អង់គ្លេស-បារាំង-អ៊ុយក្រែន ចុះហត្ថលេខាកិច្ចព្រមព្រៀងបញ្ជូនកងកម្លាំងពហុជាតិ ក្រោយ​ចប់​សង្គ្រាម

ក្នុងបម្រែបម្រួលដ៏សំខាន់ឆ្ពោះទៅរកការធានាសន្តិសុខជាក់ស្តែង ចក្រភពអង់គ្លេស បារាំង និងអ៊ុយក្រែន បានចុះហត្ថលេខាលើសេចក្តីថ្លែងការណ៍​មួយ​កាលពីថ្ងៃអង្គារ​ទី​៦​ខែ​មករា​ឆ្នាំ​២០២៦ ក្នុងទីក្រុងប៉ារីស ដោយប្តេជ្ញាដាក់ពង្រាយកងកម្លាំងអឺរ៉ុបនៅលើទឹកដីអ៊ុយក្រែន បន្ទាប់ពីមានកិច្ចព្រមព្រៀងសន្តិភាពជាមួយរុស្ស៊ី។

យោង​តាម ABC News កិច្ចព្រមព្រៀងនេះ ត្រូវ​បានចុះហត្ថលេខាដោយនាយករដ្ឋមន្ត្រីអង់គ្លេស លោក Keir Starmer ប្រធានាធិបតីបារាំង លោក Emmanuel Macron និងប្រធានាធិបតីអ៊ុយក្រែន លោក Volodymyr Zelenskyy ដោយ​មានគោលដៅបង្កើត «មជ្ឈមណ្ឌលយោធា» នៅទូទាំងប្រទេសអ៊ុយក្រែន ដើម្បីការពារដែនអាកាស ដែនសមុទ្រ និងជួយស្ដារវិស័យការពារជាតិឡើងវិញ។

កិច្ចប្រជុំកំពូលនៃ «សម្ព័ន្ធមិត្តស្ម័គ្រចិត្ត (Coalition of the Willing)»នេះ ក៏មានការចូលរួមពីគណៈប្រតិភូសហរដ្ឋអាមេរិក រួមមានប្រេសិតពិសេស លោក Steve Witkoff និងទីប្រឹក្សាប្រធានាធិបតី លោក Jared Kushner ដែលបង្ហាញពីការយល់ឃើញរួមគ្នាដ៏កម្ររវាងអឺរ៉ុប និងអាមេរិក លើកិច្ចការស្ថិរភាពក្រោយជម្លោះ។ ខណៈដែលតួនាទីរបស់អាមេរិកផ្តោតសំខាន់លើការត្រួតពិនិត្យបទឈប់បាញ់តាមរយៈបច្ចេកវិទ្យាកម្រិតខ្ពស់ លោក Witkoff បានបញ្ជាក់ថា ទីក្រុងវ៉ាស៊ីនតោននឹង «គាំទ្រ» កងកម្លាំងពហុជាតិនេះ ក្នុងករណីមានការវាយប្រហារ។

អធិការបតីអាល្លឺម៉ង់ លោក Friedrich Merz ក៏បានចូលរួមផងដែរ ដោយបង្ហាញឆន្ទៈក្នុងការដាក់ពង្រាយកងទ័ពអាល្លឺម៉ង់ទៅកាន់ដែនដីនៃប្រទេសជិតខាងដែលជាសមាជិកណាតូ ដើម្បីពង្រឹងបេសកកម្មនេះ ប៉ុន្តែលោកមិនទាន់ឈានដល់ការបញ្ជូនកងទ័ពចូលក្នុងទឹកដីអ៊ុយក្រែននៅឡើយទេ។

ទោះបីជាមានវឌ្ឍនភាពក្នុងចំណោមសម្ព័ន្ធមិត្តក៏ដោយ ក៏ក្រុមមេដឹកនាំបានព្រមានថា ផ្លូវឆ្ពោះទៅរកបទឈប់បាញ់នៅតែមានភាពលំបាកខ្លាំង។ នាយករដ្ឋមន្ត្រី Starmer បានព្រមានថា «ដំណាក់កាលលំបាកបំផុតគឺនៅខាងមុខ» ដោយលោកលើកឡើងថា មិនទាន់មានភស្តុតាងដែលថា ប្រធានាធិបតីរុស្ស៊ី លោក Vladimir Putin ត្រៀមខ្លួនធ្វើការសម្រុះសម្រួលនោះទេ។ វិមានក្រឹមឡាំងបានបដិសេធជាបន្តបន្ទាប់ចំពោះវត្តមានកងទ័ពនៃប្រទេសសមាជិកណាតូ ក្នុងប្រទេសអ៊ុយក្រែន ដោយចាត់ទុកសំណើនេះថាជារឿងដែលមិនអាចទទួលយកបាន។ ទោះជាយ៉ាងណាក៏ដោយ លោក Zelenskyy បានសាទរចំពោះសេចក្តីថ្លែងការណ៍នេះថាជា «សមិទ្ធផលដ៏ធំធេង» ដែលផ្ដល់នូវ «ខ្លឹមសារជាក់ស្តែង» ក្នុងការទប់ស្កាត់ការឈ្លានពានរបស់រុស្ស៊ីនាពេលអនាគត៕

ប្រែសម្រួល៖ ឈាង