ព័ត៍មានទាន់​ហេតុការណ៏
Search

សម្តេច​តេ​ជោ ប្រកាស​ឲ្យ​មន្ត្រី​ប៉េអិម និង​ប៉ូលិស​ដែល​ប្រើ​ហិង្សា​និង​បាញ់សម្លាប់​គេ ត្រូវ​ចេញមក​ទទួលទោស

ភ្នំពេញ​ ៖​ ពាក់ព័ន្ធ​រឿង​អ​យុ​ត្តិ​ធម៌​សង្គម ​ដែល​កំពុង​កើតមាន​នៅក្នុង​កម្ពុ​ជាប​ច្ចុប្ប​ន្ន ស​ម្តេច​តេ​ជោ ហ៊ុន សែន បាន​រំលឹក​ដល់​បញ្ហា​មួយចំនួន​ដែល​កើតឡើង​ថ្មីៗ​នេះ​ ដែល​មាន​កូន​មេ​ប៉េអិម ខេត្តក្រចេះ វាយ​គេ​និង​យក​កាំ​ភ្លើង​ភ្ជង់​គំរាម​គេ​ដោយ​ខុសច្បាប់ និង មន្ត្រី​ប៉ូលិស​បាញ់សម្លាប់​មនុស្ស​ដែល​គ្មាន​អាវុធ​នៅក្នុង​ដៃ ​ដោយ​គ្រាន់តែ​សង្ស័យ​ថា ​ជា​ចោរលួច​ឡាន។

សម្តេច​តេ​ជោ​នាយករដ្ឋមន្ត្រី​ថ្លែង​បែប​នេះ​ នៅក្នុង​ពិធី​ចែក​សញ្ញាបត្រ​ដល់​និស្សិត​នៃ​សាកលវិទ្យាល័យ​ភ្នំពេញ​អន្តរជាតិ (PPIU) នា​ព្រឹក​ថ្ងៃទី​២៥ ខែមីនា ឆ្នាំ​២០១៩ ដោយ​សម្តេច​បាន​ព្រមាន​មេបញ្ជាការ​កងរាជអាវុធហត្ថ​ខេត្តក្រចេះ​លោក​ឧ​ត្ត​ម​សេនីយ៍​ត្រី សាន្ត ប៊ុន​ថា​ន ថា​នឹង​ប្រឈមមុខ​បាត់បង់​តំណែង​តួនាទី​របស់​ខ្លួន​ប្រសិនបើ​មិន​នាំ​កូនប្រុស​ឈ្មោះ សាន្ត សុខុម ជា​មន្ត្រី​អាវុធហត្ថ​ដែរនោះ​ចូលខ្លួន​ដោះស្រាយ​បញ្ហា​ជុំវិញ​ការប្រើ​ហិង្សា​លើ​យុវជន​ពីរ​នាក់​នៅក្នុង​ខេត្តកំពង់ចាម​ទេនោះ​។

គួរ​បញ្ជាក់​ថា កូនប្រុស​លោក​ឧ​ត្ត​ម​សេនីយ៍​ត្រី សាន្ត ប៊ុន​ថា​ន គឺ​លោក សាន្ត សុខុម ដែលជា​មន្ត្រី​អាវុធហត្ថ​ខេត្តក្រចេះ​ពាក់​ស័ក្តិ ៤ កាលពី​ថ្ងៃទី​១៩ ខែមីនា ឆ្នាំ​២០១៩​ កន្លង​ទៅ​នេះ​បាន​ប្រើ​ហិង្សា​ដោយ​ដាល់​និង​ឡើង​ជង្គង់​ទៅលើ​យុវជន​ពីរ​នាក់​នៅ​កន្លែង​លេង​អ៊ិន​ធើ​ណេ​ត​មួយកន្លែង​ក្នុង​ខេត្តកំពង់ចាម​។​ក្រៅពី​ដាល់​និង​ឡើង​ជង្គង់​ហើយ​មន្ត្រី​អាវុធហត្ថ​រូបនេះ​ថែមទាំង​បាន​ដក​កាំភ្លើង​ភ្ជង់​លើ​យុវជន​ពីររូប​នោះ​ថែម​ទៀតផង​។

