពស់សន្តិភាព»។

អ្នកនាំពាក្យក្រសួងការបរទេសចិនរូបនេះ បានលើកឡើងបន្តថា៖«នៅថ្ងៃនេះ ប្រេសិតពិសេសទទួលបន្ទុកកិច្ចការអាស៊ីនៃក្រសួងការបរទេសចិន នឹងធ្វើដំណើរបំពេញបេសកកម្មការទូតទៅកាន់ប្រទេសកម្ពុជា និងប្រទេសថៃជាថ្មីម្តងទៀត ក្នុងកិច្ចខិតខំប្រឹងប្រែង ដើម្បីធ្វើជាស្ពានតភ្ជាប់ភាគីទាំងពីរ ក្នុងគោលបំណងកសាងសន្តិភាពឡើងវិញឱ្យបានឆាប់រហ័ស»។

យោងក្រសួងការបរទេសចិនកាលពីថ្ងៃទី១៥ខែកញ្ញា លោក ដេង ស៊ីជុន បានបញ្ជាក់ថា៖«ប្រទេសថៃ និងកម្ពុជា គឺជាប្រទេសជិតខាងរវាងគ្នានិងគ្នា ហើយប្រទេសទាំងពីរគឺជាសមាជិកដ៏សំខាន់របស់អាស៊ាន»។

ក្នុងដំណើរទស្សនកិច្ចកាលថ្ងៃទី១៥ខែកញ្ញានោះ លោក ដេង ស៊ីជុន បានសម្តែងក្តីសង្ឃឹមថា ភាគីទាំងពីរនឹងអនុវត្តយ៉ាងសកម្មនូវការឯកភាពគ្នាដែលសម្រេចបានក្នុងទីក្រុង អាននីង (Anning) ខេត្តយូណាន ដោយរដ្ឋមន្ត្រីការបរទេសចិន កម្ពុជា និងថៃ ដោះស្រាយជម្លោះដោយសន្តិវិធីតាមរយៈការសន្ទនា និងការស្តារសន្តិភាព និងស្ថិរភាពនៅតំបន់ព្រំដែនឱ្យបានឆាប់តាមដែលអាចធ្វើទៅបាន។

ជាមួយគ្នានោះ ប្រទេសចិនក៏បានគាំទ្រអាស៊ានក្នុងការដើរតួនាទីយ៉ាងសកម្មក្នុងការដោះស្រាយជម្លោះរវាងថៃនិងកម្ពុជា ហើយត្រៀមខ្លួនជាស្រេចក្នុងការបន្តផ្តល់ជំនួយចាំបាច់ស្របតាមឆន្ទៈរបស់ភាគីទាំងពីរ។ នេះបើយោងតាម ក្រសួងការបរទេសចិន៕

រ៉ាន់ រើយ