ព័ត៍មានទាន់​ហេតុការណ៏
Search

សម្តេច​តេ​ជោ ហ៊ុន សែន អំពាវនាវ​ឲ្យ​ប្រជាពលរដ្ឋ​ជិះ​ឡាន​ក្រុង​របស់​រដ្ឋ​ ដែល​ឥតគិតថ្លៃ ទៅលេង​ស្រុកកំណើត​ដើម្បី​កាត់បន្ថយ​ការ​ចំណាយ

ភ្នំពេញ​ ៖ ​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​កម្ពុជា ​បាន​ប្រាប់​ឲ្យ​ពលរដ្ឋ​ធ្វើដំណើរ​តាម​រថយន្តក្រុង ១២០​គ្រឿង ដែល​រាជរដ្ឋាភិបាល​ផ្ដល់​សេវា​ដឹកជញ្ជូន​ដោយ​ឥតគិតថ្លៃ​ចាប់ពី​ថ្ងៃទី​១២ ដល់​ថ្ងៃទី​១៨ មេសា។ សម្ដេច​មាន​​ប្រសាសន៍​​​ថា ការដាក់​ដំណើរការ​រថយន្ត​ទាំង​១២០​គ្រឿង​នេះ​ គឺ​ដើម្បី​កាត់បន្ថយ​ការចំណាយ​លើ​ថ្លៃ​ធ្វើដំណើរ​របស់​ពលរដ្ឋ។

ជាមួយគ្នានេះ​ដើម្បី​ធានា​សុវត្ថិភាព​ធ្វើដំណើរ​របស់​ពលរដ្ឋ​នោះ ប្រមុខ​រដ្ឋាភិបាល​ក្រើនរំលឹក​ឲ្យ​តៃកុង​បើកបរ​រថយន្តក្រុង​ទាំង ១២០​នេះ ត្រូវមាន​ការប្រុងប្រយ័ត្ន​ខ្ពស់​ដោយ​បើកបរ​គោរព​ច្បាប់​និង​កុំ​ជែង​គ្នា ជាពិសេស​កុំ​ផឹក​គ្រឿង​ស្រវឹង​ក្នុងពេល​បើកបរ។

សម្តេច​តេ​ជោ ហ៊ុន សែន បានលើកឡើង​តាម Facebook យ៉ាង​ដូច្នេះ​ថា​៖«​ដើម្បី​កុំឱ្យ​ចំណាយ​លើ​ការធ្វើដំណើរ​ច្រើន​សូម​បងប្អូន​ជនរួមជាតិ​និង កូនក្មួយ​ប្រើប្រាស់​ឡានក្រុង​ដែល​បាន​ដាក់ឱ្យ​ដំណើរការ​ដឹកជញ្ជូន​ដោយ​ឥតគិតថ្លៃ​ចាប់ពី​ថ្ងៃទី​១២-១៨​មេសា ដែលមាន​ចំនួន ១២០​គ្រឿង ។ តៃកុង​បើកបរ​ត្រូវមាន​ការប្រុងប្រយ័ត្ន​ខ្ពស់​បើកបរ​គោរព​ច្បាប់ កុំ​វ៉ា​ប្រជែង និង​កុំ​ផឹក​គ្រឿង​ស្រវឹង​ក្នុងពេល​បើកបរ​ដើម្បី​សុវត្ថិភាព​ទាំងអស់គ្នា​»​។​

ឆ្លៀត​ក្នុងឱកាស​នេះ សម្តេច​តេ​ជោ ហ៊ុន សែន ក៏បាន​ជូនពរ​ជនរួមជាតិ​ទាំងអស់​ធ្វើដំណើរ​ទៅកាន់​ស្រុកកំណើត​មាន​សុខ​សុវត្ថិភាព​តាមផ្លូវ​និង​បាន​សប្បាយ​ជួបជុំ​ក្រុមគ្រួសារ ឪពុកម្តាយ លោកយាយ លោកតា ជាទី​ស្រឡាញ់​នៅ​ក្នុងឱកាស​បុណ្យចូលឆ្នាំ​ថ្មី​ខាងមុខនេះ​។​