សម្តេច​តេ​ជោ​នាយករដ្ឋមន្ត្រី​មានប្រសាសន៍ថា «​ផ្តាំ​ទៅ​មេ​ប៉េអិម​ខេត្តក្រចេះ​ផង បញ្ចុះបញ្ចូល​កូន​ឲ្យ​មក​តាម​ការ​កោះហៅ​របស់​ព្រះរាជអាជ្ញា​ខេត្តកំពង់ចាម​មក​។ វា​អត់​ទាន់​មានរឿង​អី​ទេ ប៉ុន្តែ​បើ​ស្រឡាញ់​កូន​ពេក​អ្នក​នឹង​អស់​ស័ក្តិ។ ខ្ញុំ​អត់​ធ្វើ​អី​ទេ ខ្ញុំ​គ្រាន់តែ​ដក​ស័ក្តិ​បណ្តេញចោល​តែ​ប៉ុណ្ណឹង​»​។​

ជាមួយនេះ​សម្តេច​តេ​ជោ​នាយករដ្ឋមន្ត្រី​ក៏បាន​សូម​ចូលរួម​រំលែក​ទុកជា​មួយ​ក្រុម​គ្រួសារ​នៃ​សព​ដែល​ត្រូវបាន​មន្ត្រី​ប៉ូលិស​បាញ់សម្លាប់​នៅ​ស្រុក​បាភ្នំ ខេត្តព្រៃវែង​។​

សម្តេច​តេ​ជោ ហ៊ុន សែន បាន​ថ្លែង​ថា ​អ្នក​ដែល​បាញ់​អ្នកបើករថយន្ត​នោះ គឺជា​កូនប្រុស​នគរបាល​ជាន់ខ្ពស់​មួយរូប​ហើយ​សម្តេច​បញ្ជា​ឲ្យ​នគរបាល​រូបនោះ​នាំខ្លួន​ជនដៃដល់​ដែល​បាញ់សម្លាប់​ជនរងគ្រោះ មក​ដោះស្រាយ​តាមច្បាប់​ជាបន្ទាន់​បើ​មិន​ដូច្នេះ​ទេ​នឹង​ត្រូវ​អស់តំណែង​ផងដែរ​។

សម្តេច​តេ​ជោ ហ៊ុន សែន មានប្រសាសន៍ថា «​ខ្ញុំ​សូម​ចូលរួម​មរណទុក្ខ​ជាមួយ​គ្រួសារ​សព​អ្នកបើករថយន្ត​ដែល​គេ​ចោទ​ថា ​ជា​ចោរលួច​ឡាន។ សម្តេច​ក្រឡាហោម ស ខេង បាន​បញ្ជា​ឲ្យ​ចាប់បាន​ម្នាក់​ហើយ នៅសល់​ម្នាក់ទៀត។ ​បើ​ទោះបី​វា​ជា​ចោរ​មែន​ក៏ដោយ​ប៉ុន្តែ​នៅពេល​យើង​តាម​វា​ជាប់​ហើយ ត្រូវ​ចាប់​វា អត់​ត្រូវ​បាញ់​អីចឹង​ទេ តែ​នេះ​ហេតុ​អី​បានជា​ធ្វើ​ដល់​ថ្នាក់​បែប​ហ្នឹង ខ្ញុំ​មិន​យល់​ទេ ហេតុ​អី​បាន​វា​ទៅ​អីចឹង​។ ឥឡូវ​ចាប់បាន​មួយ​ហើយ​នៅសល់​មួយទៀត​រឿង​អស់នេះ​ត្រូវ​ប្រយ័ត្នប្រយែង​ប្រតិបត្តិការ​កាត់សេចក្តី​ដោយ​អាវុធ​មិនមែនជា​ជម្រើស​ល្អ​ទេ​»។ សម្តេច​តេ​ជោ ហ៊ុន សែន បន្ត​ទៀត​ថា «​តាម​ដឹង​អ្នក​ដែល​បាញ់​នោះ គឺជា​កូន​មេ​ប៉ូលិស​ទៀត​ផង​ ហើយ​មេ​ប៉ូលិស​នោះ​ត្រូវតែ​តាម​រក​ប៉ូលិស​ដែល​បាញ់​នោះ​ឲ្យ​ឃើញ​បើ​មិន​អីចឹង​ទេ ទៅ​ទាំង​មេ​ប៉ូលិស​នេះ (​ដកតំណែង)»។

