វត្តមានកូនស្រីលោកគីម នៅវិមានសពដូនតា បង្ហាញពីការរៀបចំផ្លូវបន្តតំណែងកាន់តែច្បាស់

មេដឹកនាំកូរ៉េខាងជើង លោក គីម ជុងអ៊ុន បាននាំកូនស្រីរបស់លោកគឺ កញ្ញា ជូ អេ ទៅកាន់វិមានព្រះអាទិត្យ Kumsusan ក្នុងឱកាសបុណ្យចូលឆ្នាំថ្មី ដែលជាដំណើរទស្សនកិច្ចប្រវត្តិសាស្ត្រទៅកាន់ទីកន្លែងសក្ការៈបំផុតរបស់ជាតិ។

អ្នកវិភាគយល់ថា នេះជាការបញ្ជាក់ពីឋានៈរបស់នាងក្នុងនាមជាអ្នកបន្តវេនដែលមិនអាចជៀសបាននៃត្រកូលគីម។ រូបភាពដែលចេញផ្សាយដោយប្រព័ន្ធផ្សព្វផ្សាយរដ្ឋ KCNA នា​ថ្ងៃសុក្រ​ទី​២​ខែ​មករា​ឆ្នាំ​២០២៦​នេះ​ បានបង្ហាញពីកូន​ស្រី​លោក​គីម ឈរនៅចំកណ្តាលនៃជួរថ្នាក់ដឹកនាំកំពូល ដោយមានឪពុក និងម្តាយរបស់នាងគឺលោកស្រី Ri Sol Ju នៅអមសងខាង ក្នុងអំឡុងពេលគោរពវិញ្ញាណក្ខន្ធអតីតមេដឹកនាំជំនាន់មុន។

ដំណើរទស្សនកិច្ចនេះមានទម្ងន់នយោបាយយ៉ាងធំធេង ដោយសារវិមានសពនេះជានិមិត្ត​សញ្ញា​តំណាងខ្ពស់បំផុតនៃសិទ្ធិដឹកនាំរបស់ខ្សែលោហិត «ត្រកូល​គីម»។ ជូ អេ ដែលត្រូវគេសន្និដ្ឋានថាបានកើតនៅដើមទសវត្សរ៍ឆ្នាំ២០១០ បានបង្ហាញមុខជាសាធារណៈកាន់តែញឹកញាប់ក្នុងរយៈពេល៣​ឆ្នាំកន្លង​មក​នេះ។ ការបង្ហាញខ្លួនចុងក្រោយនេះ បានធ្វើឡើងបន្ទាប់ពីការបង្ហាញខ្លួនជាអន្តរជាតិដ៏សំខាន់កាលពីខែកញ្ញាឆ្នាំ២០២៥ នៅពេលដែលនាងបានធ្វើដំណើរទៅកាន់ទីក្រុងប៉េកាំងជាមួយឪពុករបស់នាង ដែលជាដំណើរទស្សនកិច្ចក្រៅប្រទេសលើកដំបូង។

ទោះបីជាទីក្រុងព្យុងយ៉ាងមិនដែលបានបញ្ជាក់ជាផ្លូវការអំពីអាយុ ឬស្ថានភាពរបស់នាងក្នុងនាមជាអ្នកបន្តវេនក៏ដោយ ក៏ភ្នាក់ងារស៊ើបការណ៍សម្ងាត់កូរ៉េខាងត្បូង និងអ្នកវិភាគក្នុងតំបន់បានលើកឡើងថា ភាពញឹកញាប់ និងលក្ខណៈនៃភារកិច្ចសាធារណៈរបស់នាង បានបង្ហាញយ៉ាងច្បាស់ថា នាងកំពុងត្រូវបានរៀបចំឲ្យក្លាយជាមេដឹកនាំជំនាន់ទី៤ នៃប្រទេសមហាអំណាចនុយក្លេអ៊ែរមួយនេះ៕

ប្រែសម្រួល៖ ឈាង