សេដ្ឋកិច្ច

កម្ពុជាអនុម័តគម្រោងវិនិយោគរោងចក្រផលិតសំបកកង់រថយន្ត មានទំហំទឹកប្រាក់ ៧៧៤ លានដុល្លារ

បានផុស

៦ ខែ មុន

នៅ

ថ្ងៃអង្គារ ៦ មករា ២០២៦

ដោយ

ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគលើរោងចក្រផលិតសំបកកង់រថយន្តចំនួន ៤ ជាមួយទុនវិនិយោគ ៧៧៤ លានដុល្លារ នៅក្នុងឆ្នាំ ២០២៥ ស្ថិតនៅតំបន់សេដ្ឋកិច្ចពិសេស ISI ខេត្តព្រះសីហនុ និងតំបន់សេដ្ឋកិច្ចពិសេសស្ថិតក្នុងខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គឹន ឧត្តមមុនីស៊ីណាត នាយកប្រតិបត្តិក្រុមហ៊ុន Sailun ប្រាប់កម្ពុជាថ្មីថា វត្តមានរោងចក្រផលិតសំបកកង់រថយន្តធំៗ បានធ្វើឱ្យដំណាំកៅស៊ូនៅកម្ពុជាកាន់តែរីកដុះដាលនៅពេលអនាគត ជាពិសេសនឹងជួយរក្សាបានលំនឹងទីផ្សារនៃអនុវិស័យមួយនេះ និងទាក់ទាញការវិនិយោគ។

នាយកប្រតិបត្តិក្រុមហ៊ុន Sailun បានអះអាងថា នៅក្នុងឆ្នាំ ២០២៥ ក្រុមហ៊ុនរបស់លោកប្រើប្រាស់កៅស៊ូក្នុងស្រុករហូតដល់ ១០ ម៉ឺនតោន បន្ទាប់ពីរោងចក្ររបស់លោកបានប្រើប្រាស់ចំនួន ៥ ម៉ឺនតោនកាលពីឆ្នាំ ២០២៤។

លោក គឹន ឧត្តមមុនីស៊ីណាត បន្ថែមថា៖ «ប្រជាពលរដ្ឋដែលចង់ដាំកៅស៊ូមិនទាន់ហួសពេលទេ គ្រាន់តែវត្តមានរោងចក្រផលិតសំបកកង់រថយន្ត Sailun ចំនួន ៣ បច្ចុប្បន្នការផ្គត់ផ្គង់នៅខ្វះ ចុះទម្រាំតែរោងចក្រទាំង ៣ នោះគាត់ផលិតពេញបន្ទុក អាចនិយាយបានថា តម្រូវការ វាមិនមែនត្រឹមតែ ១០ ម៉ឺនតោន ហ្នឹងទេ តម្រូវការវាអាចនឹងលើសហ្នឹងទៅទៀត»។

លោក ម៉ែន សុភក្តិ ប្រធានសមាគមអភិវឌ្ឍន៍កៅស៊ូបានឱ្យដឹងថា វត្តមានរោងចក្រផលិតសំបកកង់រថយន្តបានជួយស្រូបទាញជ័រកៅស៊ូក្នុងស្រុកកាន់តែច្រើន។

លោក ម៉ែន សុភក្ដិបញ្ជាក់ថា៖ «ពីមុនយើងលក់នាំចេញទៅក្រៅប្រទេស ឥឡូវមានរោងចក្រកង់ឡានដែលគេមកផលិតដោយប្រើកៅស៊ូធម្មជាតិ ផ្នែកនៃគ្រឿងផ្សំផលិតកង់ឡានគឺទិញកៅស៊ូធម្មជាតិក្នុងស្រុក ហើយយើងលក់កៅស៊ូក្នុងស្រុកយើងអត់ចំណាយលើការដឹកជញ្ជូនសេវាផ្សេងៗ»។

យោងតាមក្រសួងពាណិជ្ជកម្ម កម្ពុជារកចំណូលបានជាង ១,២ ពាន់លានដុល្លារ ពីការនាំចេញសំបកកង់រថយន្តនៅក្នុងរយៈពេល ១១ ខែ ឆ្នាំ ២០២៥ កើនឡើង ៥៧,៨៨% ធៀបនឹងរយៈពេលដូចគ្នា នៅឆ្នាំ ២០២៤ ខណៈតម្រូវការជ័រកៅស៊ូក្នុងស្រុកកើនឡើងខ្ពស់៕

អត្ថបទ៖ ឡេង ដេត

Related Topics:រោងចក្រផលិតសំបកកង់ឡាន កៅស៊ូ