ពលរដ្ឋស្នើអាជ្ញាធរសង្កាត់កាកាបទី២ ជួយពិនិត្យទឹកស្អុយហូរចេញពីលូ ខណៈខែប្រាំងនៅមានទឹកដក់លើផ្លូវ

រដូវវស្សាផុតឈានចូលរដូវប្រាំងទៅហើយតែនៅលើកំណាត់ផ្លូវបេតុងមួយកន្លែង​ ក្នុងភូមិកាកាប២​ សង្កាត់កាកាបទី២​ ខណ្ឌពោធិ៍សែនជ័យ​ នៅតែមានទឹកស្អុយដក់លើដងផ្លូវជះក្លិនស្អុយ​ ពិបាកធ្វើដំណើរ​ និងប្រកបរបរចិញ្ចឹមជីវិតប្រចាំថ្ងៃ​ ពលរដ្ឋស្នើសុំឲ្យអាជ្ញាធរពាក់ព័ន្ធមេត្តាជួយពិនិត្យមើលផង។

លោក​ រស្មី​ ជាអាជីវករលក់ចាបហួយនៅទីនោះបានលើកឡើងថា​ គាត់មកជួលផ្ទះរកស៉ីលក់ដូរនៅទីនោះជាយូឆ្នាំមកហើយ​ ។ ហើយទីតាំងខាងលើ​ ថ្វីបើថារដូវវស្សាភ្លៀងមករាល់ថ្ងៃទឹកហូរមិនដាច់​ ចុះហេតុអ្វីមកដល់ពេលនេះលែងភ្លៀងទៅហើយ បែជាមានទឹកស្អុយហូរចេញពីប្រព័ន្ធលូដក់លើដងផ្លូវ​ ពិបាកធ្វើដំណើរនិងលក់ដូរ​ ជាពិសេសពេលហូបបាយម្តងៗ​ ក្លិនស្អុយ​ តែមិនដឹងធ្វើយ៉ាងមិចមានតែទ្រាំ។

លោក​ បន្តថា​ ពេលខ្លះអ្នកធ្វើដំណើរឆ្លងកាត់​ អ្នកខ្លះគាត់ក៏បន្ថយល្បឿនទៅ​ ហើយអ្នកខ្លះទៀតមិនបានបន្ថយល្បឿន ធ្វើឲ្យជះទឹកស្អុយចូលដល់ផ្ទះគាត់ទៀតផង​ ។ គាត់សំណូមពរដល់អាជ្ញាធរពាក់ព័ន្ធមេត្តាជួយពិនិត្យមើលទីតាំងខាងលើផង ដើម្បីជាប្រយោជន៍រួម​ ទាំងធ្វើដំណើរនិងប្រកបរបរផ្សេងៗ។

ជាមួយគ្នានេះផងដែរ​ ក្នុងការងារកម្ពុជាថ្មីបានទាក់ទង​ ទៅលោក​ វង្ស​ សៀង​ហាក់​ ចៅសង្កាត់កាកាបទី២​ តែទងទងមិនបាន៕ដោយ៖សុខា