ម្តេច​តេ​ជោ ហ៊ុន សែន បាន​ចាត់​ទុក​ថា ​នេះ​ជា​រឿង​អយុត្តិធម៌​មួយចំនួន​នៅក្នុង​សង្គម មិនគួរ​កើត​បែរជា​បណ្តោយ​ឲ្យ​កើតមាន​ទៅ​កើត ដូចជា​ករណី​បាញ់សម្លាប់​ក្រុម​ជនសង្ស័យ​លួច រថយន្ត​នៅឯ​ខេត្តព្រៃវែង​ជាដើម វា​លើកដៃ​សំពះ​ហើយ​ហេតុ​អី​នៅតែ​បាញ់សម្លាប់​ទៀត។ សម្តេច​បន្តថា​រឿង​ទាំងអស់​នេះ​ហើយ ​ដែល​យើង​ត្រូវ​គិត​ទោះបី​មានអំណាច​បុណ្យស័ក្តិ​យ៉ាងណាក៏ដោយ​ធាតុ​ជា​មនុស្ស​ត្រូវតែ​មានគុណ​ធម៌ និង សីល​ធម៌​ផង​ដែរ។ ចំពោះ​ការ​បាញ់សម្លាប់​នេះ​សម្ដេច​តេ​ជោ ហ៊ុន សែន ចាត់ទុកជា​ទង្វើ​ខុសច្បាប់​ ដែល​ជា​សកម្មភាព​មិន​គួរ​គប្បី​ឡើយ។ សម្រាប់​សម្ដេច ហ៊ុន សែន បានលើកឡើង​ថា​ករណី​បាញ់សម្លាប់​គេ នេះ​គឺ​ស្មើនឹង​ការបំបាត់​ភស្តុតាង។

សូម​បញ្ជាក់​ថា ​នៅ​យប់​ថ្ងៃទី​២៣ ខែមីនា ឆ្នាំ​២០១៩ ស្ថិតនៅ​ចំណុច​ភូមិ​គោក​សណ្តែក ឃុំរក្សជ័យ ស្រុក​បាភ្នំ ខេត្តព្រៃវែង មាន​ករណី​ភ្ញាក់ផ្អើល​មួយ​បាន​កើតឡើង​ដោយ​គេ​បានឃើញ​កម្លាំង​នគរបាល និង ជាច្រើន​នាក់​បាន​ដេញ​តាម​រថយន្ត​មួយ​គ្រឿង​ម៉ាក​ព្រូស​ ពណ៌​ប្រផេះ​ ពាក់​ស្លាក​លេខ​ភ្នំពេញ 2AF-2679។ ការ​ដេញ​តាម​រថយន្ត​មួយ​គ្រឿង​នេះ ​ត្រូវបាន​សមត្ថកិច្ច​ប្រាប់ថា​ ជា​ជនសង្ស័យ​ក្នុង​អំពើ​លួច​រថយន្ត​ចេញពី​ភ្នំពេញ ឆ្ពោះ​មក​ខេត្តព្រៃវែង​ហើយ​ត្រូវបាន​ម្ចាស់​រថយន្ត​ប្តឹង​មក​សមត្ថកិច្ច ស្រុក​ព្រះស្តេច ក្រោយ​ពិនិត្យឃើញ​តាម​ប្រព័ន្ធ GPS​។