សូមបញ្ជាក់ថា ប្រមុខ​រាជរដ្ឋាភិបាល​កម្ពុជា សម្តេច​តេ​ជោ ហ៊ុន សែន បានសម្រេច​បញ្ចេញ​រថ​យន្ត​ក្រុង​សាធារណៈ​របស់​សាលា​រាជធានី​ភ្នំពេញ​ចំនួន ១២០​គ្រឿង សម្រាប់​ដឹកជញ្ជូន​ប្រជាពលរដ្ឋ​ពី​ភ្នំពេញ​ទៅតាម​បណ្តា​ខេត្ត​នានា​ដោយ​ឥតគិតថ្លៃ រយៈពេល​៧​ថ្ងៃ ចាប់ពី​ថ្ងៃទី​១២ ដល់​ថ្ងៃទី​១៨ ខែមេសា ឆ្នាំ​២០១៩ ដើម្បី​សម្រួល​ដល់​ការចំណាយ​របស់​ប្រជាពលរដ្ឋ​កម្មករនិយោជិត​ទៅលេង​ស្រុកកំណើត ក្នុងឱកាស​បុណ្យចូលឆ្នាំ​ថ្មី​។​ ចំនួន​រថយន្ត​ដែល​ត្រូវ​រត់តាម​ផ្លូវជាតិ​រួមមាន​៖ ផ្លូវជាតិ​លេខ​១ មាន ភ្នំពេញ​-​ខេត្តកណ្តាល​-​ស្វាយរៀង ចំនួន ៥​គ្រឿង និង​ភ្នំពេញ​-​កណ្តាល​-​ព្រៃវែង ៥​គ្រឿង សរុប​១០​គ្រឿង​, ផ្លូវជាតិ​លេខ​២ ភ្នំពេញ​-​តាកែវ ៥​គ្រឿង​, ផ្លូវជាតិ​លេខ​៣ ភ្នំពេញ​-​កែប ៥​គ្រឿង​, ភ្នំពេញ​-​កំពត ៥​គ្រឿង​សរុប ១០​គ្រឿង​, ផ្លូវជាតិ​លេខ​៤​ភ្នំពេញ​-​កំពង់ស្ពឺ ៣​គ្រឿង​,​ភ្នំពេញ​-​ក្រុងព្រះសីហនុ​៧​គ្រឿង​សរុប​១៣​គ្រឿង​, ផ្លូវជាតិ​លេខ​៥​ភ្នំពេញ​-​កំពង់ឆ្នាំង​៥​គ្រឿង​,​ភ្នំពេញ​- ពោធិ៍សាត់ ១០​គ្រឿង​, ភ្នំពេញ​-​បាត់ដំបង ១៥​គ្រឿង ,​ភ្នំពេញ​-​បន្ទាយមានជ័យ ១៥​គ្រឿង សរុប​៤៥​គ្រឿង​, ផ្លូវជាតិ​លេខ​៦ ភ្នំពេញ​-​កំពង់ធំ ៥ គ្រឿង​, ភ្នំពេញ​សៀមរាប​១៥​គ្រឿង សរុប​២០​គ្រឿង​, ផ្លូវជាតិ​លេខ​៦ និង​លេខ​៧ ភ្នំពេញ​-​កំពង់ចាម ៥​គ្រឿង​, ភ្នំពេញ​-​ត្បូងឃ្មុំ ៥​គ្រឿង សរុប​១០ គ្រឿង​, ផ្លូវជាតិ​លេខ​៦ និង​លេខ​៨ ភ្នំពេញ​-​ក្រចេះ ៥​គ្រឿង ភ្នំពេញ​-​ស្ទឹងត្រែង ៥​គ្រឿង សរុប​១០​គ្រឿង​។ នេះ​បើ​យោង​តាម​សេចក្តី​ជូនដំណឹង របស់​រដ្ឋបាល​រាជធានី​ភ្នំពេញ៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114