ព័ត៍មានទាន់​ហេតុការណ៏
Search

ចូលឆ្នាំ​ទី១​​ បុរស​ម្នាក់​ត្រូវ​ប៉ូលិស​ស្រុក​អូរ​ជុំ​ចាប់​វាយ​ខ្នោះ ក្រោយពី​សម្លាប់​បុរស​វ័យ​ចំណាស់

រតនគិរី ​៖ បុរស​ជនជាតិ​ទំពួន​ម្នាក់ ក្រោយពី​បាន​ផឹក​ស៊ី​ស្រវឹង​ទាស់​ពាក្យសំដី​គ្នា បាន​យក​កាំបិត​កាប់​ទៅលើ​បុរស​វ័យ​ចំណាស់​ម្នាក់​បណ្តាល​ឲ្យ​ស្លាប់​ភ្លាមៗ​នៅ​នឹង​កន្លែង​។​

​ករណី​កាប់សម្លាប់​គ្នា​នេះ​ បាន​កើតឡើង​នៅវេលា​ម៉ោង​៤​និង​៣០​នាទី​ល្ងាច ថ្ងៃអាទិត្យ ១០​កើត ខែចេត្រ ឆ្នាំច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃទី​១៤ ខែមេសា ឆ្នាំ​២០១៩ ស្ថិតនៅ​ក្នុងភូមិ​កា​មែន ឃុំ​សាមគ្គី ស្រុក​អូរ​ជុំ។​

មន្ត្រីនគរបាល​ស្រុក​អូរ​ជុំ​បាន​ឲ្យ​ដឹងថា ជនរងគ្រោះ​ដែល​ស្លាប់​ឈ្មោះ​មុខ គិច អាយុ​៤៧​ឆ្នាំ ជនជាតិ​ទំពួន​។ រីឯ​ជនបង្ក​ឈ្មោះ ញ៉េ​ន ថន ភេទ​ប្រុស អាយុ​២០​ឆ្នាំ ជនជាតិ​ទំពួន អ្នក​ទាំង​២​នាក់​មាន​ទីលំនៅ​ភូមិ​/ឃុំ​កើតហេតុ​ខាងលើ។

មន្ត្រី​នគរបាល​បាន​បន្តថា មុន​ពេល​កើតហេតុ អ្នក​ទាំង​២​បាន​ផឹក​ស៊ី​ស្រវឹង ​ក្រោយមក​ក៏​ទាស់​ពាក្យសំដី​នឹង​គ្នា ជនបង្ក​បាន​យក​កាំបិត​កាប់​ទៅលើ​ជនរងគ្រោះ​ចំ​បំពង​.​ក​បណ្តាល​ឲ្យ​ហូរ​ឈាម​ស្រោច​ពេញ​ផ្លូវ​ស្លាប់​មួយ​រំពេច​។​

​លោក​ថា ក្រោយ​ទទួល​បាន​ព័ត៌មាន​ភ្លាម កម្លាំង​អធិការនគរបាល​ស្រុក​អូរ​ជុំ និង​កម្លាំង​ប៉ុស្តិ៍ បាន​ចុះ​មកដល់​កន្លែង​កើត​ហេតុ ហើយ​បាន​ឃាត់​ជនបង្ក នាំយកមក​អធិការដ្ឋាន​នគរបាល​ស្រុក​អូរ​ជុំដើម្បី​កសាង​សំណុំរឿង​បញ្ជូនទៅ​តុលាការ​មក​ផ្តន្ទាទោស​ទៅតាម​ផ្លូវច្បាប់​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114