តុលាការថៃ ដាក់គុកគ្រូបង្ហាត់កងទ័ព២នាក់ ព្រោះប្រព្រឹត្តទង្វើសាហាវឃោរឃៅ ធ្វើឲ្យកូនទាហានស្លាប់

គ្រូបង្ហាត់កងទ័ពថៃចំនួន២នាក់ ត្រូវបានកាត់ទោសដាក់ពន្ធនាគារ ដោយសារតែពួកគេមានជាប់ពាក់ព័ន្ធនឹងទង្វើសាហាវឃោរឃៅអមនុស្សធម៌ ឈានដល់បណ្តាលឲ្យកូនទាហានម្នាក់ស្លាប់។ នេះបើតាមការផ្សាយរបស់ Bangkok Post នៅថ្ងៃសុក្រទី១៩ខែធ្នូឆ្នាំ២០២៥។

រឿងនេះកើតឡើងតាំងតែឆ្នាំ២០២៣មកម្ល៉េះ នៅឯជំរំ Mengrai Maharaj ដែលគ្រូបង្ហាត់ទាំងពីរ (មិនបញ្ចេញឈ្មោះ) បានឲ្យកូនទាហានឈ្មោះ Kittithorn Wiangbanphot ហ្វឹកហ្វឺនដោយប្រើទង្វើអមនុស្សធម៌និងឃោរឃៅដាក់ រហូតដល់ធ្លាក់ខ្លួនឈឺ ឈានដល់បាត់បង់ជីវិត។

យ៉ាងណា តុលាការព្រហ្មទណ្ឌសម្រាប់សំណុំរឿងពុករលួយនិងអំពើមិនសមរម្យភូមិភាគ៥ ទើបចេញសាលក្រមកាលពីថ្ងៃព្រហស្បតិ៍ទី១៨ខែធ្នូនេះប៉ុណ្ណោះ។ 

តាមពិតដំបូងឡើយ តុលាការបានសម្រេចផ្តន្ទាទោសគ្រូបង្ហាត់ម្នាក់ៗឲ្យជាប់ពន្ធនាគាររយៈពេល១ឆ្នាំ ក្រោមមាត្រា៦នៃ ច្បាប់ស្តីពីការបង្ការនិងបង្ក្រាបអំពើធ្វើទារុណកម្មនិងការបង្ខិតបង្ខំឆ្នាំ២០២២ ប៉ុន្តែទោសនេះត្រូវបន្ថយ១ភាគ៣ មកនៅត្រឹម៨ខែវិញ បន្ទាប់ពីជនជាប់ចោទ ព្រមផ្តល់ចម្លើយដែលមានប្រយោជន៍ដល់រឿងក្តី»។

សូមជម្រាបថា បញ្ហានៃការធ្វើទារុណកម្មឬអំពើឃោរឃៅ ក្នុងពេលហ្វឹកហ្វឺនកងទ័ពថៃ គឺជាប្រធានបទដ៏ក្ដៅគគុក និងជាកង្វល់ផ្នែកសិទ្ធិមនុស្ស អស់រយៈពេលជាច្រើនទសវត្សរ៍មកហើយ។

កន្លងមក បើយោងតាមរបាយការណ៍ពីសកម្មជនសិទ្ធិមនុស្ស គ្រូៗកងទ័ព បានប្រើហិង្សាលើរាងកាយដោយការវាយនឹងដំបង ទាត់ធាត់ ឬការប្រើកម្លាំងបាយហួសហេតុក្រោមលេសថាជាការដាក់វិន័យ។

ទាហានត្រូវបង្ខំឲ្យធ្វើលំហាត់ប្រាណធ្ងន់ធ្ងរក្នុងរយៈពេលយូរ ក្រោមអាកាសធាតុក្តៅខ្លាំង ដែលជារឿយៗបណ្តាលឲ្យ ដាច់សរសៃឈាមខួរក្បាល។ មិនត្រឹមប៉ុណ្ណឹង ក៏មានការធ្វើបាបផ្លូវចិត្តផងដែរ តាមរយៈការបង្ខំឲ្យធ្វើសកម្មភាពដ៏គួរឲ្យខ្មាសអៀន ឬការប្រើពាក្យសម្តីជេរប្រមាថធ្ងន់ៗ៕

អត្ថបទ៖ សុខ សុវណ្ណ