តាម​សេចក្តីរាយការណ៍​នានា​បាន​បង្ហាញថា ​មូលហេតុ​មកពី​ជនរងគ្រោះ ទិញ​រថយន្ត​បង់លុយ​មិនទាន់​គ្រប់ ​ហើយ​ម្ចាស់​ដើម​បាន​យក​រថយន្ត​នោះ​ទៅ​ជួល​ឲ្យ​ជនជាតិ​ចិន​ធ្វើ​ឲ្យ​អ្នកទិញ​ខឹង រហូត​បាន​ស្កាត់​ទៅ​យក​រថយន្ត​ពី​ជនជាតិ​ចិន​ទាំង​ទទឹងទិស​រួច​បើក​មក​ស្រុកកំណើត​។ ស្រាប់តែ​ម្ចាស់​ដើម​ស្រាវជ្រាវ​តាម GPS ដេញ​ពីក្រោយ​ប្ដឹង​សមត្ថកិច្ច​ថា​ចោរៗ ទើប​សមត្ថកិច្ច​ស្ទាក់​បាញ់សម្លាប់​អ្នកទិញ​រថយន្ត​តែម្ដង ព្រោះ​ស្មានថា ចោរលួច​រថយន្ត​ដូច​ពាក្យបណ្ដឹង​។

ជនរងគ្រោះ​ដែល​ស្លាប់​ឈ្មោះ ម៉ន រ៉ាវុធ អាយុ៣២ឆ្នាំ មុខរបរ​ជាង​ម៉ៅការ​សំណង់​មាន​ស្រុកកំណើត​នៅ ឃុំ​ឈើកាច់ ស្រុក​បាភ្នំ ខេត្តព្រៃវែង បច្ចុប្បន្ន​ស្នាក់នៅ ខណ្ឌ​ពោធិ៍​សែន​ជ័យ រាជធានី​ភ្នំពេញ​។ អ្នករួមដំណើរ​ឈ្មោះ វ៉ាន ខេមរិន ភេទ​ប្រុស អាយុ​២៧​ឆ្នាំ នៅ​ភូមិ​ឈើកាច់ ឃុំ​ឈើកាច់ ស្រុក​បាភ្នំ ខេត្តព្រៃវែង​រង​របួស​ ហើយ​ត្រូវ​សមត្ថកិច្ច​ឃាត់ខ្លួន​។

ក្រោយពី​ធ្វើការ​សាកសួរ​និង​ស្រាវជ្រាវ​រួចមក កម្លាំង​ស្នងការ​ខេត្តព្រៃវែង បានសម្រេច​ឃាត់ខ្លួន មន្ត្រី​នគរបាល​ម្នាក់​ឈ្មោះ ជឹម សាវុធ ដោយ​ជាប់​ពាក់​ព័ន្ធ​ក្នុង​ការ​បាញ់ប្រហារ​ទៅលើ​រថយន្ត​ជនសង្ស័យ បណ្តាល​ឲ្យ​ជនសង្ស័យ​ម្នាក់​ស្លាប់​បាត់​បង់ជីវិត ដោយឡែក​មន្ត្រី​នគរបាល​ម្នាក់ទៀត​លោក ជឹម រតនៈ នាយផ្នែក​អន្តោប្រវេសន៍​នៃ​អធិការដ្ឋាន​នគរបាល​ស្រុក​ព្រះស្តេច​ដែល​ជាប់​ពាក់​ព័ន្ធ​ក្នុង​រឿង​នេះ​ដែរ កំពុង​រត់​គេច​ខ្លួន​បាត់។

ទាក់ទង​ទៅ​នឹង​អំពើ​អយុត្តិធម៌​ក្នុង​សង្គម​បែបនេះ សម្តេច​តេ​ជោ ហ៊ុន សែន បានស្នើ​ឲ្យ​គ្រប់​ទូរទស្សន៍​ចាក់​ផ្សាយ​ឡើងវិញ ​រឿង​ភាគ​តុលាការ​មុខ​ដែក​(​ប៉ាវ​ចិន​)​ដោយ​សម្តេច​យល់ថា​ នោះ​វា​ជា​ការ​ល្អ​ប្រសើរ​ណាស់ ក្នុងពេលដែល​ប្រទេស​កម្ពុជា​កំពុងតែ​កែទម្រង់​ស៊ីជម្រៅ​លើ​ប្រព័ន្ធ​តុលាការ និង ស្វែងរក​យុ​ត្តិ​ធម៌​ក្នុង​សង្គម​ឲ្យ​បានល្អ។

