ព័ត៍មានទាន់​ហេតុការណ៏
Search

វិ​រ​បុរស​បាល់ទាត់ Pele​វះកាត់​យក​គ្រួស​តម្រងនោម​ចេញ​នៅ​ប្រទេស​កំណើត​ប្រេ​ស៊ី​ល​

ក្រុមគ្រូពេទ្យ បាន​និយាយ​កាលពី​ថ្ងៃ​ពុធ​ថា វិ​រ​បុរស​បាល់ទាត់​របស់​ក្រុម​ជម្រើសជាតិ​ប្រេ​ស៊ី​ល​លោក Pele​នឹង​វះកាត់​យក​គ្រួស​ក្នុង​តម្រងនោម​ចេញ រយៈពេល​១​ថ្ងៃ​ប៉ុណ្ណោះ ក្រោយពេល​លោក​វិលត្រឡប់​មកកាន់​ប្រទេស​កំណើត​វិញ ក្រោយ​ទទួល​ការព្យាបាល​នៅក្នុង​មន្ទីរពេទ្យ​ក្រុងប៉ារីស សម្រាប់​ការឆ្លង​ជំងឺ​មួយ​នេះ​។

វិ​រុ​បុរស​បាល់ទាត់​វ័យ​៧៨​ឆ្នាំ​ម្នាក់​នេះ ត្រូវ​បាន​គេ​បញ្ជូន​ទៅកាន់​មន្ទីរពេទ្យ Albert Einstein ស្ថិតក្នុង​ទីក្រុង Sao Paulo សម្រាប់​ការធ្វើ​តេស្ត​បន្ថែមទៀត ក្រោយ​ការមកដល់​ប្រេ​ស៊ី​ល​របស់លោក កាលពី​ព្រឹក​ថ្ងៃ​អង្គារ​។

មន្ទីរពេទ្យ បាន​និយាយ​នៅក្នុង​សេចក្តី​ថ្លែងការណ៍​ថា ការធ្វើ​តេស្ត​ឃើញ​មាន​គ្រួស​ក្នុង​តម្រងនោម​ផ្នែក​ខាងឆ្វេង​របស់លោក ហើយ​ការវះកាត់​យកចេញ ត្រូវបាន​កំណត់​រួចហើយ អំឡុង​ការ​សម្រាក​ព្យាបាល​ក្នុង​មន្ទីរពេទ្យ​របស់​លោក ប៉ុន្តែ​ពេលវេលា​ជាក់លាក់ មិនត្រូវ​បានប្រកាស​ឲ្យ​ដឹង​នោះទេ​។

ពួកគេ​បាន​បន្ត​ទៀត​ថា អ្នកជំងឺ​ស្ថិតនៅក្នុង​ស្ថានភាព​ល្អប្រសើ​រ​ទេ ហើយ​និង​ស្ថិត​ក្រោម​ការ​យកចិត្តទុកដាក់​មើលថែ​យ៉ាង​ដិតដល់​ពី​ក្រុមគ្រូពេទ្យ​។

​សូម​បញ្ជាក់​ថា លោក Pele​ដែល​ត្រូវបាន​គេ​ចាត់ទុកថា ជា​កីឡាករ​បាល់ទាត់​អស្ចារ្យ​ជាងគេ​បំផុត​នៅក្នុង​ប្រវត្តិសាស្ត្រ​នោះ ត្រូវ​បាន​គ្រូពេទ្យ​អនុញ្ញាត​ឲ្យ​ចាក​ចេញពី​ពេទ្យ​ឯកជន​អាមេរិក​ស្ថិត​នៅ​ក្នុង​ទីក្រុង​ប៉ារីស កាលពី​ល្ងាច​ថ្ងៃ​ចន្ទ ក្រោយពី​លោក​ធ្លាក់ខ្លួន​ឈឺ បន្ទាប់ពី​ចូលរួម​ព្រឹ​ត្តិ​ការណ៍​ផ្សព្វផ្សាយ​ជាមួយ​ខ្សែប្រយុទ្ធ​បារាំង Kylian Mbappe ។

លោក Pele​ដែល​បានឈ្នះ World Cup​ជាមួយ​ក្រុម​ជម្រើសជាតិ​ប្រេ​ស៊ី​ល​នៅ​ឆ្នាំ​១៩៥៨, ១៩៦២ និង​ឆ្នាំ​១៩៧០​នោះ មាន​បញ្ហា​សុខភាព​ធ្ងន់ធ្ងរ​ច្រើន ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114