ព័ត៌មានអន្ដរជាតិ

ហ្សាការតារបស់ឥណ្ឌូណេស៊ី វ៉ាដាច់តូក្យូ ក្លាយជាទីក្រុងធំជាងគេបំផុតរបស់ពិភពលោក

បានផុស

៦ ខែ មុន

នៅ

ថ្ងៃសុក្រ ២ មករា ២០២៦

ដោយ

ទីក្រុងហ្សាការតានៃប្រទេសឥណ្ឌូណេស៊ី បានក្លាយជាទីក្រុងដ៏ធំបំផុតរបស់ពិភពលោកដោយមានប្រជាជនរស់នៅប្រមាណ ៤១,៩ លាននាក់ ដោយច្រើនជាងទីក្រុងដាការបស់ប្រទេសបង់ក្លាដែស និងវ៉ាដាច់ទីក្រុងតូក្យូរបស់ជប៉ុន។ នេះបើតាមរបាយការណ៍អង្គការសហប្រជាជាតិ (UN) ចេញផ្សាយកាលពីពេលថ្មីៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ UN បង្ហាញថា ចំនួនប្រជាជនក្រុងតូក្យូ បានកើនឡើងយឺតជាងចំនួនប្រជាជននៃប្រទេសឥណ្ឌូណេស៊ី និងបង់ក្លាដែស ហើយជាលទ្ធផល ក្រុងតូក្យូបានធ្លាក់ចំណាត់ថ្នាក់ «ទីក្រុងដែលមានប្រជាជនរស់នៅច្រើនជាងគេបំផុតទូទាំងពិភពលោក» ពីលេខ១នៅឆ្នាំ ២០០០ មកលេខ ៣ នៅឆ្នាំ ២០២៥។

គិតត្រឹមថ្ងៃទី ១ កក្កដា ឆ្នាំ ២០២៥ ក្រុងហ្សាការតាមានប្រជាជនរស់នៅ ៤១,៩ លាននាក់ បន្ទាប់មកទីក្រុងដាកា (៣៦,៥ លាននាក់) តូក្យូ (៣៣,៤ លាននាក់) ញូវដេលីរបស់ឥណ្ឌា (៣០,២ លាននាក់) សៀងហៃរបស់ចិន (២៩,៥ លាននាក់) និងក្វាងចូវ (២៧,៥ លាននាក់)។

របាយការណ៍ដដែលបានព្យាករថា នៅឆ្នាំ ២០៥០ ទីក្រុងដាកា នឹងក្លាយជាទីក្រុងមានប្រជាជនច្រើនជាងគេបំផុតលើពិភពលោក បន្ទាប់មកគឺហ្សាការតា សៀងហៃ ញូវដេលី ការ៉ាឈី (ប៉ាគីស្ថាន) ខណៈទីក្រុងតូក្យូនឹងធ្លាក់ចំណាត់ថ្នាក់ទៅលេខ ៧។

របាយការណ៍ UN បាននិយាយថា ប្រជាជនរស់នៅទីក្រុងកាន់តែច្រើន ដោយឥឡូវនេះ ៤៥% នៃប្រជាជនសរុប ៨,២ ប៊ីលាននាក់លើពិភពលោក រស់នៅទីក្រុង ដែលភាគរយនេះគឺខ្ពស់ជាងទ្វេដងធៀបនឹងសមាមាត្រនៅឆ្នាំ ១៩៥០។ ២/៣ នៃកំណើនប្រជាជនពិភពលោកចាប់ពីឆ្នាំ ២០២៥ ដល់ ២០៥០ ត្រូវបានព្យាករថានឹងកើតឡើងនៅក្នុងទីក្រុង ខណៈភាគច្រើនដែលនៅសល់ គឺកើតឡើងនៅទីប្រជុំជនផ្សេងៗ។

របាយការណ៍បន្តថា ទីក្រុងតូក្យូ និងសេអ៊ូល(កូរ៉េខាងត្បូង) គឺជាទីក្រុងតែ២គត់ក្នុងចំណោមទីក្រុងធំៗទាំង ១០ ក្នុងឆ្នាំ ២០២៥ ដែលឃើញពីការធ្លាក់ចុះនៃចំនួនប្រជាជននៅឆ្នាំ ២០៥០ ដោយសារតែអត្រាមានកូនទាប និងការធ្លាក់ចុះចំនួនប្រជាជនសរុប៕