ព័ត៍មានទាន់​ហេតុការណ៏
Search

Hun Sen Cup 2019 ៖​ វគ្គ​ជម្រុះ​១៦​ក្រុម​ចុងក្រោយ​ថ្នាក់​ខេត្ត ចាប់​គូប្រកួត​រួចរាល់​ហើយ

ពានរង្វាន់​សម្តេច​អគ្គមហាសេនាបតី​តេ​ជោ ហ៊ុន សែន លើក​ទី​១៣ ឆ្នាំ​២០១៩​ដែល​រៀបចំឡើង​ដោយ​គណៈកម្មាការ​ប្រកួត​បាល់ទាត់​ជាតិ​កម្ពុជា (CNCC) សេនាធិការ​របស់​សហ​ព័ន្ធ​កីឡាបាល់ទាត់​កម្ពុជា​(​ស​.​ប​.​ក​) បានចាប់ផ្ដើម​ពី​ចុងខែ​កុម្ភៈ មក​ម្ល៉េះ​ដោយមាន​ការប្រកួត​បែង​ចែកចេញជា ២​វគ្គ​ដូច​កាលពី​ឆ្នាំ​២០១៨​ដែរ​គឺ​វគ្គ​ប្រកួត​ជម្រុះ​ថ្នាក់​ខេត្ត និង​វគ្គ​ប្រកួត​ជម្រុះ​ថ្នាក់ជាតិ​។

យោង​តាម​ប្រភព​មកពី​សហព័ន្ធ​កីឡាបាល់ទាត់​កម្ពុជា បាន​បញ្ជាក់​ថា ​ការប្រកួត​វគ្គ​ថ្នាក់​ខេត្ត​​ចាប់ផ្ដើម​មុនគេ​ដោយ​ចាប់​ប្រកួត​ពីថ្ងៃ​ទី​២៦ ខែកុម្ភៈ ឆ្នាំ​២០១៩ ខណៈ​មាន​ក្រុម​ទាំងអស់​ចំនួន ២៣​ចូលរួម មកពី​២៣​ខេត្ត ដែល​បែង​ចែកចេញជា ៦​ពូ​ល​ដែល​១​ពូ​ល​មាន ៤​ក្រុម លើកលែងតែ​ពូ​ល F ដែល​មានតែ​៣​ក្រុម​ធ្វើការ​ប្រកួត​ចំនួន​មួយ​ជើង​ប៉ុណ្ណោះ រៀងរាល់ថ្ងៃ​អង្គារ​និង​ថ្ងៃ​ពុធ នៃ​សប្ដាហ៍​នីមួយៗ​។

តាម​គម្រោង​ការប្រកួត​ដែល​មានតែ ១​ជើង ក្រុម​ចំនួន​១៦ នឹង​ត្រូវ​រើស​ចេញពី​ចំណោម​ក្រុម​ទាំង​២៣ គឺ​ក្រុម​លេខ ១ និង​លេខ ២ ប្រចាំ​ពូ​ល​ទាំង​៦ បូក​បញ្ចូល​ជាមួយ​ក្រុម​លេខ ៣​ល្អ​ចំនួន ៤​ក្រុម​ផ្សេងទៀត ដើម្បី​ប្រកួត​ក្នុង​វគ្គ ១៦​ក្រុម​ចុងក្រោយ​និង​ជា​បន្តបន្ទាប់​រហូតដល់​វគ្គ​ផ្ដាច់ព្រ័ត្រ ថ្នាក់​ខេត្ត ដែល​គ្រោង​នឹងធ្វើ​ឡើង​នៅ​ថ្ងៃទី​២៩ ខែឧសភា ឆ្នាំ​២០១៩​។

សម្រាប់​កម្មវិធី​ប្រកួត​ប្រចាំ​វគ្គ​១៦​ក្រុម​ថ្នាក់​ខេត្ត​នឹង​នៅ​ថ្ងៃ​អង្គារ ទី​២៣ ខែមេសា ដោយ​ក្រុម​ខេត្តសៀមរាប ទទួល​ក្រុម​ខេត្តកំពង់ស្ពឺ ហើយ​ក្រុម​ខេត្ត​កែប ទទួល​ក្រុម​ខេត្តបន្ទាយមានជ័យ ខណៈ​ក្រុម​ខេត្តព្រៃវែង ទទួល​ក្រុម​ខេត្តបាត់ដំបង​។ ចំណែក​នៅ​ថ្ងៃ​ពុធ ទី​២៤ ខែមេសា វិញ​ក្រុម​ខេត្តកំពត ទទួល​ក្រុម​ខេត្តមណ្ឌលគិរី ហើយ​ក្រុម​ខេត្តកំពង់ធំ ទទួល​ក្រុម​ខេត្តព្រះវិហារ និង​ក្រុម​ខេត្ត​ត្បូងឃ្មុំ ទទួល​ក្រុម​ពោធិ៍សាត់​។ នៅ​ថ្ងៃ​ព្រហស្បតិ៍ ទី​២៥ ខែមេសា ក្រុម​ខេត្តកោះកុង ទទួល​ក្រុម​ស្វាយរៀង​ហើយ​ក្រុម​រតនៈគិរី ទទួល​ក្រុម​ខេត្តតាកែវ​។

បន្ទាប់មក​ក្រុម​ដែល​បាន​ឈានដល់​វគ្គ​ផ្ដាច់ព្រ័ត្រ​នៃ​វគ្គ​ថ្នាក់​ខេត្ត​ចំនួន​២​ក្រុម នឹង​ទទួលបាន​កៅអី​ឡើងមក​ប្រកួត​វគ្គ​ថ្នាក់ជាតិ បន្តទៀត​ជាមួយ​ក្រុម​ចំនួន​១៤ ដែលជា​សមាជិក​នៃ​លី​គ​កំពូល​កម្ពុជា រដូវ​កាល​២០១៩ ក្នុង​វគ្គ​១៦​ក្រុម​ចុងក្រោយ ចាប់ពី​ថ្ងៃទី​១៩ ខែមិថុនា​ប្រកួត​ចំនួន​២​ជើង (​ក្នុង​ដី និង​ក្រៅ​ដី​) លើកលែងតែ​វគ្គ​ពាក់កណ្ដាល​ផ្ដាច់ព្រ័ត្រ និង​វគ្គ​ផ្ដាច់ព្រ័ត្រ ដែល​ប្រកួត​តែ ១​ជើង​។ វគ្គ​ផ្តាច់​ព្រ័ត្រ​នឹង​ធ្វើ​ឡើង​ថ្ងៃ​ទី​២ ខែវិច្ឆិកា ឆ្នាំ២០១៩៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114