ព័ត៍មានទាន់​ហេតុការណ៏
Search

ផ្កា​ឈូករ័ត្ន​រីក​តាម​ច្រាំងទន្លេ​ផ្សារ​ក្រោម ស្វាគមន៍​ទិវា​បុណ្យ​ចូលឆ្នាំថ្មី, សូម​អញ្ជើញ ​មិត្ត​យុវវ័យ​មក​ថតរូប​ជាមួយ​ផ្កា​ដ៏​ស្រស់​ស្អាត​នេះ

កំពង់ឆ្នាំង ​៖​ សួន​ផ្កា​ឈូករ័ត្ន យ៉ាង​ស្រស់​ស្អាត ដែលមាន​ភាព​ទាក់ទាញ នៅ​មាត់​ច្រាំងទន្លេ​ផ្សារ​ក្រោម ស្ថិតនៅក្នុង​សង្កាត់​ផ្សារឆ្នាំង ក្រុង​កំពង់ឆ្នាំង​ ដែល​អាជ្ញាធរ​ខេត្ត​បាន​លំអ​ បាន​ក្លាយ​ទៅជា ​សួន​កម្សាន្ត​នៅ​រដូវ​បុណ្យចូលឆ្នាំថ្មី​ប្រពៃណី​ជាតិ​នេះ ដែល​ជា​ការ​ទាក់ទាញ​ភ្ញៀវ និង​អ្នក​ចូលចិត្ត​ផ្កា​ទៅ​ថតរូប​លេង​កម្សាន្ត​ ទុកជា​អនុស្សាវរីយ៍​បាន​យ៉ាង​សប្បាយរីករាយ។

លោក ស៊ុំ សុជាតិ ស្នងការរង​នគរបាល​ខេត្តកំពង់ឆ្នាំង ជា​អ្នក​ជួយ​ឧបត្ថម្ភ​ដាំ​ផ្កា និង​គណៈកម្មការ​ទទួល​បន្ទុក​រៀបចំ​ដាំ​ដើម​ផ្កាឈូករ័ត្ន​បានអោយដឹងថា​ ៖ ​កន្លងមក​អាជ្ញាធរ​ខេត្ត​កំពង់ឆ្នាំង បាន​បង្កើត​គណៈកម្មការ​​ដាំ​ផ្កាឈូករ័ត្ន​នៅ​មាត់ទន្លេ ក្នុង​គោលបំណង​ឲ្យ​រីក​ទាន់​ក្នុង​ពិធី​ធ្វើបុណ្យ​ទន្លេ ដែល​បាន​ប្រព្រឹត្ត​កន្លងទៅ​ថ្មីៗ នេះ។ ប៉ុន្តែ​យ៉ាងនេះ​ក្តី ផ្កាឈូករ័ត្ន​មិនបាន​រីក​ទាន់ ចំ ថ្ងៃ​ធ្វើ​ពិធីបុណ្យ​ទន្លេ​នោះ ឡើយ ផ្ទុយទៅវិញ ដល់​រដូវ​បុណ្យ ចូលឆ្នាំថ្មី​ប្រពៃណីជាតិ ផ្កាឈូករ័ត្ន បាន​រីក​យ៉ាង​ស្រស់បំព្រង​ពេញ​ច្រាំងទន្លេ នៅ​សួនច្បារ មាត់ទន្លេ​ដើម​ពោធិ៍​ផ្សារ​ក្រោម។

លោក ស៊ុំ សុជាតិ បាន​បន្តថា ​៖ កាល​ពេល​ដាំ​ដំបូង គឺ​គោលបំណង​ឲ្យ​រីក​ទាន់​បុណ្យ​ទន្លេ ដែល​ការ​ផ្កា​នេះ​លោក​ចំណាយ​ថវិកា​​អស់​ប្រមាណ​ជាង​១​ម៉ឺន​ដុល្លារ ក្នុង​គោលបំណង​ទាក់ទាញ​ភ្ញៀវទេសចរ ប៉ុន្តែ​ផ្កា​រីក​មិនបាន​រីក​ទាន់​បុណ្យ​ទន្លេ​ក៏ពិតមែន តែ​មក​ពេលនេះ​ផ្កាឈូករ័ត្ន​បាន​រីក​គ្រប់​ដើម​អស់ហើយ ឃើញ​ស្អាត​ល្អ​ណាស់ មាន​អ្នក​ចូលចិត្ត​ថត​ជាមួយ​ផ្កា​យ៉ាងច្រើន​នៅពេល​រសៀល​ជា​រៀល​រាល់ថ្ងៃ ទុកជា​អនុស្សាវរីយ៍។

ចំពោះ​ការ​ចំណាយ​ដាំ​ផ្កា​នេះ​អស់​ថវិកា​ច្រើន​ក៏ពិតមែន ប៉ុន្តែ​គ្រាប់​ផ្កាឈូករ័ត្ន​មាន​ទីផ្សារ គ្រាន់បើ​ដែរ គឺ​ក្នុង​១​គីឡូក្រាម ថ្លៃ​៣​ម៉ឺន​រៀល ហើយ​ឈ្មួញ​ទិញ​ទៅ​លក់​វិញ ១​គីឡូក្រាម​ថ្លៃ​២០​ដុល្លារ ឬ​ស្មើ​៨​ម៉ឺន​រៀល ដែល​ខ្លះ​គេ​ទិញយក​ទៅធ្វើ​ពូជ ខ្លះ​ទិញ​ទៅធ្វើជា​គ្រឿងក្លែម​ជាដើម តែ​យើង​មិនមែន​ធ្វើ​អាជីវកម្ម​ទេ គឺ​គ្រាន់តែ​ដាំ​លំអ ក្រុង​តែប៉ុណ្ណោះ​។ ចំណែក​ពូជ​ផ្កា​ឈូក​រ័ត្ន ដែល​លោក​យកមក​ដាំ គឺជា​ពូជ​ឈូករ័ត្ន​របស់​ខ្មែរ ដែលមាន 3 ប្រភេទ ដែល​សុទ្ធសឹង​ជា​ប្រភេទ​គ្រាប់​ផ្កាឈូករ័ត្ន មាន​សារធាតុ​ប្រេង​ច្រើន គឺអាច​ព្យាបាល​ជំងឺ​ក្បាលជង្គង់​ផងដែរ នៅ​ឆ្នាំក្រោយ​លោក​នឹង​ដាំ​អោយ​បាន​ច្រើនជាង​នេះ បន្ទាប់ពី​បាន​ទុក​ពូជ​ខ្លះ និង​លក់​ទៅអោយ​ទីផ្សារ​ដើម្បី ស្រង់ដើម​បាន​ខ្លះៗ៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114