ថៃប្រាប់ជប៉ុនថា ខ្លួនមិនបានបដិសេធការសម្របសម្រួលពីបរទេស ដើម្បីដោះស្រាយជម្លោះព្រំដែនជាមួយកម្ពុជាទេ

រដ្ឋមន្ត្រីការបរទេសថៃ Sihasak Phuangketkeow ប្រាប់ថា ថៃ មិនបានបដិសេធការសម្របសម្រួលពីបរទេស ដើម្បីមកដោះស្រាយជម្លោះព្រំដែនជាមួយកម្ពុជានោះទេ។ នេះបើតាមការផ្សាយរបស់សារព័ត៌មាន The Star កាលពីថ្ងៃព្រហស្បតិ៍ទី១៨ខែធ្នូឆ្នាំ២០២៥។

ក្នុងដំណើរទស្សនកិច្ចនៅប្រទេសជប៉ុន, លោក Sihasak បានប្រាប់ទៅសមភាគីជប៉ុនថា៖ «ថៃ ស្វាគមន៍ចំពោះកិច្ចខិតខំប្រឹងប្រែងពីប្រទេសដទៃទៀត ដើម្បីជួយសម្របសម្រួលឲ្យមានសន្តិភាព ប៉ុន្តែវាជាការសំខាន់ណាស់ដែលកិច្ចសម្របសម្រួលនោះត្រូវតែមិនលម្អៀង និងមិនផ្អៀងទៅរកភាគីណាមួយឡើយ»។

សម្តីលោក Sihasak កើតឡើងចំពេលមហាអំណាចដូចជាសហរដ្ឋអាមេរិកនិងចិន ព្រមទាំងប្រធានអាស៊ានឆ្នាំ២០២៥ គឺម៉ាឡេស៊ី កំពុងខិតខំខ្លាំងណាស់ ដើម្បនាំឲ្យថៃអនុវត្តបទឈប់បាញ់ ហើយងាកទៅរកកិច្ចព្រមព្រៀងសន្តិភាពវិញ។

សូមជម្រាបជាថ្មី ប្រធានាធីបតីអាមេរិក ដូណាល់ ត្រាំ បានដើរតួនាទីយ៉ាងសស្រាក់សស្រាំក្នុងការនាំយកសន្តិភាពជូនកម្ពុជា ក្នុងជម្លោះព្រំដែនជាមួយថៃ។ លោកបានធ្វើការជាមួយនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ដើម្បីនាំមកនូវបទឈប់បាញ់កម្ពុជា-ថៃថ្ងៃទី២៨ ខែកក្កដា ឆ្នាំ២០២៥។

មកដល់ថ្ងៃទី២៦ខែតុលា ពោលគឺក្នុងអំឡុងកិច្ចប្រជុំអាស៊ាននៅទីក្រុងគូឡាឡាំពួ លោកត្រាំនិងលោកអាន់វ៉ា បានធ្វើជាសាក្សីនៃកិច្ចព្រមព្រៀងសន្តិភាពបន្តទៀត ប៉ុន្តែថៃ នៅតែបន្តឈ្លានពានកម្ពុជា មិនខ្វល់អ្វីទាំងអស់៕

អត្ថបទ៖ សុខ សុវណ្ណ