សម្តេច​បាន​មានប្រសាសន៍ថា ប្រសិនបើ​ទូរទស្សន៍​គ្រប់​ប៉ុស្តិ៍​ចាក់​ផ្សាយ​រឿង​ភាគ​តុលាការ​មុខ​ដែក (​ប៉ាវ​ចិន​)​មួយ​ភាគៗ នៅ​រៀងរាល់​យប់​មុន​ចូល​ដេក​គឺជា​ការ​ល្អ​ណាស់​ព្រោះ​រឿង​នេះ​បង្ហាញ​ពី​ការស្វែងរក​យុត្តិធម៌​សង្គម​ជូន​ប្រជាពលរដ្ឋ។

សម្តេច​នាយក​រដ្ឋមន្ត្រី ហ៊ុន សែន មានប្រសាសន៍ថា «​យើង​ចង់​ធ្វើ​កំណែទម្រង់​តុលាការ​របស់​យើង​និង​ចង់​ស្វែងរក​យុត្តិធម៌​សង្គម​អ៊ីចឹង​ចាក់​រឿង ប៉ាវ​ចិន​ឲ្យ​មើល​តែ​ម្តង​ទៅ​…»។ អញ្ចឹងទេ​ការកែទម្រង់​តុលាការ​និង​ការ​រក​យុ​ត្តិ​ធម៌​សង្គម​ទាមទារ​ឲ្យ​យើង​ធ្វើការ​ស្រាវជ្រាវ​យើង​ត្រូវ​សិក្សា​អំពី​របៀប​បំបែក​ក្តី​ដោយ យុ​ត្តិ​ធម៌។

សម្តេច​តេ​ជោ ហ៊ុន សែន ក៏បាន​និទាន​ពី​ឈុត​ឆាក​ដ៏​អយុត្តិធម៌​មួយ​នៅក្នុង​រឿង​តុលាការ​មុខ​ដែក ដោយ​បង្ហាញ​អំពី​ចិត្ត​ប្រែប្រួល​របស់​បុរស​ម្នាក់ ដែល​បានមក​ប្រឡង​ធ្វើ​មន្ត្រី ខណៈពេលដែល​ប្រពន្ធ​បាន​ខិតខំ​រកលុយ​ចិញ្ចឹម​ក្រុម​គ្រួសារ​និង​ផ្គត់ផ្គង់​ប្តី​បាន​រៀនសូត្រ រហូត​ប្រឡង​ជាប់​ធ្វើ​មន្ត្រី​ធំ ប៉ុន្តែ​គួរ​ឲ្យ​សោកស្តាយ​នៅពេលដែល​បុរស​នោះ​ធ្វើ​មន្ត្រី​ធំ បាន​កុហក​ស្តេច​ថា​ខ្លួន​នៅ​កំលោះ ហើយ​ក៏បាន​រៀបការ​ក្លាយទៅជា​ព្រះរាជ​ស​ន្និសា (​កូនប្រសារ​ស្តេច​) ដើម្បី​លាក់បាំង​អតីតភាព​របស់​ខ្លួន​បុរស​នោះ​ថែមទាំង​ឲ្យ​មនុស្ស​ទៅតាម​សម្លាប់​ប្រពន្ធ​ខ្លួន​បំបិទមាត់​ទៀត ដែល​ចុងក្រោយ​នៃ​ឈុត​ឆាក​នេះ​បុរស​ម្នាក់​នោះ​ក៏​ត្រូវ​បាន​ប៉ាវ​ចិន កាត់​ទោស​ប្រហារជីវិត ដែល​សូម្បី​ស្តេច​ក៏​មិនអាច​រារាំង​បានដែរ៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114