ព័ត៍មានទាន់​ហេតុការណ៏
Search

ឆ្មក់​ចូល​បង្ក្រាប​ទីតាំង ផលិត និង​ចែកចាយ​ថ្នាំញៀន​ដ៏​ធំ​ នៅ​ក្នុង​ក្លឹប «​ម៉ៃ អា​មី »​ ឃាត់​មនុស្ស​៥០​នាក់ ម៉ាស៊ីន​ផលិត និង​គ្រឿងញៀន​មួយចំនួន​ធំ​

ភ្នំពេញ ​៖​ ទីតាំង ផលិត និង​ចែកចាយ​ថ្នាំញៀន​ដ៏​ធំ បន្ទាប់ពី​រ៉ុ​ក ដែល​លាក់ខ្លួន ពួន​​​សម្ងំ នៅ​ក្នុង ក្លឹប​កម្សាន្ត​មួយ​កន្លែង​ទៀត យីហោ “​ម៉ៃ អា​មី MAIAMI” ត្រូវបាន​កម្លាំង នៃ​ស្នងការ​នគរបាល រាជ​ធានី​ភ្នំពេញ បាន​ឆ្មក់​ចូលទៅ​បង្ក្រាប ដោយ​បាន​ឃាត់ខ្លួន​មនុស្ស ប្រុស/ស្រី ប្រមាណ​ជា​៥០​នាក់ រួម​នឹង​ម៉ាស៊ីន​ផលិត និង​គ្រឿងញៀន​មួយ​ចំនួន​ធំ។

លោក​ឧត្ដមសេនីយ៍ ស ថេត ស្នងការ​នគរបាល​រាជធានី​ភ្នំពេញ បាន​ដឹកនាំ​កម្លាំង​បើក​ប្រតិបត្តិការ ចុះ​បង្ក្រាប បាន​ថ្លែង​ឲ្យ​ដឹងថា ការចុះ​បង្ក្រាប​ទីតាំង ផលិត និង​ចែកចាយ​ថ្នាំញៀន​ដ៏​ធំ កាលពី​ម៉ោង​០២​ទៀបភ្លឺ ឈាន​ចូល​ថ្ងៃ​ព្រហស្បតិ៍ ទី​១១ ខែ​មេសា ឆ្នាំ​២០១៩ នៅ​ចំណុច ក្លឹប​កម្សាន្ត​មួយ​កន្លែង​ទៀត យីហោ “​ម៉ៃ អា​មី MAIAMI” ស្ថិតនៅ​តាម​បណ្ដោយ​ផ្លូវ​៣៦០ (​ទល់មុខ ស្ថានីយ ទូរទស្សន៍​អប្សរា​) ស្ថិត​ក្នុង​សង្កាត់​បឹង​កេងកង​ទី​១ ខណ្ឌ​ចំការមន ភ្នំពេញ ដោយ​បាន​ឃាត់​ខ្លួន​មនុស្ស​៥០​នាក់ ក្នុង​នោះ​ស្រី​១២​នាក់ និង​ដកហូត​ម៉ាស៊ីន​ផលិត​គ្រឿងញៀន​មួយ​ចំនួន និង​សារធាតុ​ញៀន​មួយ​ចំនួន។

លោកស្នងការ បន្តថា ប្រតិបត្តិការ​នេះ បាន​ធ្វើ​ឡើង​ដោយមាន​ការអនុញ្ញាត​ពី​ លោក លី សុផាន់​ណា ព្រះរាជអាជ្ញា​រង ​នៃ​សាលាដំបូង​រាជធានី​ភ្នំពេញ និង​មានការ​សហការ​ពី​ការិយាល័យ​នគរបាល​ព្រហ្មទណ្ឌ​កម្រិត​ស្រាល​រាជធានី​ភ្នំពេញ អធិការដ្ឋាន​នគរបាល​ខណ្ឌ​ចំការមន ព្រមទាំង​កម្លាំង​ប៉ុស្តិ៍​នគរបាល​មូលដ្ឋាន​បឹង​កេងកង។ បច្ចុប្បន្ន​មនុស្ស និង​សម្ភារៈ បាន​បញ្ជូន​ទៅ​ស្នងការដ្ឋាន​នគរបាល​រាជ​ធានី​ភ្នំពេញ។

គួរ​រម្លឹក​ដែរ​ថា ទីតាំង​ក្លឹប​ខាង​លើ​នេះ ត្រូវ​បាន​កម្លាំង អាជ្ញាធរ​រាជធានី​ភ្នំពេញ និង​អាជ្ញាធរ ខណ្ឌ ចំការមន ​​ចុះ​មក​ធ្វើ​ការ​ហាម​ឃាត់​ចំនួន​៣​ដង​មក​ហើយ ថែមទាំង​បិទ​លែង​ឲ្យ​ដំណើរការ​ទៀត​ផង ប៉ុន្តែ​សង្ស័យ​អ្នក​កាង​នៅ​ពីក្រោយ​ធំ​ជាង​អាជ្ញាធរ ទើប​បិទ​មិន​បាន​ប៉ុន្មាន ស្រាប់តែ​ឃើញ​បើក ដំណើរការ​វិញ ដោយ​មិនទាន់​ដឹង​ពី​មូលហេតុ។​ រហូតដល់ លោក ស ថេត បញ្ជា​កម្លាំង​ចុះ​បង្ក្រាប​តែម្ដង​។​

​សូម​រំលឹកថា នេះ​ជា​ប្រតិបត្តិការ​ឆ្មក់​បង្ក្រាប​ទីតាំង​ផលិត និង​ចែកចាយ​ថ្នាំញៀន ដ៏​ធំ ជា​លើក​ទី​ពីរ ក្រោម​ការដឹកនាំ លោក​ឧត្ដមសេនីយ៍ ស ថេត ស្នងការ​នគរបាល​រាជធានី​ភ្នំពេញ បន្ទាប់ពី​ឆ្មក់​ចូល​បង្ក្រាប​ទីតាំង​មជ្ឈមណ្ឌល​កម្សាន្ត រ៉ុ​ក។

​ជាមួយគ្នានេះ មហាជន​សម្ដែង​ក្តី​ត្រេកអរ​យ៉ាងខ្លាំង​ចំពោះ​ចំណាត់ការ​ចុះបង្ក្រាប​នេះ ពួកគាត់​សង្ឃឹម​ថា ទីតាំង​ក្លឹប ម៉ៃ អា​មី មិនត្រូវ​បាន​បើក​ឡើង​វិញទៀត​ទេ ព្រោះ​ទីតាំង​នោះ អាជ្ញាធរ​ចុះ​បិទ​បី​ដង​មកហើយ នៅតែ​អាច​បើក​បាន​វិញ​ដដែល ប្រហែល​អាចមាន​អ្វី​មិន​ប្រក្រតី​ហើយ៕