លោកត្រាំ ថា វ៉េណេស៊ុយអេឡានឹងប្រគល់ប្រេងរហូតដល់ ៥០លានបារ៉ែលឲ្យអាមេរិក

លោក​ប្រធានាធិបតី​ ដូណាល់ ត្រាំ បានមានប្រសាសន៍ថា ប្រទេសវ៉េណេស៊ុយអេឡានឹងប្រគល់ប្រេងចន្លោះពី ៣០លាន ទៅ ៥០លានបារ៉ែល ឲ្យ​អាមេរិក ដោយប្រេងឆៅទាំងនោះនឹងត្រូវលក់ក្នុងតម្លៃទីផ្សារ ហើយចំណូលដែលទទួលបាននឹងត្រូវគ្រប់គ្រងដោយទីក្រុងវ៉ាស៊ីនតោន។

យោង​តាម​ការ​ចុះ​ផ្សាយ​នា​ថ្ងៃ​ពុធ​ទី​៧​ខែ​មករា​ឆ្នាំ​២០២៦​របស់​សារព័ត៌មាន​ CNN នៅក្នុងការបង្ហោះលើបណ្តាញសង្គម Truth Social លោកត្រាំ​បានលើកឡើងថា អាជ្ញាធរបណ្តោះអាសន្នរបស់វ៉េណេស៊ុយអេឡានឹងផ្ទេរ «ប្រេងដែលជាប់ទណ្ឌកម្ម» ឲ្យ​ក្រុង​វ៉ាស៊ីនតោន ដោយបន្ថែមថា ប្រាក់ចំណូលដែលទទួលបាននឹងត្រូវប្រើប្រាស់ «ដើម្បីជាប្រយោជន៍ដល់ប្រជាជនវ៉េណេស៊ុយអេឡា និង​​អាមេរិក»។ លោកបានបន្តថា រដ្ឋមន្ត្រីក្រសួងថាមពល លោក Chris Wright ត្រូវបានបញ្ជាឲ្យអនុវត្តផែនការនេះភ្លាមៗ។

មន្ត្រីជាន់ខ្ពស់នៃរដ្ឋបាល​អាមេរិកម្នាក់បាន​ប្រាប់ CNN ថា ប្រេងទាំងនោះត្រូវបានផលិតរួចរាល់ហើយ ដោយភាគច្រើនបច្ចុប្បន្នកំពុងស្ថិតនៅលើនាវាដឹកប្រេង ដែលនឹងត្រូវប្តូរទិសដៅទៅកាន់រោងចក្រចម្រាញ់ប្រេងនៅតំបន់ឆ្នេរឈូងសមុទ្ររបស់អាមេរិក។ ការផ្ទេរនេះត្រូវបានគេរំពឹងថានឹងកើតឡើងយ៉ាងឆាប់រហ័ស ពីព្រោះប្រេងឆៅធុនធ្ងន់របស់វ៉េណេស៊ុយអេឡាមិនអាចរក្សាទុកក្នុងរយៈពេលយូរបានទេ។

តម្លៃប្រេងនៅ​អាមេរិកបានធ្លាក់ចុះប្រហែល ១ដុល្លារក្នុងមួយបារ៉ែល ឬជិត ២% បន្ទាប់ពីការប្រកាសរបស់លោកត្រាំ ដោយបានមកនៅត្រឹមតម្លៃជិត​៥៦ដុល្លារ​ក្នុង​មួយ​បារ៉ែល។ ផ្អែកលើតម្លៃបច្ចុប្បន្ននេះ ការលក់ប្រេងរហូតដល់៥០​លានបារ៉ែល អាចនឹងបង្កើតចំណូលបាន ២,៧៥​ពាន់លានដុល្លារ៕

ប្រែសម្រួល៖ ឈាង